Te lek yachʼil kʼop ya yal te Mateo

26 Te kʼalal laj yoʼtan te Jesús ta yalel spisil ini, jich la yalbey te jnopojeletik yuʼune: 2 «Jich bitʼil te anaʼojike, chebxanix kʼajkʼal ya skʼan yuʼun ya yichʼ pasel te Kʼin yuʼun Pascua sok yame yichʼ akʼel ta kʼabal te sNichʼan te Winike* swenta ya yichʼ jijpanel ta teʼ».

3 Te jwolwanej sacerdoteetik sok te jwolwanejetik yuʼun te judioetike la stsob sbaik ta yamakʼul sna te mukʼul sacerdote te Caifás sbiile. 4 Jun-nax la schapik te bin-utʼil ya stsakik te Jesús yuʼun ya smilik. 5 Pero, jich jajch yalbey sbaik: «Mame jaʼuk ya jtsaktik ta yorail-a te kʼine, yame xjuʼ ya xjajch ta kʼop te ants winiketike».

6 Te kʼalal ay ta Betania-a te Jesús ta sna te Simón te yichʼoj kʼaʼel chamel-ae, 7 tal ta stojol jtul ants te yichʼoj tal yawil perfume te pasbil ta alabastro-ton, nojel ta aceite te yichʼoj perfume te bayal stojole. Te antse la smalbey ta sjol te Jesús te kʼalal yak ta weʼel-ae. 8 Te kʼalal la yilik te jnopojeletike, ilinik yuʼun sok jich la yalik: «¿Bin yuʼun te tojolnax la yichʼ malel te aceite ini? 9 Jaʼ lek te lajuk yichʼ chonele. Bayal takʼin lokʼ-a te jichuke yuʼun jich ya yichʼ akʼbeyel te pobreetike». 10 Te kʼalal la yaʼiy stojol te Jesús, jich la yaltiklanbey: «¿Bin yuʼun te ma lekuk ya awilik te ants ini? Melel kʼax lek te bin la spas ta jtojole. 11 Spisil-ora ajokinojik stukel te pobreetike, yan te joʼone maba spisil-ora ya ajokinonik. 12 Te kʼalal la smalbon aceite ta jbakʼetal te ants ini, jaʼ yak schajpanbelon ta swenta te ya kichʼ mukele. 13 Jamal ya kalbeyex, ta bayuk ta swolol balumilal te banti ya yichʼ cholel te lek yachʼil kʼope jaʼnixme jich ya yichʼ albeyel skʼoplal te bin la spas te ants ini, jichme ya yichʼ naʼel te antse».

14 Ay jtul ta yolil te slajchaytulul te jpuk-kʼopetike jaʼ te Judas Iscariote sbiile, bajt yil te jwolwanej sacerdoteetike, 15 jich la sjojkʼoylanbey: «¿Bin ya awakʼbonik teme ya kakʼbeyex ta akʼabik te Jesuse?». La schapik te ya yakʼbeyik 30 ta sejp plata-takʼin. 16 Ta yorail-abi, te Judas jajch sle te bin-utʼil ya yakʼ ta kʼabal te Jesuse.

17 Ta sbabial kʼajkʼal te ya yichʼ pasel te Kʼin yuʼun pan te maba yichʼoj levadurae, te jnopojeletik jich tal sjojkʼoybeyik te Jesuse: «¿Banti ya akʼan ya jchajpankotik te weʼelil ta swenta te Kʼin yuʼun Pascuae?». 18 Jich albotik yuʼun te Jesús: «Baanik ta mukʼul lum, yame ataik jtul winik tey-a sok jichme ya awalbeyik: ‹Jich ya yal te Maestro: «Nopolix* te koraile. Yame jpas te Kʼin yuʼun Pascua ta ana sok te jnopojeletik kuʼune»›». 19 Jich la spasik te jnopojeletik te bitʼil albotik ta mantal yuʼun te Jesuse. La schajpanik spisil ta swenta te Kʼin yuʼun Pascua.

