Msamaha wa Yehova Unamaanisha Nini Kwako?

1. Kwa nini ni vigumu kujua mtu anamaanisha nini anaposema amekusamehe?

“NIMEKUSAMEHE.” Maneno hayo yanaweza kuburudisha hasa ikiwa unajua kwamba umesema au umefanya jambo ambalo lilimuumiza mtu fulani! Lakini maneno “nimekusamehe” yanamaanisha nini hasa? Je, mtu huyo uliyemuumiza anamaanisha kwamba urafiki wenu umerudi kikamili? Au je, anamaanisha tu kwamba hataki kuzungumzia tena jambo hilo? Watu wanaweza kumaanisha mambo mengi tofauti wanaposema wamekusamehe.

2. Msamaha wa Yehova umefafanuliwaje katika Maandiko? (Tazama pia maelezo ya chini.)

² Jinsi Yehova anavyowasamehe wanadamu wasio wakamilifu ni tofauti sana na jinsi tunavyowasamehe wengine. Msamaha ambao Yehova hutoa ni wa pekee. Mtunga zaburi alisema hivi kumhusu Yehova: “Wewe hutoa msamaha wa kweli, ili watu wakuhofu.”a (Zab. 130:4) Naam, msamaha wa Yehova ni “msamaha wa kweli.” Yeye ndiye anayetuonyesha msamaha wa kweli unamaanisha nini hasa. Katika visa fulani, waandishi wa Biblia walifafanua njia ya Yehova ya kusamehe kwa kutumia neno la Kiebrania ambalo hawakulitumia kamwe, walipoelezea njia ya wanadamu ya kusamehe.

3. Msamaha wa Yehova unatofautianaje na wa wanadamu? (Isaya 55:​6, 7)

³ Yehova anapomsamehe mtu, anafuta kabisa dhambi zake. Uhusiano huo ulioharibika unarudishwa kikamili. Tunashukuru kwamba Yehova anatusamehe kikamili na kwa ukarimu.—Soma Isaya 55:​6, 7.

4. Yehova anatusaidiaje kuelewa maana ya msamaha wa kweli?

⁴ Ikiwa msamaha wa Yehova unatofautiana na wa wanadamu, sisi tukiwa wanadamu wasio wakamilifu tunawezaje kuelewa maana ya msamaha wa kweli? Yehova anatumia mifano mizuri ili kutusaidia kuelewa jinsi anavyotusamehe. Katika makala hii, tutachunguza baadhi ya mifano hiyo. Itatuonyesha jinsi Yehova anavyoondoa dhambi, na wakati huohuo, kurudisha uhusiano ulioharibiwa na dhambi. Tunapochunguza mifano hiyo, tutaimarisha upendo na uthamini wetu kwa Baba yetu mwenye fadhili na rehema, ambaye anatusamehe kwa njia nyingi.

YEHOVA HUONDOA DHAMBI

5. Ni nini kinachotokea Yehova anapotusamehe dhambi zetu?

⁵ Katika Biblia, mara nyingi dhambi hulinganishwa na mizigo mizito. Mfalme Daudi alieleza hivi kuhusu dhambi zake: “Dhambi zangu zimetanda juu ya kichwa changu; kama mzigo mzito, ni nzito sana siwezi kuzibeba.” (Zab. 38:4) Lakini Yehova husamehe dhambi za wakosaji wanaotubu. (Zab. 25:18; 32:5) Neno la Kiebrania linalotafsiriwa “kusamehe” kimsingi linamaanisha “kuinua” au “kubeba.” Kwa njia ya mfano, huenda tukamwazia Yehova akiwa mwanamume mwenye nguvu ambaye anainua mzigo wa dhambi kutoka kwenye mabega yetu na kuuondoa.

