Iga Bidii ya Yesu ya Kuhubiri

1. Taja sifa moja inayowatofautisha watu wa Yehova na watu wengine wanaodai kuwa Wakristo.

JAMBO moja linalowatofautisha watumishi wa Yehova na watu wanaodai kuwa Wakristo ni bidiia yao katika huduma. (Tito 2:14) Hata hivyo, nyakati fulani huenda ikawa vigumu kuwa na shauku ya kuhubiri. Labda unahisi kama mzee mmoja wa kutaniko mwenye bidii aliyekiri hivi: “Nyakati fulani, kwa kweli sina hamu ya kuhubiri.”

2. Kwa nini nyakati nyingine inaweza kuwa vigumu kudumisha bidii yetu katika huduma?

² Huenda tunafurahia zaidi kushiriki katika aina nyingine za utumishi mtakatifu kuliko kufanya kazi ya kuhubiri. Kwa nini? Kwa sababu baada ya kujenga na kudumisha majengo ya kitheokrasi, kusaidia katika kazi ya kutoa msaada, au kuwatia moyo ndugu zetu, mara moja tunajionea matokeo ya kazi yetu na hilo linatufanya tuhisi vizuri. Tunafurahia amani na upendo tunapofanya kazi na ndugu na dada zetu, na tunajua kwamba wanathamini tunachowafanyia. Kwa upande mwingine, huenda tumekuwa tukihubiri kwa miaka mingi katika eneo lilelile, bila kupata matokeo mazuri. Au labda tunakutana na watu ambao wanapinga ujumbe wetu. Pia, tunajua kwamba kadiri mwisho unavyokaribia, ndivyo ujumbe wetu utakavyopata upinzani zaidi. (Mt. 10:22) Ni nini kinachoweza kutusaidia kudumisha au hata kuongeza bidii yetu katika kazi ya kuhubiri?

3. Luka 13:​6-9 inaonyeshaje bidii ya Yesu?

³ Tunaweza kujifunza jambo fulani kuhusu kuwa na bidii katika kazi ya kuhubiri kwa kuchunguza mfano wa Yesu. Alikuwa na bidii sana wakati wa huduma yake. Isitoshe, kadiri muda ulivyopita, ndivyo alivyoongeza utendaji wake. (Soma Luka 13:​6-9.) Kama mtunza-mizabibu aliyetumia miaka mitatu kutunza mtini ambao haukuzaa matunda, Yesu alitumia miaka mitatu kuwahubiria Wayahudi ambao wengi wao hawakuitikia vizuri. Hata hivyo, kama tu ambavyo mtunza-mizabibu hakukata tamaa alipokuwa akitunza ule mtini, Yesu hakukata tamaa au kupunguza bidii yake katika huduma. Alizidisha jitihada zake ili kufikia mioyo ya watu.

4. Tutachunguza mambo gani manne kuhusu mfano wa Yesu?

⁴ Katika makala hii, tutachunguza jinsi Yesu alivyokuwa na bidii, hasa katika miezi sita ya mwisho ya huduma yake. (Tazama habari za utafiti za Luka 10:1 “After these things,” nwtsty.) Kujifunza kutokana na mambo aliyofundisha na kuiga mambo aliyofanya kutatusaidia kuendelea kuwa na bidii leo. Acheni tuchunguze mfano wa Yesu katika mambo haya manne: (1) Alikazia fikira mapenzi ya Yehova, (2) alizingatia unabii wa Biblia, (3) alimtegemea Yehova, na (4) alidumisha mtazamo unaofaa kwamba baadhi ya watu wangemsikiliza.

ALIKAZIA FIKIRA MAPENZI YA YEHOVA

5. Yesu alionyeshaje kwamba alikazia fikira kufanya mapenzi ya Mungu?

⁵ Yesu alihubiri kwa bidii “habari njema ya Ufalme” kwa sababu alijua kwamba hilo ndilo jambo ambalo Mungu alitaka afanye. (Luka 4:43) Kazi ya kuhubiri ilikuwa jambo muhimu zaidi katika maisha ya Yesu. Hata mwishoni mwa huduma yake, alisafiri “kutoka jiji mpaka jiji na kutoka kijiji mpaka kijiji,” akiwafundisha watu. (Luka 13:22) Pia, aliwazoeza wanafunzi wengi zaidi ili wahubiri habari njema pamoja naye.—Luka 10:1.

