Je, Unaamini Kwamba Njia ya Yehova ya Kufanya Mambo Ndiyo Bora?

1-2. (a) Kwa nini ni vigumu kwa watu wengi leo kuwatumaini watu wenye mamlaka? (b) Tutazungumzia nini katika makala hii?

LEO, ni vigumu kwa watu wengi kumwamini mtu yeyote aliye na mamlaka. Wamejionea kwamba mifumo ya kisheria na ya kisiasa inawapendelea matajiri na watu wenye mamlaka na kuwanyima maskini haki yao. Biblia inasema hivi kwa usahihi: “Mwanadamu amemtawala mwanadamu mwenzake kwa kumuumiza.” (Mhu. 8:9) Isitoshe, baadhi ya viongozi wa kidini hutenda mambo yasiyofaa, ambayo yamewafanya watu fulani wasimtumaini Mungu. Hivyo mtu anapokubali kujifunza Biblia pamoja nasi, tunakabili changamoto ya kumsaidia aimarishe imani yake katika Yehova na katika wawakilishi wake duniani.

² Bila shaka, si wanafunzi wa Biblia pekee wanaohitaji kujifunza kumtumaini Yehova na tengenezo lake. Hata wale ambao wamekuwa katika kweli kwa miaka mingi hawapaswi kusahau kamwe kwamba sikuzote njia ya Yehova ya kufanya mambo ndiyo bora. Nyakati fulani, huenda tukakabili hali ambazo zinajaribu uhakika wetu katika Yehova. Katika makala hii, tutazungumzia hali tatu zinazoweza kujaribu imani yetu: (1) tunaposoma masimulizi fulani ya Biblia, (2) tunapopokea mwongozo kutoka katika tengenezo la Yehova, na (3) tutakapokabili changamoto za wakati ujao.

MTUMAINI YEHOVA UNAPOSOMA BIBLIA

3. Masimulizi fulani ya Biblia yanaweza kujaribu jinsi gani uhakika wetu katika Yehova?

³ Tunaposoma Neno la Mungu, huenda tukawa na maswali kuhusu jinsi ambavyo Yehova alishughulika na baadhi ya watu na kuhusu maamuzi fulani aliyofanya. Kwa mfano, katika kitabu cha Hesabu tunasoma kwamba Yehova alimhukumu Mwisraeli fulani auawe kwa kukusanya kuni katika siku ya Sabato. Katika kitabu cha pili cha Samweli, tunajifunza kwamba karne nyingi baadaye, Yehova alimsamehe Mfalme Daudi alipofanya uzinzi na kuua. (Hes. 15:32, 35; 2 Sam. 12:9, 13) Huenda tukajiuliza, ‘Kwa nini Yehova alimsamehe Daudi licha ya kwamba alikuwa ameua na kufanya uzinzi, lakini akamhukumu yule mwanamume mwingine auawe kwa kosa lililoonekana kuwa dogo?’ Ili kujibu swali hilo, fikiria mambo matatu ambayo tunapaswa kukumbuka tunaposoma Biblia.

4. Andiko la Mwanzo 18:20, 21 na Kumbukumbu la Torati 10:17 linaimarishaje uhakika wetu katika hukumu za Yehova?

⁴ Nyakati nyingine Biblia haitaji mambo yote kuhusu simulizi fulani. Kwa mfano, tunajua kwamba Daudi alitubu kutoka moyoni kwa matendo yake. (Zab. 51:2-4) Lakini yule mwanamume aliyevunja sheria ya Sabato alikuwa mtu wa aina gani? Je, alijuta kwa sababu ya jambo alilofanya? Je, alikosa kutii sheria za Yehova wakati uliopita? Je, alipuuza au hata kukataa maonyo wakati uliopita? Biblia haisemi. Hata hivyo, tunaweza kuwa na uhakika kuhusu jambo hili: “Kamwe [Yehova] hana ukosefu wa haki.” (Kum. 32:4) Uamuzi wake unategemea habari kamili na si jambo lililosikiwa, ubaguzi, au jambo lingine lolote ambalo mara nyingi hupotosha maamuzi ya wanadamu. (Soma Mwanzo 18:20, 21; Kumbukumbu la Torati 10:17.) Kadiri tunavyojifunza zaidi kumhusu Yehova na viwango vyake, ndivyo tunavyositawisha zaidi uhakika wetu katika hukumu zake. Hata ikiwa simulizi la Biblia linatokeza maswali ambayo hatuwezi kuyajibu kwa sasa, tunajua mambo ya kutosha kumhusu Mungu wetu yanayotuhakikishia kwamba yeye “ni mwadilifu katika njia zake zote.”​—Zab. 145:17.

