Éxodo
30 »Yame apas jun skajtajib schikʼojibal pom ta acacia-teʼ. 2 Chanebme xujk ya yichʼ pasel te jun xujkʼubil* snajtil sok jun xujkʼubil sjamalul soknix cheb xujkʼubil* stoyolil. Te skajtajib schikʼojibal pom sok te xulubiletik yuʼun jun-naxme ya xkʼotik. 3 Yame apots ta batsʼil oro te sba, te spatpat sok te xulubiletik. Yame skʼan ya apasbey stiʼil ta oro ta sjoyobal. 4 Ta yeʼtal stiʼil ta schaʼjejchelul yame apasbey cheb chʼokowiletik ta oro. Tey ya yichʼ xojtiklanel ochel te teʼetik yuʼun ya yichʼ kʼechel bael. 5 Yame apas ta acacia-teʼ te steʼelul sok yame apotstiklan ta oro. 6 Yame awakʼ te skajtajib schikʼojibal pom ta yelaw te cortina te nopol* ay ta skaxaul Testigo Kʼop, ta stojol bael te smajkil te skaxaul Testigo Kʼop te banti ya xkʼoon ta atojol.
7 »Te Aarón yame schikʼ pom te sumetnax yikʼ* ta skajtajib. Jichme ya skʼan ya spas jujun sab yuʼun xtomet schʼailel te kʼalal yak ta schajpanel te kʼajkʼetike. 8 Kʼalal te Aarón ya stsum te kʼajkʼetik te kʼalal ya x-ijkʼubix-a te kʼinale,* jaʼnix jich yame skʼan ya schikʼ pom. Jaʼ jun majtanil ta swenta pom te ya yichʼ chikʼel ta spisil-ora ta stojol te Jehová ta kajalkaj tsʼumbalil. 9 Mame ayuk yan pom te maba akʼbil permiso te ya yichʼ chikʼel ta sba te schikʼojibal pom ni jaʼuk chikʼbil majtaniletik sok majtaniletik yuʼun sit awal tsʼunubiletik. Jaʼnix jich mame xa amalik ta sba malbil majtaniletik. 10 Te Aarón yame skʼan ya yakʼ jtebuk te schʼichʼel te majtanil ta swenta mulil ta xulubiletik yuʼun te skajtajib chikʼbil majtanil. Jaʼme jich ya yichʼ pasel jun buelta ta jujun jaʼbil ta kajalkaj tsʼumbalil ta swenta stael perdón. Te skajtajib chikʼbil majtanil merome chʼultesbil ta swenta te Jehová».
11 Tey-abi, te Jehová jich la yalbey te Moisés: 12 «Ta jujun buelta te kʼalal ya apas censo sok ya awajtay te snichʼnab Israel, ta jujuntul yame yakʼbeyik te Jehová te stojol skuxlejalik. Teme jich ya spasike, maba ya staik castigo te kʼalal ya yichʼik ajtayele. 13 Spisil te machʼatik ya yichʼik najkanbeyel sbiilik yame skʼan ya stojik olil siclo* yuʼun plata, jaʼ chikan te jayeb siclo ya yichʼ tuuntesel ta chʼul awilal. Te siclo ya skʼan te jaʼ pajal sok 20 guerá.* Te majtanil te ya yichʼ akʼbeyel te Jehová jaʼ olil siclo. 14 Spisil te machʼatik ya yichʼik ajtayel sok te 20 yaʼbilal o kʼaxemxan-a yame yakʼbeyik smajtan te Jehová. 15 Te jkʼulejetik ma jaʼuk toyolxan ya yakʼ sok te pobreetik ma jaʼuk pekʼelxan ya yakʼ jich te bitʼil olil siclo* yuʼun plata ya yichʼ akʼbeyel ta smajtan te Jehová ta swenta te stojol te akuxlejalike. 16 Yame atsak te takʼin* ya yakʼik te israeletik ta swenta te stojol kuxlejal sok yame awakʼ ta swenta te aʼtelil te ya yichʼ pasel ta nailpakʼ ta swenta tsoblej. Te takʼin-abi ya xtuun yuʼun ya sjultes ta yoʼtan te Jehová ta swenta te stojol skuxlejal te israeletike».
