Endelea Kulithamini Zaidi Tengenezo la Yehova

1. Watu wa Yehova walipangwa jinsi gani katika karne ya kwanza?

WAKATI wowote Yehova anapowapa watu wake mgawo, anatarajia wautimize mgawo huo kwa utaratibu mzuri. (1 Kor. 14:33) Kwa mfano, ni mapenzi ya Mungu kwamba habari njema ihubiriwe duniani kote. (Mt. 24:14) Yehova amemweka rasmi Yesu asimamie kazi hiyo. Yesu amehakikisha kwamba kazi hiyo inafanywa kwa utaratibu mzuri. Katika karne ya kwanza, makutaniko yalipokuwa yakianzishwa katika maeneo mbalimbali, wazee wa makutaniko waliwekwa rasmi ili kutoa mwelekezo na kuwaongoza watu wa Mungu. (Mdo. 14:23) Baraza linaloongoza jijini Yerusalemu ambalo lilitia ndani mitume na baadhi ya wazee wenye uzoefu, lilifanya maamuzi fulani ambayo makutaniko yote yangeyatii. (Mdo. 15:2; 16:4) Kwa kuwa ndugu na dada walitii maagizo waliyopokea, “makutaniko yakaendelea kuimarishwa katika imani na kuongezeka idadi.”—Mdo. 16:5.

2. Tangu mwaka wa 1919, Yehova amewaongozaje watu wake na kuwapa chakula cha kiroho?

² Yehova anaendelea kuwapanga watu wake kwa utaratibu mzuri hata leo. Tangu mwaka wa 1919, Yesu ametumia kikundi kidogo cha wanaume watiwa-mafuta ili kupanga kazi ya kuhubiri na kuwapa wafuasi wake chakula cha kiroho kwa wakati unaofaa.a (Luka 12:42) Ni wazi kwamba Yehova anabariki kazi ya kikundi hicho.—Isa. 60:22; 65:​13, 14.

3-4. (a) Toa mfano unaoonyesha jinsi tunavyonufaika kwa sababu ya kupangwa kwa utaratibu mzuri. (b) Tutachunguza nini katika makala hii?

³ Ikiwa hatungepangwa kwa utaratibu mzuri, hatungeweza kukamilisha kazi ambayo Yesu ametuagiza tufanye. (Mt. 28:​19, 20) Kwa mfano, fikiria ikiwa makutaniko hayangepangiwa maeneo ya kuhubiri; kila mtu angehubiri popote alipotaka. Hivyo, huenda baadhi ya maeneo yangehubiriwa tena na tena na wahubiri mbalimbali, lakini maeneo mengine hayangehubiriwa kamwe. Je, unaweza kufikiria njia nyingine ambazo tunanufaika kwa sababu tumepangwa kwa utaratibu mzuri?

⁴ Kama Yesu alivyowapanga wafuasi wake kwa utaratibu mzuri alipokuwa duniani, ndivyo anavyoendelea kuwapanga watu wa Mungu leo. Katika makala hii, tutachunguza mfano ambao Yesu alituwekea, na jinsi tengenezo letu linavyofuata mfano huo. Pia, tutazungumzia jinsi tunavyoweza kuonyesha kwamba tunalithamini tengenezo la Yehova.

TENGENEZO LETU LINAFUATA MFANO WA YESU

5. Ni njia gani moja inayoonyesha kwamba tunafuata mfano wa Yesu? (Yohana 8:28)

⁵ Yesu alijifunza kutoka kwa Baba yake wa mbinguni mambo ya kufanya na kusema. Tengenezo la Yehova hufuata mfano wa Yesu kwa kutumia Neno la Mungu kutupatia mwongozo na kutusaidia kujua mambo yanayofaa na yasiyofaa. (Soma Yohana 8:28; 2 Tim. 3:​16, 17) Tunakumbushwa mara kwa mara tusome na kutumia Neno la Mungu. Kufuata ushauri huo kunatunufaishaje?

