1 Crónicas

15 Te David la spastiklan sna ta Mukʼul lum yuʼun David. Jaʼnix jich la schajpan te banti ya yakʼ te skaxaul chapbilkʼop yuʼun te smelelil Dios sok la stejkʼanbey snailpakʼul. 2 Jaʼ yorail te jich la yal te David: «Mame ayuk machʼa yan te ya xjuʼ ya yichʼ tal te skaxaul chapbilkʼop yuʼun te smelelil Dios, jaʼnaxme te levitaetik, melel jaʼ tsabilik yuʼun te Jehová yuʼun ya skʼechik te skaxaul chapbilkʼop yuʼun te Jehová sok te ya x-abatinik ta stojol ta spisil-ora». 3 Tey-abi, te David la stsob tal spisil te lum Israel ta Jerusalén swenta ya yichʼik moel tal te skaxaul chapbilkʼop yuʼun te Jehová ta yawil te banti la schajpanbeye.

4 Te David la stsob tal te stsʼumbal Aarón sok te levitaetik: 5 ta stsʼumbal Cohat jaʼ tal te Uriel te jaʼ jolal yuʼunik sok 120 ta tul yermanotak; 6 ta stsʼumbal Merarí jaʼ tal te Asaya te jaʼ jolal yuʼunik sok 220 ta tul yermanotak; 7 ta stsʼumbal Guersom jaʼ tal te Joel te jaʼ jolal yuʼunik sok 130 ta tul yermanotak; 8 ta stsʼumbal Elizafán jaʼ tal te Semaya te jaʼ jolal yuʼunik sok 200 ta tul yermanotak; 9 ta stsʼumbal Hebrón jaʼ tal te Eliel te jaʼ jolal yuʼunik sok 80 ta tul yermanotak; 10 ta stsʼumbal Uziel jaʼ tal te Aminadab te jaʼ jolal yuʼunik sok 112 ta tul yermanotak. 11 Jaʼnix jich, te David la stsob tal te sacerdoteetik jaʼ te Sadoc sok te Abiatar soknix te levitaetik jaʼ te Uriel, Asaya, Joel, Semaya, Eliel sok te Aminadab, 12 jich la yaltiklanbey: «Te jaʼexe jaʼ jolalex yuʼun te jujunchajp stsʼumbal te antiguo ameʼ atatik te levitaetike. Chʼultesa abaik te jaʼex sok te awermanotakike, ichʼaik moel tal te skaxaul chapbilkʼop yuʼun te Jehová te Dios yuʼun Israel ta yawil te banti la jchajpanbeye. 13 Ta skaj te ma jaʼuk la awichʼik tal te sbabial bueltae, ilin ta jtojolkotik te Jehová te Dios kuʼuntike, melel ma la jtʼuntik ta lek te bitʼil ya skʼan pasele». 14 Jich yuʼun la schʼultes sbaik te sacerdoteetik sok te levitaetik yuʼun ya skʼechik moel tal te skaxaul chapbilkʼop yuʼun te Jehová te Dios yuʼun Israel.

15 Jich yuʼun, te levitaetik la skajanik tal ta snejkʼelik te skaxaul chapbilkʼop yuʼun te smelelil Dios, jaʼ la skʼechik tal sok te steʼele, jich te bitʼil la yal ta mantal te Moisés ta swenta skʼop te Jehová. 16 Te David la yaltiklanbey te jolaletik yuʼun te levitaetik te yakuk yalbey te yermanotakik te jaʼ te machʼatik ay ta swentaik kʼayoj te yakuk xkʼayojinik sok sbujtsʼ yoʼtanik soknix te yakuk stijik aʼtejibaletik yuʼun música jich bitʼil te aʼtejibaletik yuʼun música te ay scuerdail, arpaetik soknix te sepseptakʼin te stsintsun skʼope.

