Deuteronomio

26 »Te kʼalal ya sta yorail te ya x-ochex tey ta kʼinal te ya yakʼbeyex akʼinalinik te Jehová te Dios awuʼunik sok te kʼalal yakexix ta nainel tey-a, 2 yame skʼan ya atsakik cheʼoxebuk te sba sit awal tsʼunubiletik awuʼunik yuʼun spisil te bin ya yakʼ te lumkʼinal —te ya atsobik ta kʼinal te ya yakʼbeyex te Jehová te Dios awuʼunik—, yame skʼan ya awotsesik ta moch sok ya awichʼik bael ta lugar te ya stsa te Jehová te Dios awuʼunik yuʼun ya yichʼ ichʼel ta mukʼ te sbiile. 3 Yame skʼan ya xbaex ta stojol te sacerdote te ay ta aʼtel ta kʼajkʼaletik-abi, jich ya awalik: ‹Ta ora ini ya kaltik ta jamal ta stojol te Jehová te Dios awuʼun te ochemotikix ta kʼinal te jamal la yalbey te Jehová te antiguo jmeʼ jtatik te ya yakʼbotike›.

4 »Tey-abi, te sacerdote ya stsak te moch awichʼoj bael sok ya yakʼ ta skajtajib chikʼbil majtanil yuʼun te Jehová te Dios awuʼunik. 5 Jichme ya skʼan ya awalik ta stojol te Jehová te Dios awuʼunik: ‹Te jtatkotik jaʼ jtul arameo-winik te ya xtal xbajt ta beel te jich ko bael ta nainel ta Egipto jich bitʼil jbeom sok ma bayalik te machʼatik ayik ta sna. Tey kʼatpʼujik ta mukʼul nación te kʼax bayalikxan sok kʼax bayalxan yipik. 6 Pero, te egipcioetik kʼaxto la yutsʼinonkotik,* la yakʼbotik jwokoltik sok mero la smosoinotik. 7 Jich yuʼun jajch jkʼanbeytik koltayel te Jehová te Dios yuʼun te antiguo jmeʼ jtatik, te Jehová la yaʼiy te jkʼoptik, la yil te jwokoltik sok te bitʼil la kichʼtik utsʼinel.* 8 Te Jehová la slokʼesotik tal ta Egipto ta swenta te yip skʼab sok yuʼel, ta swenta te bintik xiweltik sba la spas sok ta swenta señailetik sok milagroetik. 9 Ta patil la yikʼotik tal ta lugar sok ta kʼinal ini te banti ya yakʼ bayal leche sok chab. 10 Ta ora ini kichʼojtik tal te sba sit awal tsʼunubiletik te la yakʼ te lumkʼinal te la yakʼbotik te Jehová›.

»Yame skʼan ya awakʼtiklanik ta stojol te Jehová te Dios awuʼunik sok ya anijan abaik ta stojol te Jehová te Dios awuʼunik. 11 Ta patil tseʼelnaxme awoʼtanik te jaʼex, te machʼa ay awuʼunik ta anaik, te levitaetik sok te jyanlumetik te ay ta awolilik ta swenta spisil te bin lek yakʼojbeyex te Jehová te Dios awuʼunik.

12 »Ta yoxebal jaʼbil te jaʼ yorail te ya yichʼ akʼel te jun ta slajunebal yuʼun spisil, te kʼalal ya xlaj awoʼtanik te parte ya awakʼik spisil te jun ta slajunebal yuʼun te sit awal tsʼunubiletik awuʼunik, yame skʼan ya awakʼbeyik te levitaetik, te jyanlumetik, te alaletik te lajem statik sok te meʼba antsetik, yame xweʼik ta mukʼul lumetik awuʼunik jaʼto te kʼalal ya xnoj schʼujtik. 13 Jichme ya awalik ta stojol te Jehová te Dios awuʼunik: ‹La jlokʼesix tal ta jna te bintik chʼultesbil jaʼ la kakʼbeyix te levitaetik, te jyanlumetik, te alaletik te lajem statik sok te meʼba antsetik, jich te bitʼil la awalbon ta mantal. Maba jkʼaxuntayoj te mantaliletik awuʼun sok maba chʼayem ta koʼtan. 14 Maʼyuk jweʼoj te bintik chʼultesbil te kʼalal yakon ta mel-oʼtan yuʼun te ay machʼa laje, maʼyuk jpikoj te kʼalal boloben jkʼoplal sok maʼyuk kakʼojbey ta smajtan te machʼatik lajemike. Jchʼuunoj te skʼop te Jehová te Dios kuʼun sok jpasoj spisil te bin yalojbon ta mantal. 15 Jaʼ yuʼun ilawil kʼalalto ta chʼul awilal awuʼun, ta chʼulchan, sok akʼbeya bendición te lum Israel awuʼun sok te kʼinal la awakʼbotik, te jaʼ jpam kʼinal te banti ya yakʼ bayal leche sok chab, jich te bitʼil jamal la awalbey te antiguo jmeʼ jtatik›.

16 »Ta ora ini, te Jehová te Dios awuʼunik yak yalbelex ta mantal te yakuk akʼotesik ta pasel te mantaliletik ini sok te bintik schapoj. Yame skʼan ya achʼuunik spasel sok ya akʼotesik ta pasel ta spisil awoʼtanik sok ta spisil akuxlejalik. 17 Ta ora ini juʼix awuʼunik te jaʼ Dios kʼot awuʼunik te Jehová jaʼnax teme ya xbeenex ta beetik yuʼun sok teme ya achʼuunik spasel te leyetik, te mantaliletik, te bintik schapoj sok teme ya awaʼiybeyik te skʼope. 18 Jaʼnix jich ta ora ini, te Jehová juʼix yuʼun te jaʼ lum ya xkʼoex yuʼun, lum te mukʼ akʼoplalik, jich te bitʼil la yalbeyex ta jamal sok te ya achʼuunik spasel spisil te mantaliletik yuʼune. 19 Jich te bitʼil yalojbeyex ta jamal te Dios yame stoyesbeyex akʼoplalik ta stojol te yantik nacionetik spasoj, te kʼalal ya yakʼ te ya awichʼik albeyel yutsil akʼoplalik, ya awichʼik naʼbeyel abaik sok ya awichʼik ichʼel ta mukʼ jaʼnax teme ya awakʼik ta ilel te jaʼ chʼul lumex ta stojol te Jehová te Dios awuʼunik».