6. Tunaweza kunufaika kwa njia gani moja muhimu tunapojifunza Biblia?

⁶ Tunanufaika sana tunapojifunza Biblia kwa msaada wa machapisho yetu. Kwa mfano, tunaweza kulinganisha mafundisho ya Biblia na mwongozo tunaopokea kutoka kwenye tengenezo la Yehova. Tunapoona kwamba mwongozo tunaopokea unategemea Maandiko, tunalitumaini zaidi tengenezo la Yehova.—Rom. 12:2.

7. Yesu alihubiri ujumbe gani, na tengenezo la Yehova linaigaje mfano wake?

⁷ Yesu alihubiri “habari njema ya Ufalme wa Mungu.” (Luka 4:​43, 44) Pia, Yesu aliwaamuru wanafunzi wake wahubiri kuhusu Ufalme. (Luka 9:​1, 2; 10:​8, 9) Leo, watu wote wanaoshirikiana na tengenezo la Yehova wanahubiri ujumbe wa Ufalme haidhuru mahali wanapoishi au majukumu waliyo nayo katika tengenezo.

8. Tumepewa pendeleo gani?

⁸ Tunaliona kuwa pendeleo kubwa kuwahubiria wengine ujumbe wa Ufalme wa Mungu! Lakini si kila mtu ana pendeleo hilo. Kwa mfano, Yesu alipokuwa duniani, hakuwaruhusu roho waovu watoe ushahidi kumhusu. (Luka 4:41) Leo, kabla mtu hajaanza kushiriki katika huduma na watu wa Yehova, ni lazima awe amestahili pendeleo hilo. Tunaonyesha jinsi tunavyolithamini pendeleo hilo kwa kujitahidi kuwaambia watu kuhusu Ufalme wa Mungu mahali popote na wakati wowote. Kama Yesu, lengo letu ni kupanda na kuzitia maji mbegu za kweli ya Ufalme katika mioyo ya watu.—Mt. 13:​3, 23; 1 Kor. 3:6.

9. Tengenezo la Yehova limejulishaje watu jina la Mungu?

⁹ Yesu aliwajulisha watu jina la Mungu. Aliposali kwa Baba yake wa mbinguni, Yesu alisema hivi: “Nimewajulisha jina lako.” (Yoh. 17:26) Tengenezo la Yehova huiga mfano wa Yesu kwa kufanya yote wanayoweza ili kuwasaidia wengine walijue jina la Mungu. Njia moja ambayo tengenezo la Mungu limefanya hivyo ni kupitia Biblia Takatifu—Tafsiri ya Ulimwengu Mpya ambayo imerudisha jina la Mungu mahali pake panapofaa. Tafsiri hii ya Biblia sasa inapatikana katika lugha zaidi ya 270 ikiwa nzima au kwa sehemu. Katika Nyongeza A4 na A5 ya tafsiri hii, utapata maelezo ya ziada kuhusu kurudishwa kwa jina la Mungu katika Biblia. Nyongeza C, ambayo inapatikana katika Biblia ya Kujifunzia ya Kiingereza, inaonyesha uthibitisho zaidi kwamba jina la Mungu linapaswa kupatikana katika Maandiko ya Kigiriki ya Kikristo mara 237.

10. Tunajifunza nini kutokana na maneno aliyosema mwanamke anayeishi nchini Myanmar?

¹⁰ Kama Yesu, tunataka kuwasaidia watu wengi iwezekanavyo wajue jina la Mungu. Mwanamke mwenye umri wa miaka 67, anayeishi nchini Myanmar alipojifunza kwamba Mungu ana jina, alitokwa na machozi na kusema hivi: “Hii ndiyo mara ya kwanza maishani mwangu kusikia kwamba Mungu anaitwa Yehova. . . . Kati ya mambo yote niliyowahi kujifunza maishani, hili ndilo jambo muhimu zaidi.” Kama kisa hicho kinavyoonyesha, kujifunza kuhusu jina la Mungu kunaweza kuwa na matokeo makubwa sana kwa watu wenye mioyo minyoofu.

