1 Crónicas

29 Te ajwalil David jich la yalbey spisil te lum Israel: «Te jnichʼan Salomón te jaʼ tsaot yuʼun te Diose, keremto sok mato ayuk spʼijil yoʼtan, pero kʼax mukʼ te aʼtelil ya xbajt spase, melel te temploe* jaʼ yuʼun te Jehová Dios, ma jaʼuk yuʼun jtul ants winik. 2 La jpas tulan yuʼun la jchajpan te bintik ya xtuun ta spasel te sna te Dios kuʼune. Jaʼ yuʼun la jtsob oro, plata, cobre, hierro, teʼetik, ónice-tonetik, tonetik te ya yichʼtiklan lapʼel, chʼin tonetik te ay bin ya yichʼ chʼalel-a, spisil ta chajp tʼujbil tonetik sok kʼax bayal alabastro-tonetik. 3 Ta swenta te kʼux ta koʼtan te sna te Dios kuʼune ya kakʼ te oro sok te plata kuʼune swenta ya yichʼ pasel-a te sna te Dios kuʼune. Parteme-a te bintik la jchajpanix jilel ta swenta te chʼul nae, 4 jaʼnix jich la kakʼ 3 mil talento* yuʼun oro te talem ta Ofir sok 7 mil talento* yuʼun lekil plata swenta ya yichʼ potsel-a te pajkʼetik yuʼun te cuartoetike, 5 swenta ya yichʼ pasel-a te aʼtejibaletik yuʼun oro, plata sok spisil te aʼtejibaletik te ya spasik te machʼatik ya snaʼik spasel tʼujbil aʼteliletik. Ta ora ini, ¿machʼaxan ta spasemal yoʼtan ya skʼan ya yakʼbey smajtan te Jehová?».

6 Jich yuʼun, te machʼatik ay bintikxan la yakʼike jaʼik te machʼatik yichʼoj mukʼ yaʼtelik yuʼun te jujunchajp stsʼumbal te antiguo smeʼ statik, te jwolwanejetik yuʼun te stsʼumbal Israel, te capitanetik te swentainojik ta jujun mil ta tul soldadoetik sok ta jujun 100 ta tul soldadoetik soknix te machʼatik ay ta swentaik yilel te bintik ay yuʼun te ajwalil. 7 Ta swenta te aʼtelil te ya skʼan pasel ta sna te smelelil Dios la yakʼik 5 mil talento* yuʼun oro, 10 mil dárico,* 10 mil talento* yuʼun plata, 18 mil talento* yuʼun cobre sok 100 mil talento* yuʼun hierro. 8 Te machʼatik ay tʼujbil tonetik yuʼun jaʼnix jich la yakʼik ta yawil kʼulejalil ta sna te Jehová, te jaʼ ay ta swenta yilel-a te Jehiel te guersonita-winik. 9 Tseʼelnax yoʼtanik te lum Israel ta swenta te majtanil te spasemal yoʼtan la yakʼike, melel sok spisil yoʼtanik la yakʼik te majtanil ta stojol te Jehová, jaʼnix jich kʼax tseʼel yoʼtan-euk te ajwalil David.

10 Jich yuʼun, te David la yalbey yutsil skʼoplal te Jehová ta stojol spisil te lum Israel. Jich la yal: «Akʼa yichʼ alel yutsil akʼoplal ta sbajtelkʼinal, Kajwal, Jehová, te Dios yuʼun te jtatik Israel. 11 Kajwal, Jehová, te jaʼate kʼax mukʼat, ay awuʼel, tʼujbilat, ay awutsilal sok ayat ta ichʼel ta mukʼ, melel jaʼat awuʼun spisil te bintik ay ta chʼulchan sok ta balumilal. Kajwal, Jehová, jaʼat Ajwalilat. Jaʼat jolalat yuʼun spisil te bintik aye. 12 Te kʼulejalil sok te utsilal talem ta atojol, sok jaʼat awentainoj spisil. Te awip sok te awuʼel ay ta akʼab, jich te akʼabe ay machʼa ya xjuʼ ya smukʼubtesbey skʼoplal sok ya yakʼbey yip spisil te ants winiketike. 13 Jich yuʼun, ta ora ini, Kajwal, Dios kuʼun, ya kaltik wokol ta atojol sok ya kalbeytik yutsil skʼoplal te stʼujbilal te abiile.