6. Yehova anaziweka dhambi zetu umbali gani kutoka kwetu?

⁶ Mfano mwingine unaonyesha jinsi Yehova anavyopeleka dhambi zetu mbali sana na sisi. Zaburi 103:12 inatuambia hivi: “Kama mashariki ilivyo mbali sana na magharibi, ndivyo alivyoweka dhambi zetu mbali sana na sisi.” Mashariki iko mbali sana na magharibi. Pande hizo mbili haziwezi kukutana kamwe. Kwa maneno mengine, Yehova anapeleka dhambi zetu mbali sana kuliko tunavyoweza kuwazia. Hilo linatuhakikishia kwamba Yehova anatusamehe kikamili!

7. Biblia inafafanuaje jinsi Yehova anavyoshughulikia dhambi zetu? (Mika 7:​18, 19)

⁷ Ingawa Yehova anapeleka dhambi zetu mbali sana nasi kwa njia ya mfano, je, anaendelea kuzishikilia? Hapana. Mfalme Hezekia aliandika hivi kumhusu Yehova: “Umezitupa dhambi zangu zote nyuma ya mgongo wako.” Au kama maelezo ya chini yanavyosema, “umeziondoa dhambi zangu zote kutoka mbele ya macho yako.” (Isa. 38:​9, 17; maelezo ya chini.) Mfano huo unaonyesha kwamba Yehova anazitupa mbali dhambi za mkosaji aliyetubu na haziangalii tena. Maneno hayo yanaweza kusemwa hivi pia: “Umefanya [dhambi zangu] ziwe kana kwamba hazikuwepo.” Biblia inakazia zaidi jambo hilo kupitia mfano mwingine unaotajwa katika Mika 7:​18, 19. (Soma.) Mistari hiyo inasema kwamba Yehova anazitupa dhambi zetu katika vilindi vya bahari. Katika nyakati za kale, isingekuwa rahisi kwa mtu kupata tena kitu ambacho kimezama kwenye vilindi vya bahari.

8. Tumejifunza nini kufikia hapa?

⁸ Kwa kutumia mifano hiyo, tumejifunza kwamba Yehova anapotusamehe, anatuondolea mzigo wa dhambi zetu. Kama Daudi alivyosema, “wenye furaha ni wale ambao matendo yao ya kuasi sheria yamesamehewa na ambao dhambi zao zimefunikwa; mwenye furaha ni mtu ambaye Yehova hatahesabu dhambi yake kamwe.” (Rom. 4:​7, 8) Huo ni msamaha wa kweli!

YEHOVA HUFUTA DHAMBI

9. Yehova anatumia mfano gani kufafanua kiwango cha msamaha wake?

⁹ Yehova anatumia mifano mingine kutusaidia kuthamini jinsi anavyofuta dhambi za wakosaji wanaotubu, kupitia dhabihu ya fidia. Kwa njia ya mfano, Yehova anatajwa kuwa anaosha na kusafisha dhambi hizo. Matokeo ni kwamba mtenda dhambi anatakaswa. (Zab. 51:7; Isa. 4:4; Yer. 33:8) Yehova mwenyewe anafafanua hivi matokeo hayo: “Ingawa dhambi zenu ni kama rangi nyekundu, zitafanywa kuwa nyeupe kama theluji; ingawa ni nyekundu kama kitambaa chekundu, zitakuwa kama sufu.” (Isa. 1:18) Ni vigumu sana kuondoa doa la rangi nyekundu kwenye nguo. Hata hivyo, kupitia mfano huo, Yehova anatuhakikishia kwamba dhambi zetu zinaweza kuoshwa kabisa hivi kwamba hazionekani tena.

10. Ni mfano gani mwingine ambao Yehova anautumia kuelezea kiwango cha msamaha wake?

¹⁰ Kama ilivyotajwa kwenye makala iliyotangulia, dhambi zinafananishwa pia na “madeni.” (Mt. 6:12; Luka 11:4) Hivyo, kila tunapomtendea dhambi Yehova, ni kana kwamba deni letu linaongezeka na kuwa kubwa zaidi. Tuna deni kubwa sana! Lakini Yehova anapotusamehe, ni kana kwamba anasamehe deni letu. Hatulazimishi tulipie dhambi ambazo tayari ametusamehe. Huo ni mfano wenye kuburudisha unaoelezea kitulizo tunachopata Yehova anapotusamehe!

