Números

33 Jaʼ jich te bitʼil beenik te lum yuʼun Israel te kʼalal ta tsojboltsojb* lokʼik tal ta Egipto te wentainbilik yuʼun te Moisés sok te Aarón. 2 Te Moisés la stsʼibay te banti ya xbeenik kʼaxel jich bitʼil albot ta mantal yuʼun te Jehová. Jaʼik ini te lugaretik te banti kʼaxik bael. 3 Lokʼik bael ta Ramesés ta skʼajkʼalel 15 yuʼun te sbabial u. Ta yan kʼajkʼal te kʼalal spasojikix-a te Kʼin yuʼun Pascua, te israeletik jun yoʼtan* lokʼik bael ta sit spisil te egipcioetik. 4 Yan stukel te egipcioetik yakik ta smukel-a spisil te sba snichʼanik te milotik yuʼun te Jehová, melel te Jehová la yichʼ ta kʼop sok la yakʼbey castigo te diosetik yuʼunike.

5 Jich yuʼun, te israeletik lokʼik bael ta Ramesés, kʼot spas scampamentoik ta Sucot. 6 Tey-abi lokʼik bael ta Sucot, kʼot spas scampamentoik ta Ezam, te banti ya xjajch te jochol takin kʼinal. 7 Lokʼik bael ta Ezam, la yakʼik buelta jich bajtik ta Pihahirot, teyto te banti kʼalal ya xjuʼ ya staik ta ilel te Baal-Zefón, kʼot spas scampamentoik ta Migdol. 8 Ta patil lokʼik bael ta Pihahirot, kʼaxik bael ta yolil te mar, kʼotik ta jochol takin kʼinal. Beenik bael oxeb kʼajkʼal ta jochol takin kʼinal Ezam, kʼot spas scampamentoik ta Mará.

9 Tey-abi lokʼik bael ta Mará, kʼotik ta Elim. Ta Elim ay 12 slokʼib jaʼetik sok 70 ta jpejt* palmeraetik, jich yuʼun tey la spasik-a te scampamentoik. 10 Lokʼik bael ta Elim, kʼot spas scampamentoik ta nopol* mar Rojo. 11 Ta patil lokʼik bael ta mar Rojo, kʼot spas scampamentoik ta jochol takin kʼinal Sin. 12 Lokʼik bael ta jochol takin kʼinal Sin, kʼot spas scampamentoik ta Dofcá. 13 Ta patil lokʼik bael ta Dofcá, kʼot spas scampamentoik ta Alús. 14 Lokʼik bael ta Alús, kʼot spas scampamentoik ta Refidim te banti maʼyuk la sta jaʼ yuchʼik te israeletike. 15 Ta patil lokʼik bael ta Refidim, kʼot spas scampamentoik ta jochol takin kʼinal Sinaí.

16 Lokʼik bael ta jochol takin kʼinal Sinaí, kʼot spas scampamentoik ta Quibrot-Hataavá. 17 Tey-abi lokʼik bael ta Quibrot-Hataavá, kʼot spas scampamentoik ta Hazerot. 18 Lokʼik bael ta Hazerot, kʼot spas scampamentoik ta Ritmá. 19 Ta patil lokʼik bael ta Ritmá, kʼot spas scampamentoik ta Rimón-Pérez. 20 Lokʼik bael ta Rimón-Pérez, kʼot spas scampamentoik ta Libná. 21 Ta patil lokʼik bael ta Libná, kʼot spas scampamentoik ta Risá. 22 Lokʼik bael ta Risá, kʼot spas scampamentoik ta Quehelatá. 23 Tey-abi lokʼik bael ta Quehelatá, kʼot spas scampamentoik ta wits Séfer.

24 Ta patil lokʼik bael ta wits Séfer, kʼot spas scampamentoik ta Haradá. 25 Lokʼik bael ta Haradá, kʼot spas scampamentoik ta Maquelot. 26 Tey-abi lokʼik bael ta Maquelot, kʼot spas scampamentoik ta Táhat. 27 Lokʼik bael ta Táhat, kʼot spas scampamentoik ta Taré. 28 Ta patil lokʼik bael ta Taré, kʼot spas scampamentoik ta Mitcá. 29 Lokʼik bael ta Mitcá, kʼot spas scampamentoik ta Hasmoná. 30 Tey-abi lokʼik bael ta Hasmoná, kʼot spas scampamentoik ta Bene-Jaacán. 31 Lokʼik bael ta Moserot, kʼot spas scampamentoik ta Bene-Jaacán. 32 Lokʼik bael ta Bene-Jaacán, kʼot spas scampamentoik ta Hor-Haguidgad. 33 Ta patil lokʼik bael ta Hor-Haguidgad, kʼot spas scampamentoik ta Jotbatá. 34 Lokʼik bael ta Jotbatá, kʼot spas scampamentoik ta Abroná. 35 Tey-abi lokʼik bael ta Abroná, kʼot spas scampamentoik ta Ezión-Guéber. 36 Lokʼik bael ta Ezión-Guéber, kʼot spas scampamentoik ta jochol takin kʼinal Zin, jaʼ te Cadés.