20 Te kʼalal ijkʼix-a te kʼinale, te Jesús la snajkan sba ta weʼel sok te 12 ta tul jnopojeletik yuʼune. 21 Te kʼalal yakik ta weʼel-ae, te Jesús jich la yalbey te jnopojeletike: «Jamal ya kalbeyex te ay jtul ta awolilik te ya yakʼon ta kʼabale». 22 Te kʼalal jich la yaʼiyik stojole, kʼaxto la smel yoʼtanik yuʼun. Jich jajch yalik ta jujuntul: «Kajwal, ma joʼukon-abi, ¿mabal jichuk?». 23 Jich albot yuʼun te Jesús: «Jaʼ te machʼa pajal ya kotses jkʼab sok ta mukʼul platoe, jaʼme te machʼa ya yakʼon ta kʼabale. 24 Melelnix-a te ya xbajt te sNichʼan te Winike,* jichnix te bitʼil tsʼibaybil skʼoplale. Pero ¡yame yil swokol te machʼa ya yakʼ ta kʼabal te sNichʼan te Winike! Jaʼ lekxan te manchuk ayin* ta kʼinale». 25 Te Judas te machʼa nopol* ya xbajt yakʼix ta kʼabal te Jesuse, jich la sjojkʼoybey: «Rabí,* ma joʼukon-abi, ¿mabal jichuk?». Jich albot yuʼun te Jesús: «Jaʼ, jaʼatnix la awal».

26 Te kʼalal yakikto ta weʼel-ae, te Jesús la stsak te pan, te kʼalal lajix yoʼtan ta skʼoponel-a te Diose, la xetʼ sok la yakʼbey te jnopojeletik yuʼune. Jich la yaltiklanbey: «Tsakaik sok weʼaik. Jaʼ señail te jbakʼetale». 27 La stsak te copa, la skʼopon Dios yuʼun sok la yakʼbey te jnopojeletike, jich la yaltiklanbey: «Uchʼaik ta apisilik, 28 melel jaʼ señail te jchʼichʼel, ‹te chʼichʼ yuʼun chapbilkʼop› te ya yichʼ malel swenta ya yichʼ tael perdón yuʼun smulik bayal ta tul ants winiketik. 29 Jamal ya kalbeyex te maba ya kuchʼix te vino ini, jaʼto ya kuchʼ yachʼil vino sok jaʼex ta banti te Wentainel* yuʼun te jTate». 30 Te kʼalal laj yoʼtanik ta skʼayojtayel salmoetik, bajtik ta wits yuʼun Olivoetik.

31 Tey-abi, te Jesús jich la yaltiklanbey: «Ta ajkʼabal ini yame awijkitayonik* jilel ta apisilik. Melel jich tsʼibaybil: ‹Yame kejchentes te jkanantuminchije, jich ya xpujk bael te tuminchijetike›. 32 Pero, te kʼalal kichʼojix chaʼkuxajtesel-ae, yame xnailajon bael awuʼunik ta Galilea». 33 Jich la yal te Pedro: «Manchukme ya yijkitayat te yantike, ¡te joʼone maʼyuk bin-ora ya kijkitayat!». 34 Jich albot yuʼun te Jesús: «Jamal ya kalbat, ta ajkʼabal ini te kʼalal mato x-okʼ-a te tat mute, oxeb buelta amukojonix ta awoʼtan-a». 35 Te Pedro jich la yal: «Manchukme pajal ya xlajotik, maʼyuk bin-ora ya jmukat ta koʼtan». Jichnix la yalik-euk spisil te yantik jnopojeletike.

36 Tey-abi, te Jesús sok te jnopojeletik yuʼune bajtik ta jun lugar te Getsemaní sbiile. Te kʼalal kʼotik tey-ae, jich la yaltiklanbey: «Naklanik jilel liʼi, yan te joʼone ya xbajt jkʼopon Dios lum ini». 37 La yikʼ bael te Pedro sok te chaʼtul snichʼnab te Zebedeoe, jajch ta tulan mel-oʼtan sok ta tulan wokol. 38 Jich la yaltiklanbey: «Kʼax bayal ya kaʼiy te jwokol te jich yaʼiyel te ya xlajone. Jilanik liʼi, pajalukme wikʼil jsitik». 39 Beenxan bael jtebuk stukel, la snijan sba koel kʼalal ta lum sok jich la yal ta skʼoponel te Diose: «Jtat, teme ya xjuʼe, kʼeja bael ta jtojol te copa* ini. Pero mame jaʼuk ya yichʼ pasel te bin ya skʼan koʼtane, jaʼukme ya yichʼ pasel te bin ya skʼan awoʼtane».