11. Biblia inamaanisha nini inaposema kwamba dhambi zetu ‘zimefutwa’? (Matendo 3:19)

¹¹ Yehova anasamehe madeni au dhambi zetu, na pia anazifuta. (Soma Matendo 3:19.) Deni linaposamehewa, huenda tukawazia mtu akichora alama kubwa ya X mahali ambapo deni letu liliandikwa. Hata hivyo, namba zilizo chini ya alama ya X huenda bado zikaonekana. Lakini kufuta kitu ni tofauti. Ili kuelewa mfano huo, tunahitaji kukumbuka kwamba wino uliotumika katika nyakati za kale ulikuwa mchanganyiko wa kaboni, utomvu, na maji. Mtu angeweza kutumia sifongo (sponji) iliyolowa ili kufuta maandishi. Hivyo, deni “lilipofutwa,” lilipotea kabisa. Watu hawangeweza kuona maandishi yaliyokuwepo awali. Ni kana kwamba deni hilo halikuwepo. Tunafurahi sana kujua kwamba Yehova anasamehe na pia anafuta kabisa dhambi zetu!—Zab. 51:9.

12. Mfano kuhusu wingu zito unatufundisha nini?

¹² Yehova anatumia mfano mwingine kuelezea jinsi anavyofuta dhambi. Anatangaza hivi: “Nitayafuta kabisa makosa yako kama kwa wingu na dhambi zako kama kwa wingu zito.” (Isa. 44:22) Yehova anaposamehe, ni kana kwamba anatumia wingu zito kuficha dhambi zetu ili zisionekane kabisa.

13. Tunahisije Yehova anapotusamehe dhambi zetu?

¹³ Mifano tuliyozungumzia inatufundisha nini? Yehova anapotusamehe dhambi zetu, hatupaswi kuhisi kwamba tutaendelea kuwa na doa la dhambi hizo katika maisha yetu yote. Kupitia damu ya Yesu Kristo, madeni yetu yanasamehewa kabisa. Yehova anapotusamehe dhambi ni kana kwamba hatukuwahi kuifanya. Huo ndio msamaha wa kweli tunaopata kutoka kwa Yehova tunapotubu dhambi zetu.

YEHOVA HURUDISHA UHUSIANO MZURI PAMOJA NASI

14. Kwa nini tunaweza kuamini kwamba Yehova anatusamehe kikamili? (Tazama pia picha.)

¹⁴ Msamaha wa kweli unaotoka kwa Yehova unatuwezesha kuwa na uhusiano mzuri pamoja naye. Unatusaidia kuepuka kulemewa na hisia za hatia. Hatuhitaji kuogopa kwamba Yehova ametuwekea kinyongo kisiri na anatafuta njia ya kutuadhibu. Hilo haliwezi kutokea kamwe. Kwa nini tunaweza kumwamini Yehova anaposema kwamba ametusamehe? Nabii Yeremia anamnukuu Yehova akisema hivi: “Nitalisamehe kosa lao, nami sitaikumbuka tena dhambi yao.” (Yer. 31:34) Mtume Paulo alitumia msemo unaofanana aliporejelea maneno hayo, alisema hivi: “Sitazikumbuka tena dhambi zao.” (Ebr. 8:12) Hilo linamaanisha nini hasa?