5. Kutokamilika kwetu kunaathirije maoni yetu kuhusu haki? (Tazama pia sanduku “Maoni Yetu Kuhusu Haki Huathiriwa na Kutokamilika Kwetu.”)

⁵ Maoni yetu kuhusu haki yameathiriwa na kutokamilika kwetu. Mungu alituumba kwa mfano wake, hivyo tunatamani kuona watu wakitendewa kwa haki. (Mwa. 1:26) Lakini kwa sababu sisi si wakamilifu, hata tunapofikiri kwamba tuna habari kamili, tunaweza kuhukumu kwa njia isiyo sahihi. Kwa mfano, kumbuka jinsi ambavyo Yona hakufurahishwa na uamuzi wa Yehova wa kuwaonyesha rehema watu wa Ninawi. (Yona 3:10–4:1) Hata hivyo, fikiria matokeo. Zaidi ya wakaaji 120,000 wa Ninawi walitubu, nao wakaokolewa! Mwishowe, Yona ndiye aliyehitaji kurekebishwa, na si Yehova.

6. Kwa nini Yehova hahitaji kutuambia sababu za maamuzi yake?

⁶ Yehova hahitaji kuwaeleza wanadamu sababu zake za kufanya maamuzi. Ni kweli kwamba wakati uliopita Yehova aliwaruhusu watumishi wake waeleze maoni yao kuhusu maamuzi aliyokuwa amefanya au aliyokusudia kufanya. (Mwa. 18:25; Yona 4:2, 3) Na wakati mwingine, alieleza kwa nini alifanya uamuzi fulani. (Yona 4: 10, 11) Hata hivyo, Yehova hawajibiki kutuambia sababu za maamuzi anayofanya. Akiwa Muumba wetu hahitaji kupata kibali chetu, iwe ni kabla au baada ya kuchukua hatua fulani.​—Isa. 40:13, 14; 55:9.

MTUMAINI YEHOVA UNAPOPOKEA MWONGOZO

7. Huenda tukakabili changamoto gani, na kwa nini?

⁷ Bila shaka, tunakubali kwa moyo wote kwamba sikuzote Yehova hufanya mambo kwa njia inayofaa. Hata hivyo, huenda ikawa vigumu kwetu kuwatumaini wanaume aliowaweka rasmi. Huenda tukajiuliza ikiwa wale walio na mamlaka ya kadiri katika tengenezo la Yehova kwa kweli wanatenda kulingana na mwongozo wa Yehova au mwongozo wao wenyewe. Katika nyakati za Biblia, huenda baadhi ya watu walifikiri hivyo. Fikiria mifano iliyotajwa katika fungu la 3. Huenda mtu wa ukoo wa yule mwanamume aliyevunja sheria ya Sabato angejiuliza ikiwa kwa kweli Musa alitafuta maoni ya Yehova kabla ya kutangaza hukumu ya kifo. Rafiki ya Uria Mhiti, ambaye mke wake alifanya uzinzi na Daudi huenda angefikia mkataa kwamba Daudi alitumia mamlaka yake akiwa mfalme kukwepa adhabu ambayo kwa kweli alistahili. Ukweli ni kwamba hatuwezi kusema tunamtumaini Yehova ikiwa hatuwatumaini wanaume wanaomwakilisha duniani, yaani, wale ambao Yehova anawatumaini.

8. Kuna ulinganifu gani kati ya jambo linalotajwa kwenye Matendo 16:4, 5 na jinsi kutaniko la Kikristo linavyofanya kazi leo?

