Génesis

29 Ta patil, te Jacob chaʼjajchxan ta beel, bajt ta slumal te machʼatik ayik te banti ya xlokʼ tal te kʼajkʼale.* 2 La yil jun pozo te ay ta akiltik sok oxtsojb tuminchijetik te nopol* pakajtik tey-ae, melel tey kʼayemik ta yuchʼel jaʼ-a. Makal ta mukʼul ton te stiʼil te pozo. 3 Te kʼalal stsobojix sbaik ta spisilik-a te jaytsojb tuminchijetik, te jkanantuminchijetik ya stselkʼunik lokʼel te ton te makal-a te pozo sok ya yakʼbeyik yuchʼ jaʼ te tuminchijetik. Ta patil ya schaʼmakik jilel te pozo.

4 Te Jacob jich la sjojkʼoylanbey: «¿Banti ay te alumalik, kermanotak?». «Jaʼ jlumalkotik te Harán», xchiik. 5 Te Jacob jich la yaltiklanbeyxan: «¿Yabal anaʼbeyik sba te Labán, te smam* te Nacor?». «Yak, ya jnaʼbeytik sba», xchiik. 6 Tey-abi, jich la sjojkʼoylanbey: «¿Lekbal ay?». «Lek, lek ay. Ilawil, tey yak ta talel te Raquel, te yantsil nichʼan, yikʼoj tal te tuminchijetike», xchiik. 7 Jich la yal te Jacob: «Pero olil kʼajkʼaltonax. Mato yorailuk te ya yichʼ tsobel te tuminchijetik. Akʼbeyaik yuchʼ jaʼ sok ikʼaik bael ta weʼel ta akiltik». 8 Pero, jich la yalbeyik: «Ma xjuʼ te jich ya jpaskotike. Ya jmaliytik te ya stsob sbaik tal spisil te tuminchijetik, jich ya yichʼ tselkʼunel lokʼel te ton te makal-a te pozo. Jaʼto jich ya xjuʼ ya kakʼbeytik yuchʼ jaʼ te tuminchijetike».

9 Kʼalal te Jacob yakto ta kʼop* sok-a te jkanantuminchijetik, kʼot te Raquel. Te Raquel jaʼ jkanantuminchij sok yikʼoj tal te tuminchijetik yuʼun te state. 10 Kʼalal te Jacob la yil te Raquel, te yantsil nichʼan te Labán —te sbankil* te snan* te Jacob—, te yikʼoj tal te tuminchijetik yuʼun te Labán, te Jacob oranax bajt stselkʼun lokʼel te ton makal-a te pozo sok la yakʼbey yuchʼ jaʼ te tuminchijetik yuʼun te Labán, te sbankil te snane. 11 Te Jacob la spatbey yoʼtan sok jun ujtsʼuyel* te Raquel. Tey-abi tulan jajch ta okʼel. 12 Te Jacob jajch scholbey yaʼiy te Raquel te ay bin yutoj sba sok* te state; sok te jaʼ snan* te Rebeca. Jich te Raquel animal bajt scholbey yaʼiy te state.

13 Kʼalal la snaʼ te Labán te tey ay-a te Jacob —te skerem-al te yijtsʼin— animal bajt sta te banti aye. La smey, la spatbey yoʼtan sok jun ujtsʼuyel* soknix la yikʼ bael ta sna. Te Jacob jajch scholbey yaʼiy te Labán spisil te bin kʼax ta stojole. 14 Jaʼ yuʼun, te Labán jich la yalbey: «Yuʼun-nix jun jchʼichʼeltik-a».* Te Jacob jil jun u sok te Labán.

