Números

35 Te Jehová kʼopojxan sok te Moisés ta spamlej jochol takin kʼinal yuʼun Moab, ta nopol* Jordán ta stojol bael Jericó, jich la yalbey: 2 «Albeya yaʼiy te israeletik, te tey ta banti skʼinalik, yame skʼan ya yakʼbey te levitaetik mukʼul lumetik te banti ya xnainik. Jaʼnix jich yame skʼan ya awakʼbeyik te akiltik te ay ta sjoyobal te mukʼul lumetike. 3 Te levitaetik yame xnainik ta mukʼul lumetik, te akiltik jaʼ yuʼun ya xkʼot te wakaxetik yuʼunik, te bintik ya xtuun yuʼun te schambalamik sok spisil te yantik chambalametik yuʼunik. 4 Te akiltik te ya awakʼbey te levitaetik jaʼ jmil xujkʼubil* ta sjoyobal te mukʼul lume, te ya xjajch bael ta spat te tsʼajkʼe. 5 Ta fuera yuʼun te mukʼul lum yame skʼan ya apʼisik 2 mil xujkʼubil* ta stojol te banti ya xlokʼ tal te kʼajkʼal, 2 mil xujkʼubil ta stojol sur, 2 mil xujkʼubil ta stojol bael te banti ya xmal te kʼajkʼal sok 2 mil xujkʼubil ta stojol norte, te mukʼul lume yame xjil ta yolil. Te akiltik-abi jaʼme yuʼun ya xkʼot te mukʼul lumetik.

6 »Ta swenta te mukʼul lumetik te ya awakʼbeyik te levitaetik, wakeb ya xtuun jich bitʼil mukʼul lumetik yuʼun anibal* yuʼun tey ya xbajt ta anel te machʼa la yaʼiy milaw, jaʼnix jich yame awakʼbeyikxan 42 mukʼul lumetik. 7 Ta spisil 48 mukʼul lumetik ya awakʼbeyik te levitaetik sok te akiltik yuʼunike. 8 Te mukʼul lumetik te ya yichʼ akʼbeyel te levitaetik ya yichʼ lokʼesel ta skʼinalik te israeletike. Ta jujuntsojb tsʼumbalil te mukʼ te skʼinalike mukʼ kʼinal ya alokʼesik tey-a; ta jujuntsojb tsʼumbalil te ma mukʼuk te skʼinalike maba mukʼ kʼinal ya alokʼesik tey-a. Yame yakʼbeyik mukʼul lumetik te levitaetik jaʼ chikan te bin yilel smukʼul te kʼinal te la yichʼik akʼbeyele».

9 Te Jehová kʼopojxan sok te Moisés, jich la yalbey: 10 «Kʼopona te israeletik sok jich xa awaltiklanbey: ‹Ya xkʼaxex bael ta mukʼul jaʼ Jordán yuʼun ya x-ochex bael ta skʼinal Canaán. 11 Yame skʼan ya atsaik mukʼul lumetik te lek ya awilik yuʼun ya xtuun awuʼunik jich bitʼil mukʼul lumetik yuʼun anibal, tey ya xjuʼ ya xbajt ta anel te machʼa ma spasemaluk yoʼtan ay machʼa la smil. 12 Te mukʼul lumetik ini yame xtuun awuʼunik yuʼun ya anakʼ abaik ta stojol te sfamilia te machʼa la yichʼ milele.* Yuʼun jich te machʼa milawane ma xmilot yuʼun te sfamilia te machʼa la yichʼ milel te kʼalal mato yichʼoj ichʼel ta kʼop yuʼun te juecetike. 13 Te wakeb mukʼul lumetik yuʼun anibal te ya awakʼike jaʼme ya xtuun ta swenta-abi. 14 Yame skʼan ya awakʼik oxeb mukʼul lumetik ta jejch mukʼul jaʼ Jordán sok oxeb mukʼul lumetik ta skʼinal Canaán swenta ya xtuun jich bitʼil mukʼul lumetik yuʼun anibal. 15 Te wakeb mukʼul lumetik-abi ya xtuun jich bitʼil anibal ta stojol te israeletik, te jyanlumetik sok te jbeometik te ay ta awolilik, yuʼun jich machʼauk-a te ma spasemaluk yoʼtan ay machʼa la smile ya xjuʼ ya xbajt ta anel tey-a.