15. Ni katika maana gani Yehova hakumbuki tena dhambi zetu?

¹⁵ Katika Biblia, neno “kukumbuka” sikuzote halirejelei kukumbuka au kufikiria jambo fulani lililotokea zamani. Badala yake, linaweza kuhusisha kuchukua hatua fulani. Mhalifu aliyekuwa ametundikwa kwenye mti kando ya Yesu alimwambia hivi: “Yesu, unikumbuke utakapoingia katika Ufalme wako.” (Luka 23:​42, 43) Hakuwa tu akimwomba Yesu amfikirie wakati huo. Jibu la Yesu lilionyesha kwamba angechukua hatua ya kumfufua mhalifu huyo. Hivyo, Yehova anaposema kwamba hakumbuki tena dhambi zetu, anamaanisha kuwa hatachukua hatua dhidi yetu. Hatatuadhibu wakati ujao kwa sababu ya dhambi ambazo tayari ametusamehe.

16. Biblia inafafanuaje uhuru unaotokana na msamaha wa kweli?

¹⁶ Biblia inatumia mfano mwingine unaotusaidia kuelewa uhuru unaotokana na msamaha wa kweli. Kwa sababu ya mwelekeo wetu wa kutenda dhambi, tunalinganishwa na “watumwa wa dhambi.” Lakini tunashukuru kwamba kwa sababu ya msamaha wa Yehova, sisi ni kama watumwa “[waliowekwa] huru kutoka katika dhambi.” (Rom. 6:​17, 18; Ufu. 1:5) Naam, msamaha wa Yehova unatupatia hisia za shangwe za kuwekwa huru kutokana na utumwa.

17. Msamaha unatusaidiaje kuponywa? (Isaya 53:5)

¹⁷ Soma Isaya 53:5. Mfano wa mwisho tutakaozungumzia unatulinganisha na watu wenye ugonjwa mbaya sana. Kwa sababu ya dhabihu ya fidia ambayo Yehova ameiandaa kupitia Mwana wake, kwa njia ya mfano tunatajwa kuwa tumeponywa. (1 Pet. 2:24) Kwa sababu ya fidia, uhusiano wetu mzuri pamoja na Yehova ambao uliharibiwa na ugonjwa wa kiroho, unaweza kurudishwa. Kama mtu aliyeponywa ugonjwa mbaya anavyohisi shangwe nyingi, sisi pia tunashangilia tunapoponywa kiroho na kupata tena kibali cha Yehova kwa sababu ya msamaha wake.

MSAMAHA WA YEHOVA UNAMAANISHA NINI KWETU?

18. Tumejifunza nini kwa kuchunguza mifano iliyo katika Biblia kuhusu msamaha wa Yehova? (Tazama pia sanduku “Jinsi Yehova Anavyotusamehe.”)

¹⁸ Tumejifunza nini kwa kuchunguza mifano iliyo katika Biblia kuhusu msamaha wa Yehova? Yehova anaposamehe, anafanya hivyo kikamili na tunaweza kuwa na uhakika kwamba hatatuadhibu wakati ujao kwa mambo ambayo tayari ametusamehe. Hilo linatuwezesha kuwa na uhusiano mzuri pamoja na Baba yetu wa mbinguni. Hata hivyo, tunakumbuka kwamba msamaha wa kweli ni zawadi. Unatokana na upendo wa Yehova na fadhili zake zisizostahiliwa, anazowaonyesha wanadamu watenda dhambi. Wanadamu hawawezi kudai kwamba hiyo ni haki yao.—Rom. 3:24.

19. (a) Tunapaswa kushukuru kwa sababu ya jambo gani? (Waroma 4:8) (b) Tutachunguza nini katika makala inayofuata?

¹⁹ Soma Waroma 4:8. Tunapaswa kushukuru sana kwamba Yehova ni Mungu anayetoa “msamaha wa kweli”! (Zab. 130:4) Hata hivyo, ili tusamehewe kuna jambo muhimu ambalo ni lazima tufanye. Yesu alisema hivi: “Msipowasamehe watu makosa yao, naye Baba yenu hatawasamehe makosa yenu.” (Mt. 6:​14, 15) Hivyo, ni wazi kwamba ni lazima tumwige Yehova na kuwasamehe wengine. Katika makala inayofuata tutaona jinsi tunavyoweza kufanya hivyo.