15 Ta patil, te Labán jich la yalbey te Jacob: «Manchukme ay bin kutoj* jbatik, ya skʼan ya jtojat ta swenta te ya x-aʼtejat ta jtojole. Albon kaʼiy, ¿jayeb ya akʼan te ya jtojate?». 16 Te Labán ay chaʼtul yantsil nichʼan: Lea sbiil te wixilale, sok Raquel sbiil te ijtsʼinale. 17 Pero, te sit te Lea maba tʼujbil. Yan stukel te Raquel kʼax tʼujbil achʼix. 18 Te Jacob mero skʼanojix-a te Raquel, jaʼ yuʼun jich la yalbey te Labán: «Ya jkʼan ya x-aʼtejon jukeb jaʼbil ta atojol ta swenta te awantsil nichʼan Raquel, te ijtsʼinale». 19 Te Labán jich la yalbey: «Jaʼ lekxan te jaʼat ya kakʼbat awikʼe, ma jaʼuk te ya kakʼbey yikʼ yan winike. Jilan ta nainel liʼi». 20 Te Jacob jukeb jaʼbil aʼtej ta swenta te Raquel, pero cheʼoxebnax kʼajkʼal la yaʼiy ta swenta te kʼux ta yoʼtan.

21 Ta patil, te Jacob jich la yalbey te Labán: «Tsʼakajix te jayeb jaʼbil jchapojtik. Akʼbonix te kinam yuʼun ya xwayon sok». 22 Jich te Labán la stsob spisil te spatxujk sok la spas kʼin yuʼun nujpunel. 23 Pero, ta ajkʼabal, la yikʼ tal te Lea, te yantsil nichʼan, yuʼun ya yakʼbey sjokin ta wayel te Jacob. 24 Te Labán la yakʼbey jtul j-abat ants te Lea, te Zilpá sbiil. 25 Ta sakubel kʼinal, te Jacob la yil te jaʼ jokinbil yuʼun te Lea. Jaʼ yuʼun, jich la yalbey te Labán: «¿Bin-a te la apasbone? ¿Mabal jaʼuk ta swenta te Raquel te aʼtejon ta atojole? ¿Bin yuʼun te la aloʼlayone?». 26 Pero, te Labán jich la yalbey: «Ma jichuk ta pasel liʼi te jaʼ nail ya xnujpun te ijtsʼinal, ya skʼan jaʼ nail ya xnujpun te wixilale. 27 Tsʼakajtesa te semana sok te ants ini. Ta patil ya xjuʼ ya awikʼ te yan ants teme ya x-aʼtejat jukebxan jaʼbil ta jtojole». 28 Te Jacob jich la spas, la stsʼakajtes te semana sok te ants-abi. Ta patil, te Labán la yakʼbey yinamin te Raquel. 29 Te Labán la yakʼbey jtul j-abat ants te Raquel, te Bilhá sbiil.

30 Te Jacob jaʼnix jich way sok te Raquel, sok jaʼ kʼux la yaʼiyxan ta yoʼtan te Raquel te bitʼil te Lea. Jich aʼtej jukebxan jaʼbil ta stojol te Labán. 31 Kʼalal la yil te Jehová te maba kʼux aʼiybil* te Lea, la yakʼ te yakuk yikʼ alal ta schʼujt.* Yan te Raquel ma x-alaj stukel. 32 Te Lea la yikʼ yal ta schʼujt, jich la yayintes* jtul kerem te Rubén* la yakʼbey sbiilin, melel jich la yal: «Jaʼ ta swenta te la yilbon jwokol te Jehová. Ta ora ini kʼux ya xjajch yaʼiyonix ta yoʼtan-a te jmamalale». 33 Ta patil la schaʼyikʼ yal ta schʼujt, jich la yayintes* jtul kerem. Sok jich la yal: «Jaʼ ta swenta te la yaʼiybon jkʼop te Jehová, melel maba kʼux aʼiybilon-a. La yakʼbonxan jtul jkerem-al». Jaʼ yuʼun, Simeón* la yakʼbey sbiilin. 34 La schaʼyikʼ yal ta schʼujt, jich la yayintes* jtul kerem. Sok jich la yal: «Te jmamalal nopolxan* ya yaʼiy sba ta jtojol-abi, melel la kakʼbey oxtul snichʼan». Jaʼ yuʼun, Leví* la sbiilin. 35 La schaʼyikʼ yal ta schʼujt, jich la yayintes* jtul kerem. Ta patil, jich la yal: «Ta ora ini jaʼ ya kalbeyix yutsil skʼoplal te Jehová». Jaʼ yuʼun, Judá* la yakʼbey sbiilin. Tey-abi kejchaj ta alajel.