17 Jich yuʼun, te levitaetik jaʼ la stsaik ta yolil te yermanotakik te Hemán snichʼan Joel, te Asaf snichʼan Berekías sok te Etán snichʼan Cusayá te talem ta stsʼumbal Merarí. 18 Jokinbilik yuʼun te yantik yermanotakik te jaʼik te schebal grupo: te Zacarías, Ben, Jaaziel, Semiramot, Jehiel, Uní, Eliab, Benaya, Maaseya, Matitías, Elifelehu, Micneyá sok te jkanantiʼnailetik te jaʼ te Obed-Edom sok te Jeiel. 19 Te Hemán, Asaf sok te Etán te jaʼik te machʼatik ya xkʼayojinik jaʼ ya stijik te sepseptakʼin te stsintsun skʼop te pasbil ta cobre; 20 te Zacarías, Aziel, Semiramot, Jehiel, Uní, Eliab, Maaseya sok te Benaya jaʼ ya stijik te aʼtejibaletik yuʼun música te ay scuerdail te chajpanbil snukʼul ta alamot;* 21 te Matitías, Elifelehu, Micneyá, Obed-Edom, Jeiel sok te Azazías jaʼ ya stijik te arpa te chajpanbil snukʼul ta seminit* sok jaʼik te machʼatik ya xwolawanik ta kʼayoj. 22 Te Kenanías te jaʼ jolal yuʼun te levitaetik jaʼ tojobteswan te kʼalal la yichʼ kʼechel bael te skaxaul chapbilkʼop, melel ya snaʼ tojobteswanej ta lek. 23 Te Berekías sok te Elcaná jaʼ ya skanantayik te tiʼnail te banti kʼot te skaxaul chapbilkʼope. 24 Te Sebanías, Josafat, Netanel, Amasái, Zacarías, Benaya sok te Eliezer te jaʼik sacerdoteetik tulan ya yokʼesinik te trompetaetik ta stojol te skaxaul chapbilkʼop yuʼun te smelelil Diose. Jaʼnix jich, te Obed-Edom sok te Jehías jaʼ ya skanantayik te tiʼnail te banti kʼot te skaxaul chapbilkʼop.

25 Jich yuʼun, te David, te jwolwanejetik yuʼun te Israel sok te capitanetik yuʼun jmil ta tul soldadoetik tseʼelnax yoʼtan bajt yichʼik tal te skaxaul chapbilkʼop yuʼun te Jehová te ay ta sna te Obed-Edom. 26 Ta swenta te koltayotik yuʼun te smelelil Dios te levitaetik ta yichʼel tal te skaxaul chapbilkʼop yuʼun te Jehová, la yakʼik ta milbil majtanil juk-kojt jkolel* toroetik sok juk-kojt tat tuminchijetik. 27 Te David slapoj najtil kʼuʼul te maʼyuk skʼab te pasbil ta lekil pakʼ, jaʼnix jich slapojik-euk spisil te levitaetik te yichʼojik tal te skaxaul chapbilkʼop, te machʼatik ya xkʼayojinik sok te Kenanías te jolal yuʼun te machʼatik la skʼechik tal te skaxaul chapbilkʼop sok te machʼatik ya xkʼayojinik; jaʼnix jich te David slapoj jlijkʼ efod* te pasbil ta lino. 28 Spisil te israeletik tseʼelnax yoʼtanik yakik ta aw te bitʼil la yichʼik moel te skaxaul chapbilkʼop yuʼun te Jehová sok yakik ta yokʼesinel xulubil, trompetaetik sok te sepseptakʼin te stsintsun skʼope, jaʼnix jich kʼax tulan yakik ta stijel te aʼtejibaletik yuʼun música te ay scuerdail sok te arpaetik.

29 Pero, te kʼalal och bael te skaxaul chapbilkʼop yuʼun te Jehová ta Mukʼul lum yuʼun David, te Mical, te yantsil nichʼan te Saúl, la yil koel ta ventana te yak ta wilawetel ta spasel kʼin te ajwalil David, jajch spʼaj ta yoʼtan.