40 Ta patil sujt tal tey-a te banti ayik te jnopojeletike, wayalik kʼot sta. Jich la sjojkʼoybey te Pedro: «¿Yuʼunbal jkʼaxel ma juʼ awuʼunik te wikʼiluk asitik junuk orae? 41 Wikʼilukme asitik sok kʼoponaik Dios ta spisil-ora yuʼun jich maba ya xyalex ta mulil. Ta melel, ay ta yoʼtan te ants winik ta spasel te bin leke, pero ma xjuʼ yuʼun te bakʼete». 42 Chaʼbajtxan te Jesús, jich la yal ta skʼoponel Dios: «Jtat, teme ma xjuʼ ya akʼej bael ta jtojol te copa* ini, akʼa kʼotuk ta jtojol sok akʼa kʼotuk ta pasel te skʼanojel awoʼtane». 43 Chaʼsujt tal tey-a te banti ayik te jnopojeletike, wayalik kʼot sta yan buelta, melel ma xkujchix yuʼunik te swayelike. 44 Chaʼbajtxan te Jesús ta skʼoponel Dios ta yoxebal buelta, jaʼnix jich kʼot yalxan ta skʼoponel Dios. 45 Chaʼsujt tal tey-a te banti ayik te jnopojeletike sok jich la yaltiklanbey: «¿Bin-utʼil ay-a te yakex ta wayel sok te yakex ta skuxel awoʼtanik ta yorail wokole? ¡Ilawilik! Kʼotix yorail te ya yichʼ akʼel ta skʼab jmulawiletik te sNichʼan te Winike.* 46 Jajchanik, konik. Ilawilik, yakix ta talel te machʼa ya yakʼon ta kʼabale». 47 Te kʼalal yakto ta kʼop-a te Jesuse, tal te Judas te jaʼ jtul ta slajchaytulul te jpuk-kʼopetik yuʼun te Jesuse, jokinbil tal yuʼun bayal ta tul ants winiketik te yichʼojik tal yespadaik sok steʼik, te tikunbilik tal yuʼun te jwolwanej sacerdoteetik sok te jwolwanejetik yuʼun te judioetike.

48 Te j-akʼaw ta kʼabale yalojix-a te bin seña ya spase: «Te machʼa ya kujtsʼuye,* jaʼme-abi; tsakaik». 49 Jich tojnax bajt te banti ay te Jesuse. Jich kʼot yalbey: «¡Talonme, Rabí!».* La yujtsʼuy* sok yutsil yoʼtan. 50 Pero, jich jojkʼoybot yuʼun te Jesús: «Kamigo, ¿bin swentail te talate?». Jich talik ta stojol te Jesús, la stsakik sok la schukik bael. 51 Ta oranax, jtul te machʼa sjokinoj te Jesús la slokʼes te yespadae, la sbojbey lokʼel schikin te yabat te mukʼul sacerdotee. 52 Jich albot yuʼun te Jesús: «Kʼeja ta yawil te espadae, melel te machʼatik ya stsakik te espada, ta espadanix ya yichʼ milel-euk. 53 ¿Yuʼunbal ya akuy te ma xjuʼ ya jkʼanbey te jTat te yakuk stikunbon tal bayal ta mil* chʼul-abatetik ta ora ini yuʼun ya skoltayon? 54 Pero, teme jich ya jpase, ¿bin-utʼil ya xkʼot ta pasel te bin ya yal te sJun Dios te yuʼun-nanix jich ya skʼan ya xkʼot ta pasel-ae?». 55 Tey-abi, te Jesús jich la yalbey te ants winiketik: «¿Talexbal sok awespadaik sok ateʼik yuʼun ya achukonik bael jich bitʼil j-elekʼ? Jujun kʼajkʼal la jnajkan jba ta nojpteswanej ta templo, maba la atsakonik. 56 Pero, jich kʼot ta pasel spisil ini swenta jich ya xkʼot ta pasel te bin tsʼibaybil jilel yuʼun te j-alwanejetike». Tey-abi, spisil te jnopojeletik la yijkitayik jilel te Jesuse, lokʼik bael ta anel.