⁸ Leo, Yehova anaongoza sehemu ya kidunia ya tengenezo lake kupitia “mtumwa mwaminifu na mwenye busara.” (Mt. 24:45) Kama ilivyokuwa kwa baraza linaloongoza la karne ya kwanza, mtumwa huyo anasimamia utendaji wa watu wa Mungu ulimwenguni pote na kutoa mwongozo kwa wazee wa kutaniko. (Soma Matendo 16:4, 5.) Nao wazee wanahakikisha kwamba mwongozo huo unafuatwa makutanikoni. Tunaonyesha kwamba tunaitumaini njia ya Yehova ya kufanya mambo kwa kufuata mwongozo tunaopata kutoka kwa tengenezo na kwa wazee wa makutaniko.

9. Ni wakati gani ambapo huenda ikawa vigumu kwetu kuunga mkono uamuzi uliofanywa na wazee wa kutaniko, na kwa nini?

⁹ Nyakati nyingine, huenda ikawa vigumu kwetu kuunga mkono maamuzi yanayofanywa na wazee. Kwa mfano, katika miaka ya karibuni makutaniko na mizunguko mingi imepangwa upya. Katika visa fulani, wazee wamewaomba wahubiri wahamie kutaniko lingine ili kutumia kikamili nafasi za kuketi katika Majumba yetu ya Ufalme. Ikiwa tutaombwa tujiunge na kutaniko jipya, huenda ikawa vigumu kwetu kuacha familia na marafiki wetu. Je, Yehova anawaambia moja kwa moja wazee wa kutaniko mahali ambapo kila mhubiri atapangiwa? La hasha. Huenda jambo hilo likafanya iwe vigumu kwetu kufuata mwongozo tunaopewa. Lakini Yehova anawatumaini wazee wafanye maamuzi hayo, nasi tunahitaji kuwatumaini pia.b

10. Kulingana na Waebrania 13:17, kwa nini tunapaswa kuwaunga mkono wazee wa kutaniko?

¹⁰ Kwa nini tunapaswa kuwaunga mkono wazee wa kutaniko na kufuata maamuzi yao hata ikiwa mapendezi yetu ni tofauti na uamuzi wao? Kwa sababu kufanya hivyo kunatusaidia kudumisha umoja miongoni mwa watu wa Mungu. (Efe. 4:2, 3) Makutaniko yanasitawi ikiwa sote kwa unyenyekevu tunaunga mkono maamuzi ya baraza la wazee. (Soma Waebrania 13:17.) Jambo muhimu zaidi, tunamwonyesha Yehova kwamba tunamtumaini kwa kuwaunga mkono wale ambao amewapa jukumu la kututunza.​—Mdo. 20:28.

11. Ni nini kinachoweza kutusaidia tuimarishe uhakika wetu katika mwongozo tunaopata kutoka kwa wazee?

¹¹ Tunaweza kuimarisha uhakika wetu katika mwongozo tunaopata kutoka kwa wazee kwa kukumbuka kwamba wanasali ili wapate roho takatifu wanapozungumzia mambo yanayohusu kutaniko. Pia, wanachunguza kwa makini kanuni za Biblia zinazohusika na kupitia miongozo inayoandaliwa na tengenezo la Yehova. Tamaa yao ya kutoka moyoni ni kumfurahisha Yehova na kuwatunza watu wake kwa njia bora kabisa. Wanaume hao waaminifu wanajua kwamba wanawajibika mbele za Mungu kwa njia wanayotimiza majukumu yao. (1 Pet. 5:2, 3) Fikiria jambo hili, katika ulimwengu uliogawanyika kwa misingi ya jamii, dini, na siasa, watu wa Yehova wameunganishwa katika ibada ya Mungu mmoja wa kweli. Hilo linawezekana kwa sababu Yehova anabariki tengenezo lake!