ENDELEA KULITHAMINI TENGENEZO LETU

11. Wazee wa kutaniko wanaweza kuonyeshaje kwamba wanalithamini tengenezo la Yehova? (Tazama pia picha.)

¹¹ Ni njia gani moja ambayo wazee wa kutaniko wanaweza kuonyesha kwamba wanalithamini tengenezo la Mungu? Wanapopokea mwongozo, wanahitaji kuusoma kwa makini na kisha kufanya yote wawezayo kuufuata. Kwa mfano, wazee wa kutaniko wanapokea mwongozo wa jinsi ya kutimiza sehemu mbalimbali za mikutano, jinsi ya kutoa sala kwa niaba ya kutaniko, na pia jinsi ya kuwatunza kondoo wa Kristo. Wazee wa kutaniko wanaofuata mwongozo wa tengenezo wanawasaidia wale walio chini ya utunzaji wao wahisi wanapendwa na wako salama.

12. (a) Kwa nini tunapaswa kushirikiana na wale wanaoongoza? (Waebrania 13:​7, 17) (b) Kwa nini tunapaswa kukazia fikira sifa nzuri za wale wanaoongoza?

¹² Tunapopokea mwongozo kutoka kwa wazee wa kutaniko, tunapaswa kuufuata kwa hiari. Tunapofanya hivyo, inakuwa rahisi kwa wale wanaoongoza kufanya kazi yao. Biblia inatutia moyo tuwanyenyekee na kuwatii wale wanaoongoza. (Soma Waebrania 13:​7, 17.) Wakati mwingine jambo hilo linaweza kuwa changamoto. Kwa nini? Kwa sababu wazee wa kutaniko si wakamilifu. Hata hivyo, ikiwa tutakazia fikira sifa zao mbaya badala ya sifa zao nzuri, tutakuwa tukiwasaidia maadui wetu. Katika njia gani? Tutaacha kulitumaini tengenezo la Mungu, jambo ambalo wale wanaotupinga wanataka tufanye. Ni njia gani hususa itakayotusaidia kutambua na kukataa maneno ya uwongo ya adui zetu?

USIRUHUSU WENGINE WADHOOFISHE UTHAMINI WAKO KUELEKEA TENGENEZO LA YEHOVA

13. Maadui wa Mungu wamejaribu jinsi gani kulishushia heshima tengenezo la Yehova?

¹³ Wapinzani wa Mungu wanajaribu kufanya mambo mazuri kuhusu tengenezo la Yehova yaonekane kuwa mabaya. Kwa mfano, tumejifunza katika Maandiko kwamba Yehova anatarajia waabudu wake wawe safi kimwili, kiadili, na kiroho. Anasema kwamba yeyote anayeendelea kufanya mambo machafu bila kutubu anapaswa kuondolewa katika kutaniko. (1 Kor. 5:​11-13; 6:​9, 10) Tunatii amri hiyo ya Kimaandiko. Lakini wapinzani wetu wanajaribu kutumia amri hiyo kutushutumu kwamba hatuwapendi watu, tunawahukumu, na kuwabagua watu ambao ni tofauti nasi.

14. Ni nani chanzo cha habari za uwongo kuhusu tengenezo la Yehova?

¹⁴ Tambua chanzo cha mashambulizi. Chanzo cha maneno hayo yote ya uwongo ni Shetani Ibilisi. Yeye ndiye “baba ya uwongo.” (Yoh. 8:44; Mwa. 3:​1-5) Hivyo, tunapaswa kutarajia kwamba Shetani atawatumia wale wanaomuunga mkono kuendeleza habari hizo za uwongo kuhusu tengenezo la Yehova. Jambo hilo lilitokea katika karne ya kwanza.

