Números

31 Te Jehová jich la yalbey te Moisés: 2 «Sutbeya spakol te madianitaetik ta swenta te bin la spasbeyik te israeletik. Ta patil yame xlajat».

3 Jaʼ yuʼun, te Moisés jich la yalbey te lume: «Chajpanaik winiketik yuʼun ya xbajt yakʼbeyik guerra te Madián sok yuʼun ya sutbeyik spakol ta swenta Jehová te Madián. 4 Yame skʼan ya atikunik bael ta yakʼel guerra jmil ta tul winiketik ta jujunchajp stsʼumbal te lum yuʼun Israel». 5 Jich yuʼun, ta yolil te bayal ta mil ta tul israeletik, la yichʼ chajpanel 12 mil ta tul winiketik yuʼun ya yakʼik guerra, jmil ta tul winiketik ta jujunchajp tsʼumbalil.

6 Tey-abi, te Moisés la stikunlan bael ta yakʼel guerra jmil ta tul winiketik ta jujunchajp tsʼumbalil, te sacerdote Finehás snichʼan Eleazar, jaʼ te machʼa la sjokin bael te soldadoetik, yichʼoj bael te chʼul aʼtejibaletik sok te trompetaetik te ya yichʼ tuuntesel ta swenta señail sjachel guerra. 7 La stsak sbaik ta guerra sok te Madián jich bitʼil pasot ta mantal yuʼun Jehová te Moisés, la smilik spisil te winiketik. 8 Ma jaʼuknax la smilik-abi, jaʼnix jich la smilik te joʼtul ajwaliletik yuʼun te Madián: te Eví, Réquem, Zur, Hur sok te Reba. La smilik ta espada-euk te Balaam snichʼan Beor. 9 Yan stukel te alaletik sok te antsetik yuʼun Madián ikʼotik bael yuʼun te israeletik jich bitʼil jchukeletik. Jaʼnix jich la yichʼbeyik bael spisil te alakʼil chambalametik* yuʼunik sok te yantik te chambalametik yuʼunik soknix te bintik ay yuʼunike. 10 La schikʼik spisil te mukʼul lumetik te banti yakʼoj sbaik-ae sok spisil te scampamentoik. 11 La spojbeyik bael spisil te bintik ay yuʼunik, jaʼnix jich tey ochem skʼoplal-a te ants winiketik sok te chambalametik. 12 Ta patil la yikʼik bael te jchukeletik, jaʼnix jich spisil te bintik la spojik bael, la yakʼik te banti ay te Moisés, te sacerdote Eleazar sok te lum yuʼun Israel te ayik ta spamlej jochol takin kʼinal yuʼun Moab, ta nopol* Jordán ta stojol bael Jericó.

13 Jich yuʼun te Moisés, te sacerdote Eleazar sok spisil te jolaletik yuʼun te lume lokʼ staik ta fuera yuʼun te campamento. 14 Pero, te Moisés kʼax bayal ilin ta stojol te capitanetik te swentainojik ta jujun mil ta tul soldadoetik sok te capitanetik te swentainojik ta jujun 100 ta tul soldadoetik te yakik ta sujtel tal ta yakʼel guerra. 15 Te Moisés jich la yaltiklanbey: «¿Bin yuʼun te kuxul jil awuʼunik spisil te antsetike? 16 Melel jaʼik te machʼatik la schʼuunbeyik smantal te Balaam, la yakʼik te ma junukix yoʼtan ya yakʼ sbaik ta stojol Jehová te israeletik ta swenta te bin kʼot ta pasel ta Peor, jaʼ yuʼun la yichʼik tulan lajinel spisil te lum yuʼun te Jehová. 17 Jaʼ yuʼun yame skʼan ya amilik spisil te chʼin keremetik sok spisil te antsetik te ay sjokinojik ta wayel jtul winik. 18 Pero kuxul xa awijkitayik te achʼixetik te maba tabilik ta winik. 19 Te jaʼexe yame skʼan ya apas acampamentoik ta fuera yuʼun te campamento jukeb kʼajkʼal. Spisil te machʼatik awaʼiyojik milaw sok spisil te machʼatik apikojik jun chamen bakʼet, yame skʼan ya alekubtesbey aba akʼoplalik ta yoxebal kʼajkʼal sok ta sjukebal kʼajkʼal, jaʼnix jich ya skʼan ya spasik-euk te jchukeletik awuʼunik. 20 Yame skʼan ya alekubtesbeyik skʼoplal spisil te kʼuʼul pakʼal, spisil te bintik pasbil ta nujkul, spisil te bintik pasbil ta stsotsel tentsun sok spisil te bintik pasbil ta teʼ».

21 Te sacerdote Eleazar jich la yalbey te soldadoetik te sujtik tal ta yakʼel guerra: «Jaʼme te mantalil ini ta swenta te ley te yalojbey Jehová te Moisés: 22 ‹Te oro, plata, cobre, hierro, estaño sok te plomo 23 —spisil te bintik ya xkujch yuʼun te kʼajkʼe— yame skʼan ya achʼojik ochel ta kʼajkʼ, jich ya xlekub skʼoplalik. Jaʼnix jich ya skʼan ya yichʼik lekubtesel sok te jaʼ ta swenta lekubtesel. Spisil te bintik ma xkujch yuʼun te kʼajkʼ yame skʼan ya yichʼik pokel ta jaʼ ta swenta lekubtesel. 24 Ta sjukebal kʼajkʼal ya skʼan ya asakʼ akʼuʼik, jich lek akʼoplalik ya xkʼoex. Ta patil ya xjuʼ ya x-ochex bael ta campamento›».

