Números

22 Te israeletik lokʼik bael tey-a, kʼot spas scampamentoik ta spamlej jochol takin kʼinal yuʼun Moab ta jejch mukʼul jaʼ Jordán ta stojol bael Jericó. 2 Te Balac snichʼan Zipor la yil spisil te bin la yichʼ pasbeyel te amorreoetik yuʼun te israeletik, 3 te Moab bayal la xiʼ te lum-abi ta swenta te kʼax bayalik. Ta melel, te Moab yakik ta nijkel yuʼun xiwel ta skaj te israeletik. 4 Jaʼ yuʼun, te Moab jich la yalbey te jwolwanejetik yuʼun te Madián: «Spisil te ants winiketik ini yame slajinlan spisil te bin ay ta joyobaltik, jich te bin-utʼil jkojt toro te ya slajin te jaʼmal* ta kʼinal».

Ta yorail-abi, te Balac snichʼan Zipor jaʼ ajwalil yuʼun Moab. 5 Te Balac la stikun bael winiketik ta stojol te Balaam snichʼan Beor, te ay ta skʼinal Petor te ay ta nopol* mukʼul jaʼ Éufrates, te jaʼnix slumale. Jich la stikun ta albeyel: «Ilawil, ay jpam lum te lokʼik tal ta Egipto. Snojesojikix spamal te kʼinal sok nopol yakik ta nainel ta jtojol. 6 Awokoluk, laʼ sok bolkʼoptaya te lum ini, melel jaʼ bayalxan yipik te bitʼil te joʼone. Yaniwan xjuʼ ya jtsaltiklan sok ya jtentiklan lokʼel ta lum ini, melel ya jnaʼ ta lek te machʼa ya akʼanbey bendición ta stojol ya yichʼ bendición; te machʼa ya abolkʼoptay, boloben skʼoplal ya xkʼot».

7 Jaʼ yuʼun, te jwolwanejetik yuʼun te Moab sok te jwolwanejetik yuʼun te Madián la yichʼik bael te takʼin swenta naʼojel. Bajt yilik te Balaam sok la yalbeyik yaʼiy te bin la stikun ta alel te Balac. 8 Te Balaam jich la yaltiklanbey: «Jilanik te ajkʼabal ini, chikan te bin ya yalbon te Jehová ya kalbeyex awaʼiyik». Jich yuʼun, te machʼatik yichʼoj mukʼ yaʼtelik ta Moab jilik sok te Balaam.

9 Te Dios la skʼopon te Balaam, jich la yalbey: «¿Machʼatik-a te winiketik ini te sjokinojate?». 10 Te Balaam jich la yalbey te smelelil Dios:* «Te Balac snichʼan Zipor, te ajwalil yuʼun Moab, ay bin la stikunbon tal ta alel: 11 ‹Ilawil, te lum te lokʼ tal ta Egipto yakik ta snojesel spamal te lume. Awokoluk, laʼme ta ora sok bolkʼoptaylana. Yaniwan xjuʼ ya kakʼbey guerra sok ya jtentiklan lokʼel›». 12 Pero, jich albot yuʼun Dios te Balaam: «Mame xbaat sok. Mame xa abolkʼoptay te lume, melel yichʼojik bendición».

13 Kʼalal jajch ta sab te Balaam, jich la yalbey te machʼatik yichʼoj mukʼ yaʼtelik yuʼun te Balac: «Sujtanik bael ta alumalik, melel te Jehová maba ya yakʼ te ya jokinex sujtel». 14 Te machʼatik yichʼoj mukʼ yaʼtelik ta Moab sujtik bael, jich kʼot yalbeyik te Balac: «Te Balaam maba la skʼan sjokinotik tal».

15 Pero, te Balac lananix schaʼtikun bael yantik te machʼatik yichʼojxan mukʼ yaʼtelik, jaʼ bayalikxan sok jaʼ mukʼxan skʼoplalik. 16 Bajtik ta stojol te Balaam sok jich la yalbeyik: «Jich la yal tal te Balac snichʼan Zipor: ‹Awokoluk, maʼyuk bin xa awakʼ smakat yuʼun ya xtalat ta jtojol, 17 melel ya kakʼ te bayal ya awichʼ ichʼel ta mukʼ sok ya jpas spisil te bin ya akʼanbone. Awokoluk, laʼme sok bolkʼoptaylana te lum ini›». 18 Jaʼ yuʼun, te Balaam jich la sjakʼbey te j-abatetik yuʼun te Balac: «Manchukme te Balac ya yakʼbon te sna te nojel ta plata sok oro, maʼyuk bin yan ya xjuʼ ya jpas chikan teme mukʼ skʼoplal o maʼyuk swentail, jaʼnax ya jpas te bin la yalbon ta mantal te Jehová te Dios kuʼune. 19 Pero, awokolukik, jilanikxan ta ajkʼabal ini yuʼun ya jnaʼ te binxan ya yalbon te Jehová».