16 »›Teme ay machʼa ya yejchentes jtul ants winik ta jun aʼtejibal te pasbil ta hierro te ya xlaj yuʼune, jaʼme jmilawal ya xkʼot. Yananixme skʼan ya yichʼ milel-a te jmilawale. 17 Teme ya yejchentes ta ton te ya xjuʼ ya xmilawan te jich ya xlaj yuʼun te ants winike, jaʼme jmilawal ya xkʼot. Yananixme skʼan ya yichʼ milel-a te jmilawale. 18 Teme ya yejchentes ta teʼ te ya xjuʼ ya xmilawan te jich ya xlaj yuʼun te ants winike, jaʼme jmilawal ya xkʼot. Yananixme skʼan ya yichʼ milel-a te jmilawale.

19 »›Te sfamilia te machʼa la yichʼ milel jaʼ ya smil te jmilawale. Te kʼalal ya stae jaʼnixme ya smil. 20 Teme jtul ants winik ya xlaj ta skaj te ay machʼa kotpʼinot* sok slab yoʼtan o ay bin chʼojbot tal sok sbolil yoʼtan 21 o teme ya xlaj ta skaj te ay machʼa majot yuʼun sok slab yoʼtan, te machʼa majot yuʼun yananixme skʼan ya yichʼ milel-a. Jaʼme jmilawal ya xkʼot. Te sfamilia te machʼa la yichʼ milel jaʼ ya smil te jmilawal te kʼalal ya stae.

22 »›Pero, teme ay machʼa te ma spasemaluk yoʼtan sok ma ta skajuk slab yoʼtan ay machʼa ya skotpʼin* o ay bin la schʼojbey bael te ma sokuk sbolil yoʼtan 23 o teme maba la sta ta ilel te kʼalal la schʼoj bael ton ta stojol, pero ma jaʼuk skontra ni jaʼuk snopoj te ya yutsʼin* te jich ya xlaj yuʼun te ants winik, 24 te juecetik ya yichʼik ta kʼop te machʼa la yaʼiy milaw sok te sfamilia te machʼa la yichʼ milel jaʼ chikan te mantaliletik ini. 25 Te juecetik yame skʼan ya skoltayik lokʼel te machʼa la yaʼiy milaw ta skʼab te sfamilia te machʼa la yichʼ milel sok yame sujtesik bael ta mukʼul lum yuʼun anibal te banti baem ta anel-ae. Yame skʼan ya xjil ta nainel tey-a jaʼto te kʼalal ya xlaj te mukʼul sacerdote te machʼa la yichʼ malbeyel chʼul aceite ta sjol.

26 »›Pero, teme ya xlokʼ ta stiʼil te mukʼul lum yuʼun anibal te jmilawal te banti bajt ta anele 27 sok teme taot ta fuera yuʼun te mukʼul lum yuʼun anibal te sfamilia te machʼa la yichʼ milel sok teme la yichʼ milel yuʼune, te sfamilia te machʼa la yichʼ milel maʼyuk smul ya xkʼot ta smalel chʼichʼ. 28 Melel te jmilawal ya skʼan te ya xnain jilel ta mukʼul lum yuʼun anibal jaʼto te kʼalal ya xlaj te mukʼul sacerdote. Pero, te kʼalal lajemix-a te mukʼul sacerdote, ya xjuʼ ya sujt bael ta skʼinal. 29 Te mantaliletik ini ya xtuun awuʼunik te kʼalal ay jich ya xkʼot ta pasel ta kajalkaj tsʼumbalil jaʼ chikan te banti yakex ta nainel.

30 »›Teme ay machʼa la smil jtul ants winik yame skʼan ya yichʼ milel te jmilawal jaʼnax teme ay chaʼoxtul testigoetik, pero maʼyuk machʼa ya skʼan ya yichʼ milel ta swenta jtulnax testigo. 31 Mame skʼan ya yichʼ tsakel stojol skuxlejal jtul jmilawal te ay ta swenta te lajele, melel yananixme skʼan te ya yichʼ milel. 32 Jaʼnix jich mame xa atsakbeyik stojol jtul jmilawal te baem ta anel ta mukʼul lum yuʼun anibal te jich ya xchaʼsujt bael ta nainel ta skʼinal te kʼalal mato lajem-a te mukʼul sacerdote.

33 »›Mame xa abolobtesbeyik skʼoplal te kʼinal te banti yakex ta nainel, melel te chʼichʼ ya sbolobtesbey skʼoplal te lumkʼinale, sok ma xjuʼ ya sta perdón te kʼinal ta swenta te chʼichʼ te la yichʼ malele jaʼnax teme ya yichʼ malbeyel schʼichʼel te machʼa milawane. 34 Mame xa abolobtesbeyik skʼoplal te kʼinal te banti yakex ta nainel, te banti yakon ta nainel-euk, melel joʼon Jehovaon te yakon ta nainel ta yolil te lum yuʼun Israel›».