6. Kazi ya kuhubiri habari njema inahusianaje na migawo mingine ambayo huenda tunayo? (Tazama pia picha.)

⁶ Leo pia, kazi ya kuhubiri habari njema ndiyo kazi muhimu zaidi ambayo Yehova na Yesu wanataka tufanye. (Mt. 24:14; 28:​19, 20) Kuna uhusiano wa moja kwa moja kati ya kazi ya kuhubiri na migawo mingine ya kitheokrasi. Kwa mfano, tunajenga majengo ya kitheokrasi au kutumikia Betheli ili kuunga mkono kazi ya kuhubiri. Tunatoa msaada wakati wa majanga ili kuwasaidia ndugu na dada zetu waweze kuendelea na utendaji wao wa kiroho, unaotia ndani kazi ya kuhubiri. Tunapotambua umuhimu wa kazi ya kuhubiri na kukumbuka kwamba hiyo ndiyo kazi muhimu zaidi ambayo Yehova anataka tufanye, tutachochewa kushiriki kwa ukawaida katika huduma. János, mzee wa kutaniko kutoka Hungaria, anasema hivi: “Huwa ninajikumbusha kwamba hakuna utendaji mwingine wowote wa kitheokrasi unaoweza kuchukua nafasi ya kazi ya kuhubiri; huo ndio mgawo wetu muhimu zaidi.”

7. Kwa nini Yehova anataka tuendelee kuhubiri? (1 Timotheo 2:​3, 4)

⁷ Tunaweza kuongeza bidii yetu kwa ajili ya huduma kwa kuwaona watu kama Yehova anavyowaona. Anataka watu wengi kadiri iwezekanavyo wasikie na kukubali habari njema. (Soma 1 Timotheo 2:​3, 4.) Kwa kuwa habari njema zinaweza kuokoa uhai wa watu, Yehova anatuzoeza ili tuwe na matokeo mazuri tunapohubiri. Kwa mfano, broshua Wapende Watu—Fanya Wanafunzi ina mapendekezo hususa yanayoweza kutusaidia kuanzisha mazungumzo tukiwa na lengo la kufanya wanafunzi. Hata ikiwa watu hawatakubali ujumbe wetu sasa, huenda wakapata nafasi kabla ya mwisho wa dhiki kuu. Huenda mambo tunayowafundisha sasa, yakawachochea kukubali kweli wakati ujao. Hilo litawezekana tu ikiwa tutaendelea kuhubiri.

ALIZINGATIA UNABII WA BIBLIA

8. Kujua unabii wa Biblia kulimchocheaje Yesu kutumia vizuri wakati wake?

⁸ Yesu alielewa jinsi unabii mbalimbali wa Biblia utakavyotimizwa. Alijua kwamba huduma yake ingedumu kwa miaka mitatu na nusu tu. (Dan. 9:​26, 27) Pia, alijua unabii kuhusu lini na jinsi ambavyo angekufa. (Luka 18:​31-34) Kwa kuwa alijua mambo hayo, alichochewa kutumia wakati wake vizuri. Matokeo ni kwamba alihubiri kwa bidii ili amalize kazi aliyopewa.

9. Kwa nini unabii wa Biblia unatuchochea kuhubiri kwa bidii?

⁹ Uelewaji wetu wa unabii wa Biblia unaweza kutuchochea kuhubiri kwa bidii. Tunajua kwamba hivi karibuni mfumo huu utakwisha. Tunatambua kwamba matukio ya karibuni na mitazamo ya watu leo inathibitisha unabii wa Biblia kuhusu siku za mwisho. Tunaona jinsi ambavyo uadui kati ya Serikali Kuu ya Ulimwengu ya Uingereza na Marekani, na Urusi na nchi zinazoiunga mkono unavyotimiza unabii kuhusu mfalme wa kusini na mfalme wa kaskazini katika “wakati wa mwisho.” (Dan. 11:40) Pia, tunaelewa kwamba Serikali Kuu ya Ulimwengu ya Uingereza na Marekani inafananisha miguu ya sanamu inayotajwa kwenye Danieli 2:​43-45. Tunasadiki kwamba kama unabii unavyoonyesha, hivi karibuni Ufalme wa Mungu utaziangamiza serikali za wanadamu. Unabii huo wote unaonyesha kwamba tunaishi mwishoni kabisa mwa mfumo huu wa mambo na hivyo unatuchochea kuhubiri tukiwa na hisi ya uharaka.

