Deuteronomio

16 »Te kʼalal ya xkʼot te u yuʼun abib,* yame apas te Kʼin Pascua yuʼun te Jehová te Dios awuʼunik, melel te Jehová te Dios awuʼunik la slokʼesex tal ta skʼinal Egipto ta ajkʼabal ta yuilal abib. 2 Ya skʼan ya amilik te majtanil te ya yichʼ akʼel ta Kʼin Pascua ta swenta te Jehová te Dios awuʼunik, yame awakʼik tuminchijetik, tentsunetik sok wakaxetik ta lugar te ya stsa te Jehová yuʼun tey ya yichʼ ichʼel ta mukʼ te sbiile. 3 Mame xa aweʼik sok te bin yichʼoj levadura. Jukebme kʼajkʼal ya skʼan ya aweʼik pan te maba yichʼoj levadura —pan ta swenta wokolil—, melel animal lokʼex tal ta skʼinal Egipto. Pasa ini yuʼun jich te jayeb kʼajkʼal kuxulex yame xjul ta awoʼtanik te bin kʼajkʼalil lokʼex tal ta skʼinal Egipto. 4 Jukeb kʼajkʼal mame skʼan te ayuk te bin pajubtesbil awuʼunik ta spamal te akʼinalik. Te milbil majtanil te ya yichʼ akʼel ta xmal kʼajkʼal ta sbabial kʼajkʼal, mame xa akʼejik xujtʼuk tiʼbal swenta yan kʼajkʼal. 5 Mame xa amilik te majtanil ta swenta te Kʼin yuʼun Pascua ta bayuk mukʼul lumetik te ya yakʼbeyex te Jehová te Dios awuʼunik. 6 Yame skʼan ya apasik ta lugar te banti ya stsa te Jehová te Dios awuʼunik yuʼun tey ya yichʼ ichʼel ta mukʼ te sbiile. Yame skʼan ya amilik te majtanil ta swenta te Kʼin yuʼun Pascua te kʼalalnax yak ta malel te kʼajkʼale, te bin kʼajkʼalil lokʼex tal ta skʼinal Egipto. 7 Woaik ta kʼajkʼ sok weʼaik te tiʼbal ta lugar te banti ya stsa te Jehová te Dios awuʼunik, ta sab ta yan kʼajkʼal ya xjuʼ ya sujtex bael ta anailpakʼik. 8 Wakeb kʼajkʼal yame skʼan ya aweʼik pan te maba yichʼoj levadura, ta sjukebal kʼajkʼal yame skʼan ya yichʼ pasel jun mukʼul tsoblej te kʼax mukʼ skʼoplal ta stojol te Jehová te Dios awuʼunik. Mame skʼan ya apasik biluk aʼtelil.

9 »Yame skʼan ya awajtayik jukeb semana. Ya skʼan xjajch awajtayik te jukeb semana te kʼalal ya xjajchex ta sbojel ta hoz* te sit awal tsʼunubiletik ta sbabial buelta. 10 Te kʼalal kʼaxix te jukeb semanae, yame skʼan ya apasik te Kʼin yuʼun te Semanaetik ta stojol te Jehová te Dios awuʼunik te kʼalal ya awakʼbeyik smajtan te spasemal awoʼtan ya awakʼik jaʼ chikan te jayeb bendición yakʼojbeyex te Jehová te Dios awuʼunik. 11 Yame skʼan tseʼeluk awoʼtanik ta stojol te Jehová te Dios awuʼunik —jaʼex sok te akerem nichʼnabik, awantsil nichʼnabik, amosoik, acriadaik sok te levitaetik te yakik ta nainel ta awolilik, te jyanlumetik, te alaletik te lajem statik sok te meʼba antsetik te yakik ta nainel ta awolilik— ta lugar te banti ya stsa te Jehová te Dios awuʼunik yuʼun tey ya yichʼ ichʼel ta mukʼ te sbiile. 12 Julukme ta awoʼtanik te la awichʼik mosoinel ta skʼinal Egipto, jich yuʼun chʼuunaik spasel te mantaliletik ini.

13 »Jukeb kʼajkʼal yame skʼan ya apasik te Kʼin yuʼun te axibal naetik,* te kʼalal ya sta yorail te ya yichʼ tsobel te sit awal tsʼunubil te ya xtal ta skʼiyojibal sok te aceite sok te vino te ya xlokʼ tal ta spʼeojibal.* 14 Tseʼelukme awoʼtanik ta spasel kʼin, jaʼex sok te akerem nichʼnabik, awantsil nichʼnabik, amosoik, acriadaik, te levitaetik, te jyanlumetik, te alaletik te lajem statik sok te meʼba antsetik te yakik ta nainel ta awolilik. 15 Jukebme kʼajkʼal ya skʼan ya apasik kʼin ta stojol te Jehová te Dios awuʼunik ta lugar te banti ya stsa te Jehová, melel te Jehová te Dios awuʼunik ya yakʼbeyex bendición ta spisil te sit ya xlokʼ yuʼun te awal tsʼunubil awuʼunik sok ta spisil te bin ya apasik, tseʼelme awoʼtanik yuʼun.

16 »Oxeb buelta ta jujun jaʼbil spisil te winiketik yame skʼan ya xtalik ta stojol te Jehová te Dios awuʼunik ta lugar te banti ya stsa: ta yorail te Kʼin yuʼun pan te maba yichʼoj levadura, te Kʼin yuʼun Semanaetik sok te Kʼin yuʼun te axibal naetik, mame ayuk machʼa jochol skʼab ya xtal ta stojol te Jehová. 17 Te majtanil ya yichʼ bael ta jujuntul jaʼ chikan te bendición akʼbot yuʼun te Jehová te Dios awuʼunik.

18 »Ayme machʼatik ya awakʼbey yaʼtel ta juecetik sok ta jwentainwanejetik ta jujunchajp atsʼumbalik ta spisil te mukʼul lumetik te ya yakʼbeyex te Jehová te Dios awuʼunik, sok stojil yame skʼan ya schajpanik te lume. 19 Mame xa ajowijtesik te bin stojil ta pasel sok mame ayuk machʼanax tsabil awuʼunik, jaʼnix jich mame xa atsakik majtaniletik, melel te majtaniletik ya smakbey sit te machʼatik pʼijike sok ya sjowijtesbey skʼop te machʼatik toj yoʼtanik. 20 Te bin stojil ta pasel, jaʼnaxme ya skʼan ya aleik te bin stojil ta pasel yuʼun jich ya xkuxinex sok ya awichʼik jilel te kʼinal te ya yakʼbeyex te Jehová te Dios awuʼunik.

21 »Te banti ya apasik te skajtajib majtanil yuʼun te Jehová te Dios awuʼunik mame nopol* xa atsʼunik biluk teʼ te jich ya xkʼot te bitʼil chʼul teʼ yuʼun Aserá.

22 »Jaʼnix jich mame xa atejkʼanik balal ton te ya yichʼ ichʼel ta mukʼ, melel ilaybil yuʼun te Jehová te Dios awuʼunik.