Josué

20 Te Jehová jich la yalbey te Josué: 2 «Jichme xa awalbey te israeletik: ‹Tsaaik mukʼul lumetik yuʼun anibal* jich te bitʼil la kalbeyex ta swenta te Moisés, 3 swenta ya xjuʼ ya xbajt ta anel tey-a te machʼa ma spasemaluk yoʼtan ay machʼa la smile. Te lumetik ini yame xtuun awuʼunik yuʼun ya anakʼ abaik ta stojol te sfamilia te machʼa la yichʼ milele,* jichme maba ya smilex-a. 4 Te machʼa milawane yame skʼan ya xbajt ta anel ta junuk te lumetik ini, yame skʼan ya stejkʼan sba ta yochibal te lum sok yame scholbey yaʼiy te jwolwanejetik yuʼun te lum-abi te bin la spase. Te jwolwanejetik-abi yame yikʼik ochel ta lum sok yame yakʼbeyik te banti ya xnaine, teyme ya xnain ta yolilik. 5 Jich yuʼun, te jwolwanejetik yuʼun te lum-abi mame skʼan ya yakʼik te machʼa milawan ta skʼab te sfamilia te machʼa la yichʼ milele. Yame skʼan ya skoltayik, melel ma spasemaluk yoʼtan la smil te spatxujke sok maʼyuk slab yoʼtan ta stojol-a. 6 Teyme ya xjil ta nainel ta lum-abi, jaʼto te kʼalal ya yichʼ ichʼel ta kʼop yuʼun te juecetik, jaʼnix jich teyme ya xjil-a, jaʼto te kʼalal ya xlaj te machʼa ochem ta mukʼul sacerdote ta yorail-abi. Jich te machʼa milawane ya xjuʼ ya sujt ta sna sok ta mukʼul lum yuʼun, jaʼ te banti lokʼ tal ta anele›».

7 Jich chʼultesbil kʼotik* te mukʼul lumetik yuʼun anibal: te Quedes te ay ta Galilea ta witstikil yuʼun Neftalí, te Siquem te ay ta witstikil yuʼun Efraín, te Quiryat-Arbá, jaʼ te Hebrón te ay ta witstikil yuʼun Judá. 8 Ta skʼinal Jordán te ay ta stojol slokʼib kʼajkʼal yuʼun Jericó, jaʼ la yichʼ tsael te Bézer te ay ta jochol takin kʼinal ta spamlej te ay ta toyol te ay ta skʼinal te stsʼumbal Rubén; te Ramot ta Galaad te ay ta skʼinal stsʼumbal Gad; te Golán ta Basán te ay ta skʼinal stsʼumbal Manasés.

9 Jaʼik-abi te lumetik te la yichʼik tsael ta stojol te israeletik sok te jyanlumetik te ayik ta nainel ta yolilik. Jich yuʼun, chikan machʼauk-a te ma spasemaluk yoʼtan ay machʼa la smile, ya xjuʼ ya xbajt ta anel tey-a sok jich ma xmilot yuʼun te sfamilia te machʼa la yichʼ milel te kʼalal mato yichʼoj ichʼel ta kʼop yuʼun-a te juecetike.