Jueces

6 Te israeletik jajch schaʼpasik te bintik ma lek ya yil te Jehová. Jich yuʼun, te Jehová jukeb jaʼbil la yakʼtiklan jilel ta skʼab te madianitaetik. 2 Te Madián la yakʼbey swokol te lum Israel. Ta skaj te Madián, te israeletik la spasik te banti ya xjuʼ ya snakʼ sbaik* jich bitʼil ta witstikil, ta chʼentikil sok ta lugaretik te chujkulik ochel tey-ae. 3 Jujun buelta te kʼalal ya yaʼiyik tsʼunbajel te israeletik, ya x-utsʼinotik* yuʼun te madianitaetik, te amalequitaetik sok te machʼatik talemik te banti ya xlokʼ tal te kʼajkʼale. 4 La spas scampamentoik yuʼun ya yakʼbeyik guerra te israeletik sok yuʼun ya slajinbeyik te sit yawal tsʼunubik ta spisil te skʼinalik te kʼot kʼalal ta Gaza, jkʼaxel maʼyuk bin la yijkitayik yuʼun ya sweʼik te israeletik ni jaʼuk la yijkitayik te tuminchijetik, toroetik o te burroetik. 5 Melel talik sok schambalamik sok snailpakʼik, kʼax bayalik jich te bin-utʼil kʼulubetike. Kʼax bayalik ta tul sok bayal ta kojt scamelloik te ma xjuʼik ta ajtayele. Kʼotik ta slajinel te bintik ay ta kʼinale. 6 Jich jkʼaxel maʼyuk bin jil yuʼun te lum Israel ta skaj te Madián; te israeletik la skʼanbeyik te Jehová te yakuk xkoltayotik yuʼune.

7 Kʼalal la skʼanbeyik koltayel Jehová te israeletik te yakuk xkoltayotik lokʼel ta skʼab te Madián, 8 te Jehová la stikun jtul j-alwanej te jich albotik yuʼune: «Jich ya yal te Jehová te Dios yuʼun Israel: ‹Joʼon la jlokʼesex tal ta Egipto ta kʼinal te banti mosoinbilex-ae. 9 La jkoltayex lokʼel ta skʼab te Egipto sok ta skʼab spisil te machʼatik la yakʼbeyex awokolik. La jtentiklan lokʼel ta atojolik sok la kakʼbeyex te skʼinalike. 10 Sok jich la kalbeyex: «Joʼon Jehovaon te Dioson awuʼunike. Mame xa awichʼik ta mukʼ te diosetik yuʼun te amorreoetik, jaʼ te yajwalul te kʼinal te banti yakex ta nainele». Pero, te jaʼexe maba la achʼuunbonik te jkʼope›».*

11 Tey-abi jul te chʼul-abat yuʼun te Jehová sok kʼot snajkan sba ta yeʼtal te mukʼul teʼ te ay ta Ofrá, te jaʼ yuʼun te Joás te abí-ezrita-winik. Te Gedeón snichʼan Joás yak ta smajel trigo ta banti yawil spʼeojibal* tsʼusub yuʼun jich ma xyilik-a te sit te trigo te madianitaetik. 12 Te chʼul-abat yuʼun te Jehová la yakʼ sba ta ilel ta stojol te Gedeón sok jich la yalbey: «Sjokinojat te Jehová, jaʼat te ay awip ta yakʼel guerra». 13 Jich la yal te Gedeón: «Kajwal, pasa perdón, teme yuʼun-nix sjokinojotik-a te Jehová, ¿bin yuʼun te jich yak ta kʼaxel ta jtojoltik ini? ¿Banti ay spisil te bintik la spas te Dios te la schol kaʼiytik te jmeʼ jtatike? Jich la yalbonkotik: ‹Jaʼ Jehová te machʼa la slokʼesotik tal ta Egipto›. Pero la yijkitayotikix te Jehová sok la yakʼotikix ta skʼab te Madián». 14 Te Jehová la yilbey sit te Gedeón sok jich la yalbey: «Ya xjuʼ awuʼun, baan, yame skʼan ya akoltay lokʼel ta skʼab te Madián te lum Israele. ¿Mabal joʼukon te ya jtikunat baele?». 15 Te Gedeón jich la yal: «Jehová, pasa perdón, pero ¿bin-utʼil ya jkoltay te lum Israel? Melel te jfamilia ma mukʼ skʼoplal ta stsʼumbal Manasés sok joʼon te jkʼaxel maba mukʼ jkʼoplal ta sna te jtate». 16 Pero, jich albot yuʼun te Jehová: «Joʼonme ya jokinat, jaʼ yuʼun yame atsal te madianitaetik, jichme ya xkʼot awuʼun te bin-utʼil ya atsal jtulnax winik».

