Números

15 Te Jehová kʼopojxan sok te Moisés, jich la yalbey: 2 «Kʼopona te israeletik sok jich xa awaltiklanbey: ‹Te kʼalal ya sta yorail te ya x-ochex ta kʼinal te ya kakʼbeyex yuʼun ya xnainex tey-a 3 sok te ya awakʼik jun majtanil te ya yichʼ chikʼel ta stojol te Jehová ta swenta jkojt wakax o jkojt tat tuminchij —chikan teme chikʼbil majtanil o milbil majtanil o ta swenta skʼotesel ta pasel te bin mukʼ skʼoplal jamal awalojik, jun majtanil yuʼun spasemal awoʼtanik o jun majtanil te kʼalal ya apasulanik te kʼinetik awuʼunik— swenta jich ya xkʼot bitʼil majtaniletik te kʼax sumetnax yikʼ* ta stojol te Jehová. 4 Te machʼa ya yakʼ smajtan jaʼnix jich ya skʼan ya yakʼbey te Jehová jun ta slajunebal yuʼun te jun efá* yuʼun lekil harina te kapbil sok jun ta schanebal hin* yuʼun aceite, jaʼ-abi jaʼ te jun majtanil yuʼun sit awal tsʼunubil. 5 Te kʼalal ya yichʼ akʼel te chikʼbil majtanil o te milbil majtanil yuʼun te jujunkojt jkolel* tuminchij, jaʼnix jich ya skʼan te pajal ya yichʼ akʼel sok te jun ta schanebal hin* yuʼun vino jich bitʼil malbil majtanil. 6 O teme jaʼ jkojt tat tuminchij, yame skʼan ya awakʼ cheb ta slajunebal yuʼun te jun efá* yuʼun lekil harina te wotsʼbil ta jun ta yoxebal hin* yuʼun aceite, jaʼ-abi jaʼ te majtanil yuʼun sit awal tsʼunubil. 7 Yame skʼan ya awakʼ jun ta yoxebal hin* yuʼun vino jich bitʼil malbil majtanil te kʼax sumetnax yikʼ* ta stojol te Jehová.

8 »›Pero, teme ya awakʼbey te Jehová jkojt jkolel* toro jich bitʼil chikʼbil majtanil o jich bitʼil milbil majtanil swenta ya akʼotes ta pasel te bin mukʼ skʼoplal la awal o jich bitʼil milbil majtanil ta swenta lamalkʼinal, 9 jaʼnix jich pajalme ya skʼan ya awakʼ sok te sit awal tsʼunubil te pasbil ta oxeb ta slajunebal yuʼun te jun efá* yuʼun lekil harina te wotsʼbil ta olil hin* yuʼun aceite. 10 Sok yame skʼan ya awakʼ olil hin* yuʼun vino jich bitʼil malbil majtanil, jich bitʼil jun majtanil te ya yichʼ chikʼel ta stojol te Jehová te kʼax sumetnax yikʼ.* 11 Jichme ya skʼan ya yichʼ pasbeyel ta jujunkojt toro, ta jujunkojt jkolel* tuminchij o ta jujunkojt tat tentsun. 12 Chikan jayeb ta kojt chambalam ya yichʼ akʼel, jichme ya skʼan ya yichʼ pasbeyel ta jujunkojt. 13 Spisil te machʼatik jaʼ stsʼumbalik te Israel jichme ya skʼan ya yakʼik te majtanil te ya yichʼ chikʼel ta stojol te Jehová te kʼax sumetnax yikʼ.*

14 »›Teme ay jtul jyanlum te sjokinojex o ay machʼa te yak ta nainel ta awolilik ta kajalkaj atsʼumbalik ya yakʼ jun majtanil te ya yichʼ chikʼel ta stojol te Jehová te kʼax sumetnax yikʼ,* jichme ya skʼan ya spas te bitʼil ya apasik te jaʼexe. 15 Jaʼex sok te jyanlumetik te yakik ta nainel ta awolilik jun-naxme te mantalil awuʼunik. Jaʼ jun mantalil te ma xlaj skʼoplal ta kajalkaj atsʼumbalik. Te jyanlum pajalme ya skʼan ya xkʼot jich te bin-utʼil te jaʼex ta stojol te Jehová. 16 Yame skʼan te jun-nax mantalil sok jun-nax te bintik chajpanbil ta atojolik sok te jyanlumetik te yakik ta nainel ta awolilik›».

17 Jaʼ yuʼun, te Jehová jich la yalbey te Moisés: 18 «Kʼopona te israeletik sok jich xa awaltiklanbey: ‹Te kʼalal ya x-ochex bael ta kʼinal te banti ya kikʼex bael 19 sok ya aweʼik te weʼelil te ay ta kʼinal-abi, yame skʼan ya awakʼbeyik smajtan te Jehová. 20 Yame skʼan ya awakʼbeyik ta majtanil te sbabial harina te ya yichʼ wotsʼel yuʼun ya yichʼ pasel rosca-pan sok-a. Jichme ya skʼan ya yichʼ chajpanel te bin-utʼil ya yichʼ chajpanel te majtanil yuʼun te swuyojibal trigo. 21 Yame skʼan ya awakʼik te sbabial harina awuʼunik jich bitʼil majtanil ta stojol te Jehová ta kajalkaj atsʼumbalik.