14 »Pero, ¿machʼaon-a te joʼon sok te lum kuʼun yuʼun ya kakʼtik ta atojol te majtaniletik te spasemal koʼtantik ya kakʼtike? Melel spisil talem ta atojol, sok spisil te bintik la kakʼtik ta atojole jaʼnix talem ta akʼab. 15 Jich kʼoemotik ta atojol te bin-utʼil jyanlum sok jbeom jich bitʼil spisil te antiguo jmeʼ jtatike. Melel te jkuxlejaltik liʼ ta balumilal jaʼ jich kʼoem te bin-utʼil axinal te maʼyuk bin ya jmaliytike. 16 Kajwal, Jehová Dios kuʼuntik, spisil te kʼulejalil te la jtsobtik yuʼun ya jpastik te ana ta swenta te achʼul biil jaʼnix talem ta akʼab; spisil jaʼat awuʼun. 17 Kajwal, Dios kuʼun, jnaʼoj ta lek te ya awil ta lek spisil te bintik ay ta koʼtantik sok ya amulan te junuk koʼtantik.* Ta spisil koʼtan* sok ta spasemal koʼtan la kakʼ spisil te majtaniletik ini sok kʼax tseʼel koʼtan te ya kil te liʼ ay te lum awuʼun yuʼun spasemal yoʼtan ya yakʼik te majtanile. 18 Kajwal, Jehová, te Dios yuʼun Abrahán, Isaac sok te Israel —te antiguo jmeʼ jtatik—, koltaya yuʼun sbajteluk kʼinal lek te bin ay ta yoʼtanik sok ta spensarik te lum awuʼun, sok koltaya yuʼun ya x-abatinik ta atojol sok spisil yoʼtanik. 19 Koltaya te jnichʼan Salomón yuʼun jun yoʼtan ya schʼuunbat te mantaliletik awuʼun, te jultesel oʼtanil awuʼun sok te leyetik awuʼun soknix te yakuk spas te templo* te la jchajpanix jilel te bintik ya xtuun swenta ya yichʼ pasel».

20 Jich yuʼun, te David jich la yalbey spisil te lum Israel: «Ta ora ini albeyaik yutsil skʼoplal te Jehová te Dios awuʼunike». Jich te lum Israel la yalbeyik yutsil skʼoplal te Jehová, te Dios yuʼun te antiguo smeʼ statik, la skejan sbaik sok la snijan sbaik ta stojol te Jehová sok ta stojol te ajwalil. 21 Maba la skom sbaik ta yakʼel milbil majtaniletik ta stojol te Jehová sok chikʼbil majtaniletik ta stojol te Jehová jaʼto ta yan kʼajkʼal: la yakʼik jmil ta kojt jkolel* toroetik, jmil ta kojt tat tuminchijetik sok jmil ta kojt jkolel tuminchijetik soknix te malbil majtaniletik yuʼunik; bayal la yakʼik milbil majtaniletik spisil te lum Israel. 22 Ta kʼajkʼal-abi yakik ta weʼ uchʼajel ta stojol te Jehová sok stseʼelil yoʼtanik, ta schebal buelta la yotsesik ta ajwalil te Salomón snichʼan David sok la smalbeyik aceite ta sjol ta stojol te Jehová yuʼun ya x-och ta jwolwanej soknix la yotsesik ta sacerdote te Sadoc. 23 Te Salomón la snajkan sba ta smukʼul naktajib te Jehová jich bitʼil ajwalil, jaʼ la sjelolin jilel te David te state. Lek lokʼ spisil te bintik la spase sok chʼuunbot smantal yuʼun spisil te israeletike. 24 Spisil te machʼatik yichʼoj mukʼ yaʼtelik, te winiketik te ay yipik ta yakʼel guerra sok spisil te snichʼnab te ajwalil David la yakʼ sbaik ta wentainel yuʼun te ajwalil Salomón. 25 Te Jehová kʼaxto la smukʼubtesbey skʼoplal te Salomón ta stojol spisil te lum Israel sok la yakʼ ta ichʼel ta mukʼ, maʼyuk yan ajwalil te wentainwan ta Israel te jich kʼot ta stojole.

26 Te David snichʼan Jesé wentainwan ta spamal skʼinal Israel, 27 te jayeb tiempo wentainwan ta lum Israel jaʼ 40 jaʼbil. Ta Hebrón wentainwan jukeb jaʼbil, ta Jerusalén wentainwan 33 jaʼbil. 28 Jun yoʼtan laj bael, kuxin bayal jaʼbil, la sta skʼulejal sok yutsilal. Tey-abi, jaʼ och jilel ta ajwalil te Salomón, te snichʼane. 29 Te bintik la spas ta skuxlejal te ajwalil David, tsʼibaybil jilel ta sjajchibal kʼalalto ta slajibal ta junetik yuʼun te Samuel te ya yil najalsitil, te j-alwanej Natán sok te Gad, jaʼ te winik te ya yil najalsitil, 30 jaʼnix jich la stsʼibayik jilel spisil te bintik kʼot ta pasel te kʼalal ay ta ajwalil-a te David, te bintik mukʼ skʼoplal la spas, te bintik kʼot ta pasel ta skuxlejal, te bintik kʼot ta pasel ta lum Israel sok spisil te bintik kʼot ta pasel ta stojol te ajwaliletik te joytaybil yuʼun-ae.