17 Jich yuʼun, te Gedeón jich la yal: «Teme yuʼun-nix lek ya awilon-ae, akʼbon kil junuk señail teme yuʼun-nix jaʼat-a te machʼa yak skʼoponbelone. 18 Awokoluk, matome xbaat jaʼto teme sujton tal sok te bin ya jkʼan ya kakʼbat ta atojole». Te chʼul-abat jich la yal: «Liʼ ya jmaliyat jaʼto teme sujtat tale». 19 Te Gedeón och bael ta schajpanel jkojt jkolel* tat tentsun sok la yichʼ tal jun efá* yuʼun harina yuʼun ya spas pan te maba yichʼoj levadura. La yotses ta moch te tiʼbale sok la yotses ta oxom* te yaʼlele. Tey-abi la yichʼ bael spisil ta stojol te chʼul-abat, tey kʼot yakʼ ta yeʼtal te mukʼul teʼ.

20 Te chʼul-abat yuʼun te smelelil Dios* jich la yalbey: «Ichʼa bael te tiʼbal sok te pan te maba yichʼoj levadura, akʼa ta sba te mukʼul ton te lum aye sok mala tey-a te yaʼlele». Jich la spas te Gedeón. 21 Ta patil, te chʼul-abat yuʼun te Jehová la sjach te snabateʼ te yichʼoj ta skʼabe sok la stij ta sniʼil snabateʼ te tiʼbal sok te pan te maba yichʼoj levadura. Jich lokʼ tal kʼajkʼ tey ta mukʼul ton te la schikʼ te tiʼbal sok te pan te maba yichʼoj levadurae. Jich te Gedeón chʼay ta sit te chʼul-abat yuʼun te Jehová. 22 Te Gedeón jaʼto kʼot ta yoʼtan-a te jaʼ chʼul-abat yuʼun te Jehová.

Jich tulan la yal te Gedeón: «¡Aay, Kajwal Jehová, Mukʼul Ajwalil! ¡La kilbey sit te chʼul-abat yuʼun te Jehová!». 23 Pero, jich albot yuʼun te Jehová: «Ayuk slamalil awoʼtan, mame xiwat; maba ya xlajat». 24 Jich te Gedeón tey la spasbey jun skajtajib chikʼbil majtanil yuʼun te Jehová, jaʼto ta ora ini Jehová-Salom* sbiil. Teyto ay ta Ofrá ta skʼinalik te abi-ezritaetik.

25 Ta ajkʼabalnix-abi, te Jehová jich la yalbey te Gedeón: «Tsaka tal te jkolel* toro yuʼun te atate, jaʼ te schebal jkolel toro te jukeb yaʼbilale. Ta patil jinbeya te skajtajib chikʼbil majtanil yuʼun te Baal, te jaʼ yuʼun te atate sok tsʼeta te chʼul teʼ yuʼun Aserá te ay ta stsʼeel te skajtajib chikʼbil majtanil. 26 Ta patil latsa tonetik, pasbeya jun skajtajib chikʼbil majtanil te Jehová te Dios awuʼun liʼ ta toyol kʼinal. Ikʼa tal te schebal jkolel* toro sok tey xa awakʼ ta banti te chʼul teʼetik yuʼun Aserá te la atsʼete; sok akʼa ta chikʼbil majtanil». 27 Jich te Gedeón la yikʼ tal lajuntul j-abatetik yuʼun, jich la spas te bin albot ta mantal yuʼun te Jehová. Pero, ta skaj te la xiʼ te machʼatik ay yuʼun te state sok te winiketik yuʼun te mukʼul lume, ta ajkʼabal la spas, maba ta kʼajkʼaleltik.