12. Ni lazima wazee wachunguze mambo gani ili kutambua ikiwa mtu ametubu?

¹² Yehova amewakabidhi wazee wa kutaniko jukumu zito la kutunza usafi wa kutaniko. Ikiwa Mkristo anatenda dhambi nzito, Yehova anatarajia wazee wachunguze ikiwa mtu huyo anaweza kubaki kutanikoni. Jambo lingine ni kwamba wanahitaji kuhakikisha kuwa mtu huyo ametubu kikweli kwa dhambi aliyofanya. Huenda akadai kwamba ametubu, lakini kwa kweli, je, anachukia jambo alilofanya? Ikiwa kushirikiana na watu wabaya kulisababisha afanye dhambi hiyo, je, yuko tayari kuacha kushirikiana nao? Wazee wanasali na kuchunguza mambo hayo wakitumia Maandiko, wakizingatia mtazamo wa mtenda dhambi kuelekea jambo alilofanya. Kisha, wanaamua ikiwa mtenda dhambi anaweza kubaki kutanikoni. Katika visa fulani, ni lazima atengwe na ushirika.​—1 Kor. 5:11-13.

13. Huenda tukahangaishwa na jambo gani ikiwa rafiki yetu au mtu wa ukoo ametengwa na ushirika?

¹³ Uhakika wetu katika wazee wa kutaniko unaweza kujaribiwaje? Ikiwa mtu aliyetengwa na ushirika si rafiki yetu wa karibu au mtu wa ukoo, huenda ikawa rahisi kuunga mkono uamuzi wa wazee. Lakini tuseme mtu aliyetengwa na ushirika ni rafiki yetu wa karibu. Huenda tukafikiri kwamba wazee wa kutaniko hawakuchunguza habari zote, au tukajiuliza ikiwa kweli walimhukumu kwa njia ambayo Yehova angemhukumu. Ni nini kinachoweza kutusaidia kudumisha mtazamo unaofaa kuelekea uamuzi wao?

14. Ni nini kinachoweza kutusaidia ikiwa uamuzi wa wazee wa kutaniko kuhusu mtenda dhambi unatuhusu sisi binafsi?

¹⁴ Tunapaswa kukumbuka kwamba kutenga na ushirika ni mpango wa Yehova, na hulinufaisha kutaniko na huenda ukamnufaisha mtenda dhambi. Ikiwa mtenda dhambi asiyetubu ataruhusiwa kubaki kutanikoni, anaweza kuwashawishi wengine watende dhambi. (Gal. 5:9) Pia, huenda asitambue uzito wa dhambi yake, na huenda asichochewe kubadili njia yake ya kufikiri na matendo yake ili aweze tena kupata kibali cha Yehova. (Mhu. 8:11) Tunaweza kuwa na hakika kwamba wanapochunguza ikiwa mtu anapaswa kutengwa na ushirika, wazee huchukua jukumu hilo kwa uzito. Wanatambua kwamba kama waamuzi katika Israeli la kale, ‘hawahukumu kwa ajili ya mwanadamu bali kwa ajili ya Yehova.’​—2 Nya. 19:6, 7.

KUMTUMAINI YEHOVA SASA KUNATUZOEZAJE KWA AJILI YA WAKATI UJAO?

15. Kwa nini tunahitaji kutumaini mwongozo wa Yehova sasa kuliko wakati mwingine wowote?

¹⁵ Mwisho wa mfumo huu wa mambo unapozidi kukaribia, tunahitaji kuwa na uhakika hata zaidi kwamba njia ya Yehova ya kufanya mambo ndiyo bora. Kwa nini? Wakati wa dhiki kuu, huenda tutapata maagizo ambayo yatatushangaza, tukaona kwamba haiwezekani kuyafuata, au hayapatani na akili. Bila shaka, Yehova hatazungumza nasi moja kwa moja. Inaelekea atatoa miongozo kupitia wanaume waliowekwa rasmi. Huo si wakati wa kutilia shaka mwongozo wao, au kujiuliza, ‘Je, kweli huu ni mwongozo wa Yehova, au hayo ni maoni binafsi ya ndugu wanaoongoza?’ Je, utamtumaini Yehova na tengenezo lake pindi hiyo muhimu? Huenda jibu lako likaonekana kupitia jinsi unavyoona mwongozo wa kitheokrasi sasa. Ikiwa unautumaini mwongozo tunaoupata leo na uko tayari kutii, inaelekea utafanya vivyo hivyo wakati wa dhiki kuu.​—Luka 16:10.