20 Jich te Dios kʼopoj sok te Balaam ta ajkʼabal, jich la yalbey: «Teme talem te winiketik ini yuʼun ya yikʼatik bael, jokinlana bael. Pero jaʼnaxme ya awal te bin ya kalbate». 21 Jich yuʼun, sab jajch te Balaam ta yan kʼajkʼal, la schajpan te sburra, jich bajt sok te machʼatik yichʼojik mukʼ yaʼtelik yuʼun Moab.

22 Pero, te Dios ilin ta skaj te bajte, te chʼul-abat yuʼun te Jehová la yakʼ sba ta be yuʼun ma xyakʼ kʼaxel te Balaam. Kajal bael ta sburra te Balaam sok jokinbil bael yuʼun chaʼtul j-abatetik yuʼun. 23 Kʼalal te burra la yil te tekʼel ta be te chʼul-abat yuʼun te Jehová sok te stsakoj te espada yuʼune, kʼan lokʼuk bael ta be sok kʼan ochuk bael ta akiltik. Pero, te Balaam jajch smaj te sburra yuʼun ya sujt tal ta be. 24 Jich yuʼun, te chʼul-abat yuʼun te Jehová la stejkʼan sba ta be te chʼin-nax sjamalul te ay tsʼusubiltik ta jujunjejch, ay stsʼajkʼul pasbil ta ton ta jujunjejch. 25 Kʼalal te burra la yil te chʼul-abat yuʼun te Jehová, jajch sten sba bael ta tsʼajkʼ, la stenbey yok te Balaam ta tsʼajkʼ, jich yuʼun te Balaam la schaʼmaj te burrae.

26 Te chʼul-abat yuʼun te Jehová nailajxan bael yuʼunik, la stejkʼan sba ta be te chʼin-nax sjamalul te banti ma xjuʼ ta joytayel ni ta waʼel ni ta kʼexam.* 27 Kʼalal te burra la yil te chʼul-abat yuʼun te Jehová, la spajkan sba ta lum. Bayal ilin te Balaam te la schaʼmaj sok te snabateʼ. 28 Tey-abi, te Jehová la yakʼ kʼopojuk* te burra, jich la yalbey te Balaam: «¿Bin la jpasbat te oxeb buelta la amajonixe?». 29 Te Balaam jich la yalbey te burra: «La awakʼon ta kʼexlal. ¡Te ayuk espada kuʼune, la jmilatix te jichuke!». 30 Te burra jich la yalbey te Balaam: «¿Mabal joʼukon te burra te akajtajibinoj te jayeb kʼajkʼal kuxulat jaʼto ta ora ini? ¿Aybal bin-ora jich jpasoj ta atojol?». «¡Maʼuk!», xchi te Balaam. 31 Te Jehová la sjambey sit te Balaam, jich la yil te chʼul-abat yuʼun te Jehová te ay ta be te stsakoj te espada yuʼune. Te Balaam ta oranax la skejan sba sok la snijan sba ta lum.

32 Te chʼul-abat yuʼun te Jehová jich la yalbey: «¿Bin yuʼun te oxebix buelta la amaj te aburrae? Ilawil, joʼonme te la jmakbat te abe, melel ma jaʼuk skʼanojel koʼtan te banti yakat ta baele. 33 La yilon te burra sok oxeb buelta kʼan sjoytayon. ¡Nopanax awaʼiy te manchuk jich la spase! La jmilatix te jichuke, yan te burra la kakʼ te kuxul ya xjil stukele». 34 Te Balaam jich la yalbey te chʼul-abat yuʼun te Jehová: «La jta jmul, melel maba jnaʼoj-a te jaʼat yak amakbelon te jbee, jich yuʼun teme maba lek ya awil te bin yakon ta spasele, ya sujton bael». 35 Te chʼul-abat yuʼun te Jehová jich la yalbey te Balaam: «Baan sok te winiketik. Pero, jaʼnaxme ya awal te bin ya kalbate». Jich te Balaam bajt sok te machʼatik yichʼoj mukʼ yaʼtelik yuʼun te Balac.

36 Kʼalal la yaʼiy stojol te Balac te kʼot te Balaam, ta oranax bajt sta sba sok ta mukʼul lum yuʼun Moab, te nopol* ay ta mukʼul jaʼ Arnón te ay ta stiʼil skʼinal Moab. 37 Te Balac jich la yalbey te Balaam: «¿Mabal lajuk jtikunat ta ikʼel? ¿Bin yuʼun ma talat te banti ayone? ¿Yuʼunbal ma xjuʼ kuʼun te ya kakʼat ta ichʼel ta mukʼ?». 38 Te Balaam jich la yalbey te Balac: «Liʼ ayonix ta atojol. Pero ma jnaʼ teme ay bin ya xjuʼ ya kalbate. Jaʼnax ya kalbat te bin ya yakʼbon ta ke te Diose».

39 Jich yuʼun, te Balaam bajt sok te Balac, kʼotik ta Quiryat-Huzot. 40 Te Balac la smil wakaxetik sok tuminchijetik, la stikunbey jtebuk te Balaam sok te machʼatik yichʼoj mukʼ yaʼtelik te jokinbil yuʼun-ae. 41 Ta yan kʼajkʼal, te Balac la yikʼ moel te Balaam ta Bamot-Baal; teyto-a ya sta ta ilel spisil te lume.