28 Ta buen sab ta yan kʼajkʼal, te kʼalal jajchik te winiketik yuʼun te mukʼul lum, la yilik te ay machʼa sjinojix-a te skajtajib chikʼbil majtanil yuʼun te Baal sok te stsʼetojix-a te chʼul teʼ yuʼun Aserá te ay ta stsʼeel te skajtajib chikʼbil majtanil sok yakʼojix ta chikʼbil majtanil-a te schebal jkolel* toro tey ta skajtajib chikʼbil majtanil te yichʼbeltonax pasele. 29 Jaʼ yuʼun, talel kʼaxel jich la sjojkʼoybey sbaik: «¿Machʼawan la spas ini?». Te kʼalal la sjojkʼoyik ta leke, jich la yalik: «Jaʼ te Gedeón snichʼan Joás». 30 Jich te winiketik yuʼun te mukʼul lume, jich la yalbeyik te Joás: «¡Akʼbonkotik ta jkʼabkotik te anichʼane yuʼun ya jmiltik! Melel jaʼ la sjin te skajtajib chikʼbil majtanil yuʼun te Baal sok jaʼ la stsʼet te chʼul teʼ yuʼun Aserá te ay ta stsʼeel-ae». 31 Pero, te Joás jich la yalbey te machʼatik kʼot ta tenel ta kʼop yuʼune: «¿Puersabal ya skʼan te Baal te ya akoltaybeyik skʼoplale? ¿Yuʼunbal ya skʼan ya akoltayik? Machʼauk-a te ya skoltaybey skʼoplale, yame yichʼ milel ta sab ini. Teme jaʼ diose akʼa skoltaybey sba skʼoplal stukel, melel jaʼ yuʼun te skajtajib chikʼbil majtanil te la yichʼ jinele». 32 Ta kʼajkʼal-abi, te Joás la yakʼbey sbiilin Jerubaal* te Gedeón. Melel jich la yal: «Jaʼnix akʼa skoltay sba te Baal, melel jaʼ yuʼun te skajtajib chikʼbil majtanil te la yichʼ jinele».

33 Jich te madianitaetik, te amalequitaetik sok te machʼatik talemik ta slokʼib kʼajkʼal jun-nax la stsob sbaik, kʼaxik bael ta mukʼul jaʼ sok la spas scampamentoik ta spamlej yuʼun Jezreel. 34 Jich yuʼun, te chʼul espíritu* yuʼun te Jehová jul ta stojol te Gedeón. La yokʼesin te xulubil, jich talik ta stojol te abi-ezritaetik yuʼun ya xjokinotik yuʼun. 35 La stikun bael kʼop ta stojol spisil te skʼinal Manasés, jich la stsob sbaik te swiniktak sok la stʼunik bael te Gedeón. Jaʼnix jich la stikun bael kʼop ta stojol spisil te skʼinal Aser, Zabulón sok te Neftalí, jich te winiketik yuʼunike moik bael-euk.

36 Ta patil, te Gedeón jich la yalbey te smelelil Diose: «Teme joʼon ta jwenta te ya akoltay te lum Israel, jich te bitʼil jamal la awale, 37 akʼbon jnaʼ ta swenta ini: ya kakʼ jilel jlijkʼ stsotsel* tuminchij te banti ya yichʼ majel te sit awal tsʼunubil; teme jaʼnax la yajtsʼes te stsotsel tuminchij te tsʼujule, pero teme takin ya xjil stukel te lum ta sjoyobale, jichme ya jnaʼ-a te joʼon ya atuunteson yuʼun ya akoltay te lum Israel jich te bitʼil la awal ta jamale». 38 Jich kʼot ta pasel. Te kʼalal jajch ta sab ta yan kʼajkʼal sok te la spitsʼ te stsotsel tuminchij, la slokʼes bayal jaʼ te yaniwan xjuʼ ya xnoj jun mukʼul taza. 39 Pero, te Gedeón jich la yalbeyxan te smelelil Diose: «Mame x-ilinat ta jtojol, awokoluk, ay bin junxan ya jkʼanbat. Awokoluk, ya jkʼan ya jpasxan junuk prueba ta swenta te stsotsel tuminchije. Awokoluk, ajchʼem akʼa jiluk spisil te lum yuʼun te tsʼujule, pero takin akʼa jiluk stukel te stsotsel tuminchije». 40 Jaʼ te bin la spas te Dios ta ajkʼabal-abi. Te tsʼujule la yajtsʼes spisil te lume, pero takin jil stukel te stsotsel tuminchije.