10. Ni kwa njia gani nyingine unabii wa Biblia unaweza kuchochea bidii yetu?

¹⁰ Unabii wa Biblia unatupatia pia ujumbe ambao tunatamani kwa hamu kutangaza. Carrie, dada anayetumikia katika Jamhuri ya Dominika, anasema hivi: “Ahadi za Yehova zenye kugusa moyo za wakati ujao ulio bora zinanichochea kuwahubiria kweli wengine.” Anaongezea hivi: “Ninapoona mambo ambayo watu wanakabiliana nayo leo, ninatambua kwamba ahadi hizo hazinihusu mimi tu, bali zinawahusu wao pia.” Unabii wa Biblia unatutia moyo tusisite kuwahubiria wengine kwa sababu unatuonyesha kwamba Yehova anatusaidia kutimiza kazi hii ya kuhubiri. Leila, anayeishi nchini Hungaria, anasema hivi: “Isaya 11:​6-9 inanichochea kuwaeleza habari njema hata watu ambao wanaonekana kama hawataikubali. Ninajua kwamba mtu yeyote anaweza kubadilika kwa msaada wa Yehova.” Na Christopher, ndugu kutoka nchini Zambia, anasema hivi: “Kama Marko 13:10 ilivyotabiri, habari njema inaenea ulimwenguni pote, na ninahisi ni pendeleo kushiriki katika utimizo wa unabii huu.” Ni unabii gani wa Biblia unaokuchochea kuendelea kuhubiri?

ALIMTEGEMEA YEHOVA

11. Kwa nini Yesu alihitaji kumtegemea Yehova ili amsaidie kuendelea kuhubiri kwa bidii? (Luka 12:​49, 53)

¹¹ Yesu alimtegemea Yehova ili amsaidie kuendelea kuhubiri kwa bidii. Ingawa Yesu alihubiri kwa busara, alijua kwamba habari njema ya Ufalme ingeweza kusababisha mabishano na upinzani mkali. (Soma Luka 12:​49, 53.) Kwa sababu ya kazi yake ya kuhubiri, viongozi wa kidini walijaribu tena na tena kumuua. (Yoh. 8:59; 10:​31, 39) Lakini Yesu aliendelea kuhubiri kwa sababu alijua kwamba Yehova alikuwa pamoja naye. Alisema hivi: “Siko peke yangu, bali Baba aliyenituma yuko pamoja nami. . . . Naye hakuniacha peke yangu, kwa sababu sikuzote mimi hufanya mambo yanayompendeza.”—Yoh. 8:​16, 29.

12. Yesu aliwatayarishaje wanafunzi wake ili waendelee kuhubiri licha ya upinzani?

¹² Yesu aliwakumbusha wanafunzi wake kwamba wanaweza kumtegemea Yehova. Aliwahakikishia tena na tena kwamba Yehova angewasaidia hata watakapokabili mateso. (Mt. 10:​18-20; Luka 12:​11, 12) Hivyo, aliwahimiza wajihadhari. (Mt. 10:16; Luka 10:3) Aliwaagiza wasiwalazimishe watu wasikilize ujumbe wao ikiwa hawataki. (Luka 10:​10, 11) Na aliwaambia wakimbie ikiwa watateswa. (Mt. 10:23) Ingawa Yesu alikuwa na bidii na alimtegemea Yehova, hakuhatarisha uhai wake isivyo lazima.—Yoh. 11:​53, 54.

13. Kwa nini unaweza kuwa na uhakika kwamba Yehova atakusaidia?

¹³ Leo, tunahitaji msaada wa Yehova ili tuendelee kuhubiri kwa bidii licha ya upinzani. (Ufu. 12:17) Kwa nini unaweza kuwa na uhakika kwamba Yehova atakutegemeza? Fikiria sala ya Yesu inayopatikana kwenye Yohana sura ya 17. Yesu alimwomba Yehova awalinde mitume wake na Yehova alijibu sala hiyo. Kitabu cha Matendo kinaonyesha jinsi ambavyo Yehova aliwasaidia mitume kuhubiri kwa bidii licha ya mateso. Katika sala yake, Yesu alimwomba pia Yehova awalinde wale watakaoamini mambo ambayo mitume wangehubiri. Kutia ndani wewe. Yehova bado anaendelea kujibu sala ya Yesu. Na atakusaidia, kama alivyowasaidia mitume.—Yoh. 17:​11, 15, 20.