37 Tey-abi lokʼik bael ta Cadés, kʼot spas scampamentoik ta wits Hor, ta stiʼil skʼinal Edom. 38 Te sacerdote Aarón mo bael ta wits Hor jich bitʼil la yal ta mantal te Jehová, tey laj-a ta jaʼbil 40 te kʼalal lokʼemikix tal te israeletik ta skʼinal Egipto, ta sbabial kʼajkʼal yuʼun te yoʼebal u. 39 Ayix 123 yaʼbilal-a te Aarón te kʼalal laj ta wits Hor.

40 Te ajwalil yuʼun Arad, te cananeo-winik te yak ta nainel ta Négueb ta skʼinal Canaán, la yaʼiy stojol te yakik ta talel te israeletike.

41 Ta patil lokʼik bael ta wits Hor, kʼot spas scampamentoik ta Zalmoná. 42 Lokʼik bael ta Zalmoná, kʼot spas scampamentoik ta Punón. 43 Lokʼik bael ta Punón, kʼot spas scampamentoik ta Obot. 44 Tey-abi lokʼik bael ta Obot, kʼot spas scampamentoik ta Iyé-Abarim ta stiʼil skʼinal Moab. 45 Lokʼik bael ta Iyim, kʼot spas scampamentoik ta Dibón-Gad. 46 Ta patil lokʼik bael ta Dibón-Gad, kʼot spas scampamentoik ta Almón-Diblataim. 47 Tey-abi lokʼik bael ta Almón-Diblataim, kʼot spas scampamentoik ta witstikil yuʼun Abarim te nopol* yiloj sba sok te Nebo. 48 La sta yorail te lokʼik bael ta witstikil yuʼun Abarim, kʼot spas scampamentoik ta spamlej jochol takin kʼinal yuʼun Moab, ta nopol* Jordán ta stojol bael Jericó. 49 La spas scampamentoik ta stiʼil mukʼul jaʼ Jordán te jajch tal ta Bet-Jesimot kʼalalto ta Abel-Sitim, ta spamlej jochol takin kʼinal yuʼun Moab.

50 Te Jehová la skʼopon te Moisés ta spamlej jochol takin kʼinal yuʼun Moab, ta nopol* Jordán ta stojol bael Jericó, jich la yalbey: 51 «Kʼopona te israeletik sok jich xa awaltiklanbey: ‹Yame xkʼaxex bael ta mukʼul jaʼ Jordán yuʼun ya x-ochex bael ta skʼinal Canaán. 52 Yame skʼan ya atentiklanik lokʼel ta atojolik spisil te yajwalul te lume sok yame skʼan ya ajinik spisil te lokʼombaetik ta ton sok te lokʼombaetik pasbilik ta ultesbil takʼin, jaʼnix jich yame skʼan ya awuytiklanik spisil te toyol chʼul awilaletik yuʼunik. 53 Yame awichʼik te kʼinal yuʼun ya xnainex tey-a, melel yananix kakʼbeyex awuʼuninik te kʼinale. 54 Ta swenta suerte yame skʼan ya apukik te kʼinal ta yolil te afamiliaik. Mukʼme skʼinal ya skʼan ya awakʼbeyik te jujuntsojb te jaʼ bayalikxan, yan te jujuntsojb te ma bayalike ma mukʼuk te skʼinalik ya awakʼbeyik. Jaʼ chikan te bin ya xlokʼ ta swenta suerte yame awichʼik te akʼinalike. Jaʼ chikan te jujunchajp stsʼumbal te ameʼ atatik jichme ya awichʼik te akʼinalike.

55 »›Yan teme maba ya atenik lokʼel ta atojolik te yajwalul te lume, te machʼatik ya xjil awuʼunik tey-a, jichme ya xkʼotik te bin-utʼil tsʼubil lum ta asitik sok jich te bin-utʼil chʼix ta amoch bakelik,* yame xbajt yutsʼinex* ta kʼinal te banti ya xnainex. 56 Jaʼexme ya xkʼot ta atojolik te bin jnopoj te ya jpasbeyike›».