25 Tey-abi, te Jehová jich la yalbey te Moisés: 26 «Pasa jun lista yuʼun te bintik la yichʼ pojel tal, tey ochem skʼoplal te antsetik sok te chambalametike. Pasa sok te sacerdote Eleazar sok te jolaletik yuʼun te familiaetik yuʼun te lum Israel. 27 Cheb parte xa alokʼes te bintik la apojik tale: jun parte jaʼ yuʼun ya xkʼot te soldadoetik te bajt yakʼik guerra, te yane jaʼ yuʼun ya xkʼot spisil te lume. 28 Ta swenta te bin la staik te soldadoetik, yame skʼan ya alokʼesik yuʼun ya yichʼ akʼbeyel te Jehová jtul ants ta swenta te 500 ta tul antsetik, jkojt wakax ta swenta te 500 ta kojt wakaxetik, burroetik, tuminchijetik sok tentsunetik. 29 Yame skʼan ya alokʼes te banti olil la staik te soldadoetik sok ya awakʼbey te sacerdote Eleazar te jich ya xkʼot bitʼil majtanil ta stojol te Jehová. 30 Ta olil te la staik te israeletik yame alokʼes jtul ants ta swenta te 50 ta tul antsetik, jkojt wakax ta swenta te 50 ta kojt wakaxetik, burroetik, tuminchijetik, tentsunetik sok spisil te alakʼil chambalametik* jaʼme xa awakʼbey te levitaetik, te jaʼ ay ta swentaik yilel te aʼteliletik te snitojbey sba skʼoplal sok te nailpakʼ templo yuʼun te Jehová».

31 Jaʼ yuʼun, te Moisés sok te sacerdote Eleazar mero jich la spasik te bitʼil la yal ta mantal te Jehová ta swenta te Moisés. 32 Te jayeb jil yuʼunik te bintik la spojik tal te soldadoetik te sujtik tal ta yakʼel guerra jaʼ 675 mil ta kojt tuminchijetik sok tentsunetik, 33 72 mil ta kojt wakaxetik 34 sok 61 mil ta kojt burroetik. 35 Te achʼixetik te maba tabilik ta winik jaʼ 32 mil ta tul. 36 Te olil te la staik te soldadoetik te bajt yakʼik guerra jaʼ 337 mil 500 ta kojt tuminchijetik sok tentsunetik. 37 Te bintik la yichʼ akʼbeyel te Jehová, jaʼ 675 ta kojt tuminchijetik sok tentsunetik. 38 Te 36 mil ta kojt wakaxetik ay-ae, la yichʼ akʼel 72 ta kojt wakaxetik ta stojol te Jehová. 39 Te 30 mil 500 ta kojt burroetik ay-ae, la yichʼ akʼel 61 ta kojt burroetik ta stojol te Jehová. 40 Te 16 mil ta tul antsetik ay-ae, la yichʼ akʼel 32 ta tul ta stojol te Jehová. 41 Tey-abi, te Moisés la yakʼbey te patanil te sacerdote Eleazar ta smajtan te Jehová, jich te bitʼil pasot ta mantal yuʼun Jehová te Moisés.

42 Te olil la staik te israeletik te la slokʼes te Moisés ta bintik la spojik tal te winiketik te kʼotik ta yakʼel guerra, 43 jaʼ 337 mil 500 ta kojt tuminchijetik sok tentsunetik, 44 36 mil ta kojt wakaxetik, 45 30 mil 500 ta kojt burroetik 46 sok 16 mil ta tul antsetik. 47 Tey-abi, te olil la staik te israeletik, te Moisés la slokʼes jtul ants ta swenta te 50 ta tul antsetik, jkojt chambalam ta swenta te 50 ta kojt chambalametik, la yakʼbey te levitaetik te jaʼ ay ta swentaik yilel te aʼteliletik te ya yichʼ pasel ta nailpakʼ templo yuʼun te Jehová, jich te bitʼil pasot ta mantal yuʼun Jehová te Moisés.

48 Jich noptsajik* bael ta stojol te Moisés te winiketik te swentainojik bayal ta mil soldadoetik, jaʼik te capitanetik te swentainojik ta jujun mil ta tul soldadoetik sok te capitanetik te swentainojik ta jujun 100 ta tul soldadoetik, 49 jich la yalbeyik te Moisés: «Te joʼotik, te j-abatotik awuʼun, la kajtaytik te soldadoetik te ay ta jwentatik, maʼyuk jtuluk chʼayem. 50 Jaʼ yuʼun akʼbotik permiso yuʼun ya kakʼbeytik smajtan te Jehová te bintik la jtatik ta jujuntul —te bintik pasbil ta oro, schʼalil snukʼ okal, yual kʼabaletik, chʼokowiletik swenta yakʼel sello, stakʼinal chikiniletik sok yantik te ya yichʼ tuuntesel ta schʼalilik— yuʼun ya kichʼtik pasbeyel perdón yuʼun jmultik ta stojol te Jehová».

51 Jich te Moisés sok te sacerdote Eleazar la stsakbeyik jilel te bintik pasbilik ta oro sok spisil te yantik te ya stuuntesik ta schʼalilik. 52 Ta spisil te oro te la yakʼik ta smajtan te Jehová te capitanetik te ya swentainik ta jujun mil ta tul soldadoetik sok ta jujun 100 ta tul soldadoetik jaʼ 16 mil 750 siclo.* 53 Ay bin la spojik tal ta jujuntul te soldadoetike. 54 Te Moisés sok te sacerdote Eleazar la stsakbeyik jilel te oro yuʼun te capitanetik te swentainojik ta jujun mil ta tul soldadoetik sok te capitanetik te swentainojik ta jujun 100 ta tul soldadoetik, la yichʼik bael ta yutil te nailpakʼ ta swenta tsoblej jich bitʼil snaʼojibal yuʼun te lum Israel ta stojol te Jehová.