14. Tunajuaje kwamba tutaweza kuendelea kuhubiri kwa bidii? (Tazama pia picha.)

¹⁴ Hata ikiwa kazi ya kuhubiri habari njema itazidi kuwa ngumu kadiri mwisho unavyokaribia, tutapata msaada wowote tunaouhitaji. (Luka 21:​12-15) Kama Yesu na wanafunzi wake, tunawaruhusu watu wachague ikiwa watasikiliza au la, na tunaepuka kubishana nao. Hata wakati ambapo kazi yetu imezuiwa, ndugu na dada zetu wameweza kuendelea kutangaza habari njema kwa sababu wanamtegemea Yehova, si nguvu zao wenyewe. Kama tu ambavyo Yehova aliwapatia nguvu watumishi wake wa karne ya kwanza, anatupatia sisi pia nguvu ili “kazi ya kuhubiri itimizwe kikamili” kulingana na mapenzi yake. (2 Tim. 4:17) Unaweza kuwa na uhakika kwamba ukimtegemea Yehova, utaweza kuendelea kuhubiri kwa bidii.

ALIDUMISHA MTAZAMO UNAOFAA

15. Ni nini kinachoonyesha kwamba Yesu alikuwa na mtazamo unaofaa kuelekea huduma?

¹⁵ Yesu alidumisha mtazamo unaofaa kuelekea kazi ya kuhubiri. Hilo lilimsaidia kuendelea kuwa na shauku kuhusu huduma yake. Kwa mfano, mwishoni mwa mwaka wa 30 W.K., Yesu aliona kwamba wengi walikuwa tayari kusikiliza habari njema, na aliwafananisha na shamba lililokuwa tayari kuvunwa. (Yoh. 4:35) Mwaka mmoja hivi baadaye, aliwaambia wanafunzi wake hivi: “Mavuno ni mengi.” (Mt. 9:​37, 38) Na baadaye alikazia jambo hilo tena kwa kusema hivi: “Mavuno ni mengi . . . Mwombeni Bwana wa mavuno awatume wafanyakazi katika mavuno yake.” (Luka 10:2) Yesu alijua kwamba kungekuwa na watu ambao wangekubali habari njema, na alishangilia walipofanya hivyo.—Luka 10:21.

16. Mifano ya Yesu inaonyeshaje mtazamo unaofaa kuelekea huduma? (Luka 13:​18-21) (Tazama pia picha.)

¹⁶ Yesu aliwafundisha wanafunzi wake wawe na mtazamo unaofaa kuhusu ujumbe wanaohubiri, jambo ambalo lingewasaidia wadumishe bidii yao. Kwa mfano, fikiria mifano miwili aliyotoa. (Soma Luka 13:​18-21.) Yesu alitumia mbegu ya haradali kufundisha kwamba watu wengi wangekubali ujumbe wa Ufalme na hakuna jambo ambalo lingeweza kuzuia ukuzi huo. Na alitumia chachu kuonyesha jinsi ambavyo ujumbe wa Ufalme ungeenea sana na kuwasaidia watu wafanye mabadiliko ambayo huenda mwanzoni yasionekane waziwazi. Hivyo, Yesu aliwahakikishia wanafunzi wake kwamba ujumbe waliotangaza ungekuwa na mafanikio.

17. Tuna sababu gani za kuendelea kuwa na mtazamo unaofaa kuelekea huduma?

¹⁷ Tunachochewa kuendelea kuhubiri kwa bidii tunapochunguza mambo yanayotimizwa ulimwenguni pote. Kila mwaka, mamilioni ya watu wanaopendezwa wanahudhuria Ukumbusho na wanajifunza Biblia pamoja nasi. Mamia ya maelfu ya watu wanabatizwa na kujiunga nasi katika kazi ya kuhubiri. Hatujui ni watu wangapi watakaokubali ujumbe wetu, lakini tunajua kwamba Yehova anakusanya umati mkubwa utakaookoka dhiki kuu inayokuja. (Ufu. 7:​9, 14) Bwana wa mavuno ana uhakika kwamba bado kuna watu wengi watakaokubali habari njema, hivyo tuna kila sababu ya kuendelea kuhubiri.

18. Tungependa watu wengine watambue nini kutuhusu?

¹⁸ Sikuzote wanafunzi wa Yesu wametambuliwa kwa kuwa na bidii ya kuhubiri. Watu walipowaona mitume wakizungumza kwa ujasiri, ‘walitambua kwamba walikuwa pamoja na Yesu.’ (Mdo. 4:13) Sisi pia tungependa kuhubiri habari njema kwa ujasiri na shauku ili watu wajionee kwamba tunaiga bidii ya Yesu.