Proverbios
7 Jnichʼan, chʼuuna spasel te jkʼop
sok kʼeja ta awoʼtan te mantaliletik kuʼune.
2 Kʼotesa ta pasel te mantaliletik kuʼun, jichme ya xkuxinat,
kanantaya te nojptesel* kuʼun jich te bin-utʼil ya akanantay te yalalil asit.*
3 Chukame ta yalatak akʼab
sok tsʼibaya ta awoʼtan.
4 Jichme xa awalbey te pʼijil oʼtanil «Jaʼat jwixat»,
te bintik ay ta ichʼbeyel swentail jichukme ya xkʼot te bitʼil ay bin awutoj aba sok
5 swenta jaʼ ya skanantayat ta stojol te ants te maba ay ta tojil be*
sok swenta jaʼ ya skanantayat ta stojol te j-antsinel ants* te ya xmonawan ta tʼujbil kʼopetik.
6 Kʼalalto ta sventanaul jna,
la kil lokʼel te banti japajtik,
7 te kʼalal yakon ta yilel-a te machʼatik maʼyuk spʼijil yoʼtanik,
ta spisil te jchʼieletik la kil jtul kerem te maʼyuk spʼijil yoʼtan.
8 Te kereme yak ta kʼaxel bael ta scalle te antse,
yak ta beel bael ta sbelal sna te ants
9 te kʼalal yakix ta malel bael-a te kʼajkʼal, te kʼalal yakix ta ijkʼubel-a te kʼinal,
te kʼalal ijkʼix-a sok te kʼalal yakix ta ochel-a te ajkʼabal.
10 Tey-abi la kil te lokʼ ta tael te kerem yuʼun te ants
te slapoj skʼuʼ yuʼun j-antsinel* ants sok te aynax spʼijil ta loʼlaywanej.
11 Bayal ya xkʼopoj sok ya stoy sba.
Maʼyuk bin-ora nakal ta sna.
12 Ta ora ini ayix ta calle, ta patil ta plazaetik;
ya snakʼ sba ta jujun esquina.
13 Te ants la stsak te kerem sok la yujtsʼuy;*
ma xkʼexaw ta yilbeyel sit sok jich la yalbey:
14 «Kechel kuʼun-a te ya kakʼ milbil majtaniletik ta swenta lamalkʼinal,
pero nax la jkʼotesix ta pasel te bin jamal kaloj.
15 Jaʼ yuʼun lokʼ jleat ta be swenta ya kilat,
¡la jtaatix!
16 La jlimix lekil tsots* ta jwayib
te pasbilik ta lino te tʼujbilnax scoloril te talem ta Egipto.
17 Lame kakʼbeyix mirra, áloe* sok canela te jwayibe.
18 Laʼ, jokin jbatik ta wayel jaʼto te kʼalal ya sakub kʼinal;
akʼa jmulanbeytik sbujtsʼ te bitʼil ya jokin jbatike.
19 Melel maba nakal te jmamalal;
namal* te banti baeme.
20 La yichʼ bael jchuy stakʼin,
jaʼto ya sujt talel-a te kʼalal ya xyijub te ue».
21 Ya snaʼ ta lek te bitʼil ya sloʼlay te kereme.
Ya smon ta tʼujbil kʼopetik.
22 Jich te kerem oranax la stʼun bael te ants jich te bin-utʼil toro te ya xbajt ta milel,
jich te bin-utʼil te machʼa ma snaʼ kʼinal te ya yichʼ xojtiklanbeyel yok
ta jutbil chʼujt-teʼ* yuʼun ya yichʼ castigo,
23 jaʼto te kʼalal ya xlowot kʼaxel ta flecha te sejkub.
Jich te bin-utʼil jaʼmal mut te oranax ya xyal ta pejtsʼ,
jkʼaxel ma xtal ta yoʼtan te jayebto swokol ya xbajt sta yuʼune.
24 Jnichʼnab, aʼiya awaʼiyik te jkʼop;
chʼama awaʼiyik ta lek te bin ya kalbeyex.
25 Mame xa awakʼ te ya xjowij bael te awoʼtan ta sbe te antse.
Mame xa atʼunbey bael te sbe.
26 Melel bayal te machʼatik juʼem yuʼun yakʼbeyel swokol;
kʼax bayal ta tul te machʼatik smiloj.
27 Te sna ya x-ikʼawan bael ta Mukenal*
sok ya x-ikʼawan bael ta yutil cuartoetik yuʼun lajel te kʼax kʼubul ochele.