Apocalipsis

8 Kʼalal la sjam te sjukebal sello te Jkolel* Tuminchije, chʼabalnax kʼinal kʼot ta chʼulchan oliluk ora. 2 La kil te juktul chʼul-abatetik te tekʼajtik ta stojol te Diose, sok la yichʼik akʼbeyel jukeb trompetaetik.

3 Tal yan chʼul-abat te yichʼoj tal yawil schikʼojibal pom te pasbil ta oro yuʼun ya schikʼ pom, tekʼel jilel ta stsʼeel te skajtajib chikʼbil majtanil. La yichʼ akʼbeyel bayal pom yuʼun ya schikʼ ta skajtajib te chikʼbil majtanil te pasbil ta oro te ay ta stojol te mukʼul naktajibal te kʼalal la yichʼik aʼiybeyel te s-oracionik te machʼatik chʼultesbilike. 4 Ta skʼab te chʼul-abat xtomet moel schʼailel te pom ta stojol te Dios, soknix te oración yuʼunik te machʼatik chʼultesbilike. 5 Pero, te chʼul-abat oranax la stsak te yawil schikʼojibal pom, la snojes ta kʼajkʼ te ay ta skajtajib chikʼbil majtanil sok la schʼoj koel tal ta balumilal. Chiknaj chawuk, tsantsewal, tulan nijkel sok ay machʼatik la kaʼiy te tulan kʼopojike. 6 Te juktul chʼul-abatetik la schajpan sbaik yuʼun ya yokʼesinik te jukeb trompetaetike.

7 Te sbabial chʼul-abat la yokʼesin te strompeta. Chiknaj bat sok kʼajkʼ te kapal ta chʼichʼ, sok la yichʼ chʼojel koel tal ta balumilal. Laj ta kʼajkʼel jun ta yox-xejtʼel te balumilale; jaʼnix jich laj ta kʼajkʼel jun ta yox-xejtʼel te teʼetik ta balumilale sok laj ta kʼajkʼel spisil te yaxal akiltik ta balumilal.

8 Te schebal chʼul-abat la yokʼesin te strompeta. Tey-abi ay bin chiknaj te jich yilel te bin-utʼil mukʼul wits te yak ta tilel, la yichʼ chʼojel koel tal ta mar. Jun ta yox-xejtʼel te mar kʼatpʼuj ta chʼichʼ; 9 jun ta yoxchajpal te bintik kuxajtik ta mar, lajik, sok jun ta yoxchajpal te barcoetik jinik ta jkʼaxel.

10 Te yoxebal chʼul-abat la yokʼesin te strompeta. Tey-abi chʼay koel tal ta chʼulchan jun mukʼul ekʼ te jich yak ta tilel te bin-utʼil tsumbil kʼajkʼ. Jul ta stojol jun ta yox-xejtʼel te mukʼul jaʼetik sok te slokʼib jaʼetik. 11 Chʼaal jaʼmal* sbiil te ekʼe. Sok chʼaub jun ta yox-xejtʼel te jaʼetike. Bayal ants winiketik lajik yuʼun ta skaj te chʼaub te jaʼe.

12 Te schanebal chʼul-abat la yokʼesin te strompeta. Tey-abi la yichʼ ejchentesel jun ta yox-xejtʼel te kʼajkʼale, jun ta yox-xejtʼel te u sok jun ta yox-xejtʼel te ekʼetike. Jich yuʼun, jun ta yox-xejtʼel ijkʼubik sok jun ta yox-xejtʼel te kʼajkʼaleltik maʼyuk sakal kʼinal, jaʼnix jich ya xkʼot ta stojol-euk te ajkʼabale.

13 La kil sok la kaʼiy stojol te yak ta wilel jkojt águila ta yolil chʼulchan te jich tulan yak ta yalel: «¡Ayme swokolik! ¡Ayme swokolik! ¡Ayme swokolik te machʼatik nainemik ta balumilal ta skaj te nopol* ya yokʼesinikix te trompetaetik te oxtulxan chʼul-abatetike!».