1 Crónicas

17 Jaʼnax te kʼalal ayix ta nainel ta sna-a* te David, jich la yalbey te j-alwanej Natán: «Te joʼone liʼ ayon ta nainel ta jun na te pasbil ta cedro-teʼ, yan stukel te skaxaul chapbilkʼop yuʼun te Jehová ay ta yutil nailpakʼ». 2 Te Natán jich la yalbey te David: «Pasa te bin ya skʼan awoʼtane, melel sjokinojat te smelelil Diose».

3 Ta ajkʼabalnix-abi, te Natán jich albot yuʼun te Diose: 4 «Baan, albeya jich ini te David te j-abat kuʼun: ‹Jich ya yal te Jehová: «Ma jaʼukat te machʼa ya spasbon jna yuʼun ya xnainon tey-a. 5 Te kʼalal la kakʼ ta libre te lum Israel jaʼto ta ora ini, maʼyuk nainemon ta jun na, jaʼnax nainemon ta nailpakʼ templo ta bayuknax. 6 Te jayeb tiempo la jokin te israeletik, ¿aybal bin-ora jich la kal?: ‹¿Bin yuʼun te maba apasojbonik jun na ta cedro-teʼ?›. ¿Aybal bin-ora jich la kalbey jtuluk te juecetik yuʼun Israel te jaʼik te machʼatik la kakʼbey skanantay te lum Israel kuʼune?»›.

7 »Jichme xa awalbey te David te j-abat kuʼune: ‹Jich ya yal te Jehová te jwolwanej yuʼun te chʼul-abatetik: «Joʼon la jlokʼesat tal ta akiltik te banti ya akanantay-a te tuminchijetik swenta ya x-ochat ta jwolwanej yuʼun te lum Israel kuʼun. 8 Yame jokinat chikan banti ya xbaat. Yame awil te ya jlajin spisil te akontratake. Ya kakʼ te mukʼ akʼoplal ya xkʼoat jich bitʼil te winiketik te kʼax mukʼ skʼoplalik ta balumilal. 9 Ya kakʼbey jun lugar te lum Israel kuʼun. Tey ya kakʼ xnainik-a sok maʼyuk bin-ora ay machʼa ya x-utsʼinotik* yuʼun. Maba ya x-utsʼinotikxan yuʼun te machʼatik chopolik* jich bitʼil te nameye, 10 jaʼto tal te bin-ora la kakʼ juecetik ta lum Israel kuʼun. Ya kakʼbat ta akʼab spisil te akontratake. Jaʼnix jich ya kalbat: ‹Te Jehová ya yakʼ ochel ta ajwalil te atsʼumbal›.

11 »›»Te kʼalal ya xkʼot yorail te ya xlajate sok te ya akux awoʼtan sok te antiguo ameʼ atate, joʼon ya kakʼ ta ajwalil jtul atsʼumbal, jaʼ te anichʼane, ya kakʼbey yichʼ yip te wentainel yuʼune. 12 Jaʼme te machʼa ya spasbon jna, joʼon ya kakʼbey yichʼ yip te wentainel yuʼun ta sbajtelkʼinal. 13 Joʼon staton ya xkʼoon sok jaʼ jnichʼan ya xkʼot. Yame kakʼbey yil te skʼuxul koʼtan te ma x-ijkitaywan, ma jichuk te bitʼil la jlokʼesbey ta stojol te machʼa wentainwan ta nailal awuʼune. 14 Yame kakʼbey yaʼtel ta jna jich bitʼil ajwalil kuʼun ta sbajtelkʼinal, te wentainel yuʼune maʼyuk bin-ora ya xlaj skʼoplal»›».

15 Te Natán la yalbey te David spisil te bin albot yaʼiy sok spisil te bin akʼbot yile.

16 Tey-abi, te ajwalil David bajt sok la snajkan sba ta stojol te Jehová sok jich la yal: «Jehová Dios, ¿mukʼbal jkʼoplal ta atojol? ¿Mukʼbal skʼoplal te jfamilia te bitʼil la awikʼon tal liʼi? 17 Ma jaʼuknax awakʼojbon-abi, Dios kuʼun, jaʼnix jich ya awalbey skʼoplal te bin ya xkʼot ta pasel ta patil ta stojol te stsʼumbal te j-abat awuʼun ini; Jehová Dios, jich ya awilon bitʼil jtul winik te ya skʼanxan mukʼubtesbeyel skʼoplale. 18 ¿Binxan ya xjuʼ ya kalbat joʼon te j-abaton awuʼun, ta swenta te awakʼojon ta ichʼel ta mukʼe? Melel ya anaʼbon jba ta lek. 19 Kajwal, Jehová, ta swenta te j-abat awuʼun ini sok te jich skʼanojel awoʼtane bayal bintik mukʼ skʼoplal apasoj sok awakʼoj ta ilel te amukʼule. 20 Jehová, maʼyuk machʼa ya spajat sok maʼyuk yan Dios jich bitʼil te jaʼate; jaʼ jich ya yakʼ ta naʼel spisil te bin kaʼiyojtik stojole. 21 ¿Aybal yan nación ta swolol balumilal jich bitʼil te lum Israel awuʼune? Jaʼat, te smelelil Diosat, la alokʼeslan tal swenta jaʼ lum ya xkʼot awuʼun. La awakʼ ta naʼel te abiil ta swenta te bintik mukʼ skʼoplal la apas sok te bintik yan-nax ta ilel la apas te kʼalal la atentiklan lokʼel te nacionetik ta stojol te lum awuʼune, jaʼ te lum awuʼun te la alokʼes tal ta Egipto. 22 Ta sbajtelkʼinal la awakʼ te jaʼ awuʼun ya xkʼot te lum Israel. Jich yuʼun, Kajwal, Jehová, jaʼ Dios kʼoat yuʼunik. 23 Jaʼ yuʼun, Jehová, akʼa kʼotuk ta pasel ta sbajtelkʼinal te bin la awalbey ta jamal te j-abat awuʼun ini soknix te stsʼumbale; kʼotesa ta pasel te bin la awal ta jamale. 24 Akʼa smukʼulin koʼtantik te abiil sok te mukʼuk skʼoplal ta sbajtelkʼinal swenta jich ya yalik te ants winiketik: ‹Te Jehová te jwolwanej yuʼun te chʼul-abatetik, te Dios yuʼun Israel, jaʼ Dios ta Israel›. Jich yuʼun, akʼa jalajuk ta atojol te stsʼumbal te j-abat awuʼun ini. 25 Dios kuʼun, melel la awakʼbey snaʼ te j-abat awuʼun ini te ya awakʼ x-och ta ajwalil te stsʼumbale. Jaʼ yuʼun, jun yoʼtan ya skʼoponat te j-abat awuʼun ini. 26 Kajwal, Jehová, jaʼat te smelelil Diosat sok jaʼat la awalbey ta jamal te bintik lek ya awakʼbey te j-abat awuʼun ini. 27 Jaʼ yuʼun, awokoluk akʼbeya bendición te stsʼumbal te j-abat awuʼun ini sok akʼa jalajuk ta atojol ta sbajtelkʼinal. Melel jaʼat, Jehová, la awakʼbey bendición sok sbajtelukme kʼinal ya yichʼ te bendición awuʼune».