22 »›Pero, teme ay banti chʼayex te bin-utʼil ya skʼan pasel sok maba ya achʼuunik spisil te mantaliletik yuʼun te Jehová te la yakʼbey te Moisés 23 —spisil te bintik yalojbeyex ta mantal te Jehová ta swenta te Moisés, kʼalal ta skʼajkʼalelnix te la yal ta mantal te Jehová sok ta patil bael ta kajalkaj atsʼumbalik—, 24 sok te ma yolojuk te jich la spas te lume, yame skʼan ya yakʼ jkojt jkolel* toro jich bitʼil majtanil te ya yichʼ chikʼel ta stojol te Jehová te kʼax sumetnax yikʼ,* pajalme ya yichʼ akʼel sok jun majtanil yuʼun sit awal tsʼunubil sok jun malbil majtanil jich te bitʼil ya skʼan ya yichʼ akʼele, jaʼnix jich ya skʼan ya awakʼ jkojt jkolel tat tentsun jich bitʼil majtanil ta swenta mulil. 25 Te sacerdote yame yakʼ te ya staik perdón yuʼun smulik te lum Israel, jich ya yichʼik pasbeyel perdón. Ta skaj te chʼayik, la yichʼik bael ta stojol te Jehová jun majtanil te ya yichʼ chikʼel ta stojol te Jehová sok jun majtanil ta swenta mulil. 26 Spisil te lum yuʼun Israel sok te jyanlumetik te yakik ta nainel ta yolilik yame yichʼik pasbeyel perdón, melel spisil te ants winiketik chʼayik ta stʼunel te mantalile.

27 »›Teme ay machʼa ya sta smul ta skaj te chʼaye, yame skʼan ya yakʼ jkojt meʼ tentsun te juntonax yaʼbilal jich bitʼil majtanil ta swenta mulil. 28 Te sacerdote yame yakʼ te ya sta perdón te machʼa chʼaye sok te ma yolojuk la sta smul ta stojol te Jehová. Yame yakʼ te ya sta perdón ta swenta te smule, jich ya yichʼ pasbeyel perdón. 29 Te machʼatik jaʼ stsʼumbalik te Israel sok te jyanlumetik te yakik ta nainel ta yolilik yame skʼan te jun-nax te ley kʼalal ay machʼa ma yolojuk la sta smul.

30 »›Yan stukel teme ay machʼa te jaʼ stsʼumbal Israel o jyanlum te yoloj te bin ma lek ya spase, yak ta sbolkʼoptayel te Jehová, jaʼ yuʼun yame yichʼ milel ta yolil te lume. 31 Ta skaj te la spʼaj te bin la yal te Jehová sok te la skʼaxuntaybey smantal, te ants winik-abi yananixme skʼan ya yichʼ milel-a. Jaʼnixme smul ya xkʼot›».

32 Kʼalal te israeletik ayik ta jochol takin kʼinal, la staik jtul winik te yak ta stsobel siʼ ta skʼajkʼalel sábado. 33 Te machʼatik la staik te yak ta stsobel siʼ la yikʼik bael ta stojol te Moisés, Aarón sok ta stojol spisil te lume. 34 La yichʼ chukel, melel mato tabil ta nopel te bin ya yichʼ pasbeyele.

35 Te Jehová jich la yalbey te Moisés: «Te winik yananixme yichʼ milel-a, spisil te lum yame skʼan ya schʼojik ta ton ta fuera yuʼun te campamento». 36 Jich yuʼun, te lum la slokʼesik bael ta campamento sok la schʼojik ta ton jaʼto te kʼalal laje, jich bitʼil pasot ta mantal yuʼun Jehová te Moisés.

37 Jaʼnix jich, te Jehová jich la yalbey te Moisés: 38 «Kʼopona te israeletik sok jich xa awaltiklanbey: ‹Yame skʼan ya awakʼbeyik stsijtsimal stiʼil te akʼuʼike jich xa apasik ta kajalkaj atsʼumbalik, yame awakʼbeyik tsʼotbil hilo te azul sbonil ta stsijtsimal stiʼil te akʼuʼike. 39 Yame skʼan ya yichʼ stsijtsimal te stiʼil te akʼuʼik, te kʼalal ya yichʼ ilel, jich ya xjul ta awoʼtanik spisil te mantaliletik yuʼun te Jehová sok ya achʼuunik spasel. Mame xa atʼunik te bin ya skʼan awoʼtanik sok te bin ya yil te asitik, melel yak yikʼbelex bael ta antsinel kʼoem. 40 Jaʼ-abi ya skoltayex yuʼun ya xjul ta awoʼtanik sok jich ya achʼuunik spasel spisil te mantaliletik kuʼun, chʼultesbil ya xkʼoex ta stojol te Dios awuʼunike. 41 Joʼon Jehovaon te Dioson awuʼunik te la jlokʼesex tal ta skʼinal Egipto swenta jaʼ Dios ya xkʼoon awuʼunik. Joʼon Jehovaon te Dioson awuʼunik›».