16. Uhakika wetu katika hukumu za Yehova utajaribiwaje hivi karibuni?

¹⁶ Kuna jambo lingine ambalo tungependa kuzungumzia, yaani, hukumu ambazo Yehova atatoa mwishoni mwa mfumo huu wa mambo. Kwa sasa, tunatumaini kwamba watu wengi ambao hawamtumikii Yehova, kutia ndani watu wetu wa ukoo wataanza kumtumikia kabla ya mwisho kufika. Lakini wakati wa Har–Magedoni, Yehova kupitia Yesu atafanya uamuzi wa mwisho kuhusu wakati wao ujao. (Mt. 25:31-33; 2 The. 1:7-9) Halitakuwa jukumu letu kuamua ni nani atakayestahili kupata rehema ya Yehova. (Mt. 25:34, 41, 46) Je, tutazitumaini hukumu za Yehova, au zitatukwaza? Ni wazi kwamba tunahitaji kuimarisha uhakika wetu katika Yehova sasa ili tumtumaini kikamili wakati ujao.

17. Tutanufaikaje kutokana na hukumu za Yehova mwishoni mwa mfumo huu wa mambo?

¹⁷ Wazia jinsi tutakavyohisi katika ulimwengu mpya wa Mungu tutakapoona matokeo ya hukumu za Yehova. Hakutakuwa na dini za uwongo, mifumo ya kibiashara yenye pupa, pamoja na mifumo ya kisiasa ambayo imewakandamiza watu na kusababisha taabu nyingi katika historia yote ya wanadamu. Magonjwa, uzee, pamoja na vifo vya wapendwa wetu havitakuwa tena sehemu ya maisha yetu ya kila siku. Shetani na roho waovu watazuiliwa kwa miaka elfu moja. Matokeo ya uasi wao hayatakuwepo. (Ufu. 20:2, 3) Tutafurahi sana kwamba tulitumaini njia ya Yehova ya kufanya mambo!

18. Tunajifunza masomo gani kutokana na mfano wa Waisraeli unaotajwa kwenye Hesabu 11:4-6 na 21:5?

¹⁸ Je, maisha katika ulimwengu mpya yatasababisha changamoto zinazoweza kujaribu uhakika wetu katika njia ya Yehova ya kufanya mambo? Kwa mfano, fikiria mambo yaliyotokea muda mfupi baada ya Waisraeli kukombolewa kutoka utumwani Misri. Baadhi ya Waisraeli walianza kulalamika kwa sababu walikosa chakula walichofurahia huko Misri, na kudharau maandalizi ya Yehova ya mana. (Soma Hesabu 11:4-6; 21:5.) Je, tunaweza kuwa na mawazo kama hayo baada ya kuokoka dhiki kuu? Hatujui kutakuwa na kazi kubwa kadiri gani ili kuondoa matokeo ya uharibifu, na hatua kwa hatua kuifanya dunia kuwa paradiso. Inaelekea mwanzoni kutakuwa na kazi kubwa ya kufanya na huenda maisha hayatakuwa rahisi. Je, tutathubutu kulalamika kuhusu maandalizi ambayo Yehova ataandaa wakati huo? Jambo moja ni hakika: Kadiri tunavyothamini zaidi maandalizi ya Yehova sasa, kuna uwezekano mkubwa tutafanya hivyo pia wakati huo.

19. Unaweza kuelezaje kwa ufupi mambo makuu ya makala hii?

¹⁹ Sikuzote njia ya Yehova ya kufanya mambo ndiyo bora. Tunapaswa kusadiki kabisa jambo hilo. Pia, tunahitaji kuwa na uhakika katika wale ambao Yehova anawatumia kutekeleza maagizo yake. Usisahau kamwe maneno ambayo Yehova alimwambia nabii Isaya: “Mtakuwa na nguvu mkiendelea kuwa watulivu na kuwa na tumaini.”​—Isa. 30:15.