15. Viongozi wa dini walimfanyia nini Yesu na wafuasi wake?

¹⁵ Ingawa Yesu, Mwana wa Mungu, alikuwa mkamilifu na alifanya miujiza mingi mikubwa, Shetani aliwatumia baadhi ya watu kueneza uwongo mwingi kumhusu. Kwa mfano, viongozi wa dini waliwaambia watu kwamba nguvu za kuwaondoa roho waovu ambazo Yesu alikuwa nazo, zilitoka kwa “mtawala wa roho waovu.” (Marko 3:22) Yesu alipokuwa akihukumiwa, viongozi wa dini walimshtaki kuwa mkufuru na wakaushawishi umati wa watu uombe Yesu auawe. (Mt. 27:20) Baadaye, wafuasi wa Kristo walipokuwa wakihubiri habari njema, wale waliowapinga ‘wakawachochea watu na kuwafanya wawachukie’ Wakristo na kuwatesa. (Mdo. 14:​2, 19) Gazeti la Mnara wa Mlinzi la Desemba 1, 1998 linasema hivi kuhusu Matendo 14:2: “Kwa kutoridhika na kukataa kwao wenyewe ujumbe huo, Wayahudi wapinzani walianza kampeni ya mashtaka yasiyoweza kuthibitishwa, wakijaribu kuwafanya wasio Wayahudi wawabague Wakristo.”

16. Tunapaswa kukumbuka nini tukisikia habari za uwongo?

¹⁶ Shetani hajaacha kudanganya. Leo, bado anaendelea ‘kuipotosha dunia nzima inayokaliwa.’ (Ufu. 12:9) Ukisikia habari za uwongo kuhusu tengenezo la Yehova au ndugu wanaoongoza, kumbuka jinsi maadui wa Mungu walivyomtendea Yesu na wanafunzi wa karne ya kwanza. Leo, watu wa Yehova wanateswa na kusingiziwa mambo ya uwongo kama tu Biblia ilivyotabiri. (Mt. 5:​11, 12) Hatutaamini habari za uwongo ikiwa tutatambua chanzo cha habari hizo na kuchukua hatua za kujilinda haraka iwezekanavyo. Tunapaswa kuchukua hatua gani?

17. Tunawezaje kuepuka kuathiriwa na habari za uwongo? (2 Timotheo 1:13) (Tazama pia sanduku “Tuchukue Hatua Gani Tunaposikia Habari za Uwongo?”)

¹⁷ Kataa habari za uwongo. Mtume Paulo alitupatia maagizo yaliyo wazi ya mambo ya kufanya tunaposikia habari za uwongo. Paulo alimwambia Timotheo kwamba ‘awaamuru watu fulani wasisikilize hadithi za uwongo’ na ‘wakatae hadithi za uwongo zisizo na heshima.’ (1 Tim. 1:​3, 4; 4:7) Ingawa huenda mtoto akachukua kitu fulani kichafu kutoka sakafuni na kuanza kula, mtu mzima anayetambua hatari hawezi kamwe kufanya hivyo. Tunakataa habari za uwongo kwa sababu tunajua chanzo cha habari hizo. Hivyo, tunasikiliza tu “maneno yenye manufaa” ya kweli.—Soma 2 Timotheo 1:13.

18. Tunawezaje kuonyesha kwamba tunalithamini tengenezo la Yehova?

¹⁸ Tumechunguza njia tatu kati ya nyingi ambazo tengenezo la Mungu linamwiga Yesu. Kadiri unavyojifunza Biblia, jitahidi kutafuta njia nyingine zinazoonyesha jinsi tengenezo la Mungu linavyofuata mfano wa Yesu. Wasaidie wengine katika kutaniko lako walithamini zaidi tengenezo la Yehova. Endelea kuonyesha uthamini wako kwa kumtumikia Yehova kwa ushikamanifu na kushikamana kikamili na tengenezo analotumia ili kutimiza mapenzi yake. (Zab. 37:28) Acheni tuendelee kuthamini pendeleo tulilo nalo la kushirikiana na watu wa Yehova wenye upendo na washikamanifu.