17 Jaʼnix jich, te Jehová jich la yalbey te Moisés: 18 «Yame apas yawil jaʼ te ya xtuun swenta pokojibal sok yame apasbey skajtajib. Ta schebal ya yichʼik pasel ta cobre. Yame awakʼ ta olil yuʼun te nailpakʼ ta swenta tsoblej sok te skajtajib chikʼbil majtanil sok yame anojes ta jaʼ. 19 Teyme ya spok yok skʼabik-a te Aarón sok te snichʼnabe. 20 Yame skʼan ya spok sbaik te kʼalal ya x-ochik ta nailpakʼ ta swenta tsoblej o kʼalal ya xnoptsajik* ta skajtajib chikʼbil majtanil yuʼun ya x-abatinik sok te kʼalal ya yakʼik chikʼbil majtaniletik te xtomet schʼailel ta stojol te Jehová. Teme jich ya spasike, maba ya xlajik. 21 Yame skʼan ya spok yok skʼabik yuʼun jich maba ya xlajik-a. Jaʼ jun mantalil te maba ya xlaj skʼoplal ta stojol te Aarón sok te stsʼumbal ta kajalkaj bael».
22 Jaʼnix jich, te Jehová jich la yalbey te Moisés: 23 «Ta patil lea tal te bintik ya xtuun te sumetnax yikʼ:* 500 siclo* yuʼun mirra te tonobenix, 250 siclo* yuʼun canela, 250 siclo yuʼun cálamo* 24 sok 500 siclo* yuʼun spat te casia-teʼ, jaʼ chikan te jayeb siclo ya yichʼ tuuntesel ta chʼul awilal, sok jun hin* aceite yuʼun oliva. 25 Ta spisil-abi yame apas chʼul aceite. Jichme ya yichʼ pasel te bitʼil ya spas te machʼa ya snaʼ spasel te pomadaetik. Jaʼme chʼul aceite te ay machʼa ya yichʼ malel ta sjol.
26 »Yame atuuntes yuʼun ya amalbey te nailpakʼ ta swenta tsoblej sok te skaxaul Testigo Kʼop, 27 jaʼnix jich ta sba te mesa sok spisil te bintik ya xtuun yuʼun, te skajtajib kʼajkʼ sok spisil te bintik ya xtuun yuʼun, te skajtajib schikʼojibal pom, 28 te skajtajib chikʼbil majtanil sok spisil te bintik ya xtuun yuʼun soknix te yawil jaʼ sok te skajtajibe. 29 Ya skʼan ya achʼulteslan swenta mero chʼultesbil ya xkʼotik. Spisil te machʼatik ya spikik te biluketik-abi yame skʼan te chʼultesbilik. 30 Yame amalbey aceite ta sjol te Aarón sok te snichʼnab sok yame achʼulteslan swenta ya xkʼotik ta sacerdoteetik kuʼun.
31 »Jaʼnix jich, jichme xa awalbey te israeletik: ‹Ta kajalkaj tsʼumbalil jaʼme ya yichʼ tuuntesel te chʼul aceite ini te kʼalal ay machʼa ya yichʼ tsael. 32 Mame ayuk machʼa ya yichʼ malbeyel ta sbakʼetal, sok mame xa apasik yan aceite te pajal soke. Chʼultesbil sok spisilme-ora ya skʼan te chʼultesbil ya awilike. 33 Machʼauk-a te ya spas yan aceite te pajal soke soknix teme ya yakʼbey te machʼa ma akʼbil permiso* ta yichʼele yame skʼan ya yichʼ milel›».
34 Tey-abi, te Jehová jich la yalbey te Moisés: «Lea tal sok pajalme yipal ya awichʼ tal te bintik ya xtuun te sumetnax yikʼe:* xuchʼil estacte-teʼ, uña te sumetnax yikʼ, xuchʼil gálbano-jaʼmal sok batsʼil sakal pom. 35 Yame atuuntes-abi yuʼun ya apas pom. Yame yichʼ kapel ta lek sok atsʼam te bintik sumetnax yikʼ,* jichme ya yichʼ pasel te bitʼil ya spas te machʼa ya snaʼ spasel te pomadaetik. Lek sok chʼultesbil ya xkʼot te bintik ya yichʼ kapele. 36 Yame ajuchʼ ta lek jtebuk te bintik la yichʼ kapel sok ya awakʼ jtebuk ta yelaw te skaxaul Testigo Kʼop te ay ta nailpakʼ ta swenta tsoblej te banti ya xkʼoon ta atojol. Te pom-abi, merome chʼultesbil ya xkʼot awuʼunik. 37 Mame xa apas yan pom te ya atuuntes te jich pajal soke. Spisilme-ora chʼultesbil ya awil jich te bitʼil ay bin chʼultesbil ta stojol te Jehová. 38 Machʼauk-a te ya spas yan pom jich bitʼil ini yuʼun ya yaʼiybey yikʼ te sumetnaxe* ya skʼan ya yichʼ milel».