Deuteronomio

22 »Teme ay la awil te chʼayem storo o stuminchij te awermano, mame jichuk xa apas te maba la awile. Yananixme skʼan ya awikʼ bael ta stojol te awermanoe. 2 Pero, teme maba nopol* te banti ya xnain te awermano o maba ya anaʼbey sba, yame skʼan ya awikʼ bael ta ana te chambalam jaʼto te kʼalal ya xkʼot sle te awermanoe. Yame skʼan ya asutbey. 3 Jichnixme ya skʼan ya apasbey te sburro, te skʼuʼ sok spisil te bintik ay yuʼun te awermano te la schʼay sok te jaʼat la ata. Mame jichuk xa apas te maba la awil yilel.

4 »Teme la awil te yalem ta be te sburro o te storo te awermano, mame jich xa apas te maba la awile. Yananixme skʼan ya akoltay ta sjachel.

5 »Te ants mame skʼan ya slapbey skʼuʼ spakʼ te winik; te winik mame skʼan ya slapbey skʼuʼ spakʼ te antse. Melel te Jehová ya yilay machʼauk-a te jich ya spase.

6 »Teme ay la ata ta be spechech jkojt jaʼmal mut te tey yikʼoj-a te yalatak o slutsʼoj ston, chikan teme ay ta teʼ o ay ta lum, mame xa awikʼ bael te smeʼ sok te yalatake. 7 Ya xjuʼ ya awikʼ jilel te yalatak, pero koltaya bael te smeʼe. Jichme xa apas yuʼun lek ya xkʼoat ta lokʼel sok jal ya xkuxinat.

8 »Teme ya apas ana, yame skʼan ya apasbey ta sba chʼin stsʼajkʼul ta sjoyobal. Teme ay machʼa ya xchʼay koel tey-a, mame jaʼuk smul ya xkʼot te machʼatik ay awuʼun ta swenta smalel chʼichʼ.

9 »Mame xa akap ta tsʼunel chaʼchajp stsʼumbal sit awal tsʼunubil. Teme jich ya apase, spisil te bin la atsʼun sok te sit awal tsʼunubil yame skʼan ya yichʼ akʼel ta chʼul awilal.

10 »Mame xa awakʼ sjokin sbaik ta jokʼlum jkojt toro sok jkojt burro.

11 »Mame xa alap kʼuʼul pakʼal te kapbil ta pasel ta stsotsel tuminchij o ta lino.

12 »Yame skʼan ya ajijpanbey te schʼalil te kʼuʼul pakʼal ya atuuntes ta schanebal schikin.

13 »Teme jtul winik ya yikʼ yinamin jtul achʼix sok ya sjokin ta wayel pero ta patil ya spʼaj 14 sok ya slebey smul te ma lek stalel soknix ya sbolobtesbey skʼoplal te jich ya yal: ‹Nujpunon sok te achʼix ini, pero te kʼalal la jokin ta wayel maba la jta prueba te ya yakʼ ta ilel te maba tabil ta winik›, 15 jich te smeʼ stat te achʼix yame skʼan ya yichʼik bael prueba ta stojol te jwolwanejetik ta yochibal te mukʼul lum te ya yakʼ ta naʼel te mato tabil ta winik te achʼixe. 16 Te stat te achʼixe jichme ya skʼan ya yalbey te jwolwanejetik: ‹La kakʼbey yinamin te kantsil nichʼan te winik ini, pero ya spʼaj, 17 ta ora ini ya slebey smul te ma lek stalel te jich yak ta yalel: «La jta ta ilel te tabilix ta winik te awantsil nichʼan». Ilawilik, liʼ ay te prueba te mato tabil ta winik te kantsil nichʼane›. Tey-abi yame skʼan ya slimik te pakʼ ta stojol te jwolwanejetik yuʼun te mukʼul lume. 18 Jaʼ yuʼun, te jwolwanejetik yuʼun te mukʼul lum ya stsakik te winik sok ya yakʼbeyik castigo. 19 Yame yakʼbeyik stoj smulta 100 siclo* yuʼun plata sok jaʼme ya yakʼbeyik te stat te achʼixe, melel te winik la sbolobtesbey skʼoplal jtul achʼix te mato tabil ta winik ta lum Israel, jaʼnanixme yinam ya xkʼot te achʼixe. Te winik ma xjuʼ ya yijkitay te achʼix te jayeb kʼajkʼal kuxule.

20 »Pero, teme melelnix-a te tabilix ta winik te achʼix pero maʼyuk pruebaetik te jich kʼot ta pasele, 21 yame skʼan ya yichʼ lokʼesel bael te achʼix ta stiʼil sna te state, te winiketik yuʼun te slumal yame skʼan ya schʼojik ta ton jaʼto te kʼalal ya xlaje, melel kʼexlaltik sba te bin la spas ta Israel te kʼalal la spas mulwej ta sna te state. Jichme ya skʼan ya alokʼes ta awolilik te bintik chopol.*

22 »Teme ay la yichʼ tael jtul winik te sjokinoj ta wayel jtul ants te ay smamalal, yame skʼan ya yichʼik milel schebalik, te winik sok te antse. Jichme ya skʼan ya alokʼesik ta Israel te bintik chopol.*

23 »Teme jtul achʼix makbilix yuʼun ya xnujpun sok jtul winik pero ya xtaot yuʼun yan winik ta mukʼul lum sok ya sjokin ta wayel, 24 yame skʼan ya alokʼesik bael schebalik ta yochibal te mukʼul lum-abi sok yame achʼojik ta ton jaʼto te kʼalal ya xlajike, te achʼixe ta skaj te maba awun ta mukʼul lum; te winike ta skaj te la sbolobtesbey skʼoplal te yinam te spatxujke. Jichme ya skʼan ya alokʼesik ta awolilik te bintik chopol.*

25 »Yan teme te winik la sta ta kʼinal te achʼix te makbilix yuʼun ya xnujpun sok la stsak yutsʼin, jaʼnax ya yichʼ milel te winik ta skaj te la yutsʼin te achʼixe; 26 pero te achʼixe maʼyuk bin ya yichʼ pasbeyel stukel. Melel maba la spas tulan mulil te ya yichʼ milel yuʼune. Te bin ya xkʼot ta pasel ini, jaʼ pajal kʼoem sok te machʼa ya skontrain te spatxujk sok ya smil. 27 Melel te winik la sta ta kʼinal, manchukme tulan awun te achʼix te makbilix yuʼun ya xnujpun, maʼyuk machʼa aʼiyot yuʼun te jich maba la yichʼ koltayel.

28 »Teme jtul winik ya sta jtul achʼix te mato tabil ta winik sok te maba makbil yuʼun ya xnujpun, la stsak yutsʼin pero ay machʼa ilotik yuʼun, 29 te winik te la sjokin ta wayel te achʼix yame skʼan ya yakʼbey 50 siclo* yuʼun plata te stat te achʼixe sok jaʼ yinam ya xkʼot. Te bitʼil la sbolobtesbey skʼoplal te achʼix, ma xjuʼ ya yijkitay te jayeb kʼajkʼal kuxule.

30 »Mame ayuk jtul winik te ya yikʼ yinamin te yinam te state, yuʼun jich maba ya sbolobtesbey skʼoplal te state.