57 Te machʼatik la stsakik te Jesuse la yikʼik bael ta sna te mukʼul sacerdote Caifás. Tey stsoboj sbaik sok-a te escribaetik sok te jwolwanejetik yuʼun te judioetike. 58 Te Pedro namalto* la stʼun bael te Jesús jaʼto kʼalal ta yamakʼul sna te mukʼul sacerdote. Te kʼalal och baele, la sjokin ta naklej te j-abatetik yuʼun te nae swenta ya yil te bin ya xkʼot ta pasel ta stojol te Jesuse.

59 Te jwolwanej sacerdoteetik sok spisil te Sanedrín yakik ta slebeyel smul te Jesús yuʼun jich ya smilik-a. 60 Pero ma la stabeyik smul, manchukme kʼotik bayal lotil testigoetik. Ta patil kʼotik chaʼtul lotil testigoetik 61 te jich kʼot yalike: «Te winik ini jich la yal: ‹Ya xjuʼ ya jin te templo yuʼun te Diose sok ya xjuʼ ya jchaʼpas ta oxebnax kʼajkʼal›». 62 La stejkʼan sba te mukʼul sacerdote sok jich la sjojkʼoybey te Jesuse: «¿Bin yuʼun te ma xa asute? ¿Yuʼunbal maʼyuk bin ya awal yuʼun te bin ya yalik ta atojol te winiketik ini?». 63 Pero maba la sjakʼ te Jesuse. Jaʼ yuʼun, jich albot yuʼun te mukʼul sacerdotee: «¡Ya kalbat ta mantal te ya awalbotik ta jamal ta stojol te kuxul Dios teme jaʼatnix-a te Cristoat, te sNichʼanat te Diose!». 64 Jich la yal te Jesús: «Jaʼ, jich te bitʼil la awale. Pero, joʼon ya kalbeyex: ta ora bael ini, yame awilik te sNichʼan te Winik* te ya snajkan sba ta swaʼel kʼab te Dios te ay yuʼel sok te yak ta talel ta stokalil chʼulchan». 65 Jich yuʼun, te mukʼul sacerdote la schʼiʼ* skʼuʼ yuʼun sok jich la yal: «¡La sbolkʼoptayix te Diose! ¿Bistukxan kuʼuntik yantik testigoetik? ¡Ilawilik, jaʼexnix la awaʼiyik stojol te bitʼil la sbolkʼoptay te Diose! 66 ¿Bin ya awalik yuʼun?». Jich la yalik: «¡Akʼa yichʼ milel!». 67 La stubataybeyik sit yelaw sok la spujik ta majel. Ay yantik te la spakʼbeyik ta majel yelaw. 68 Jich la yalulanbeyik: «Cristo, teme j-alwanejate, ala kaʼiytik, ¿machʼa la smajat?».

69 Te kʼalal nakal ta yamakʼul na-a te Pedroe, tal ta stojol jtul j-abat ants sok jich albot yuʼun: «¡Te jaʼate ajokinoj-euk te Jesús te galileo!». 70 Pero, te Pedro la smuk ta yoʼtan te Jesús ta stojol te machʼatik tey ayik-ae. Jich la yal: «Ma jnaʼ te bin yakat ta yalele». 71 Te kʼalal bajt stejkʼan sba ta tiʼnail te Pedroe, ilot yuʼun yan j-abat ants sok jich la yalbey te machʼatik tey ayik-ae: «Te winik ini jaʼ sjokinoj-euk te Jesús te Nazarenoe». 72 Jaʼnix jich la schaʼmuk ta yoʼtan sok la yal ta jamal ta stojol te Diose: «¡Ma jnaʼbey sba te winik ya awalike!». 73 Ta patilxan bael, te machʼatik tey ayik-ae talik ta stojol te Pedro sok jich la yalbeyik: «Jamal chikan ta ilel te ajoy aba soke; melel chikan ta akʼop». 74 Jajch sbolkʼoptay sba sok jich la yal ta jamal ta stojol Dios: «¡Ma jnaʼbey sba te winik ya awalike!». Ta oranax-abi okʼ te tat mute. 75 Jich jul ta yoʼtan te Pedro te bin albot yuʼun te Jesuse: «Te kʼalal mato x-okʼ-a te tat mute, oxeb buelta amukojonix ta awoʼtan-a». Jich lokʼ bael ta fuera, bajt yokʼetay sba.