1 Crónicas
16 Jich la yotsesik te skaxaul chapbilkʼop yuʼun te smelelil Dios ta nailpakʼ te schajpanojix-a te David sok tey la yakʼik jilel-a. Jich yuʼun la yakʼik ta stojol te smelelil Dios chikʼbil majtaniletik sok milbil majtaniletik ta swenta lamalkʼinal. 2 Te kʼalal laj yoʼtan te David ta yakʼel te chikʼbil majtaniletik sok te milbil majtaniletik ta swenta lamalkʼinal, la yakʼbey bendición te lum Israel ta swenta sbiil te Jehová. 3 Jaʼnix jich la yakʼtiklanbey jpejch sepel pan, jpejch tenbil sit palmera sok jpejch tenbil takin tsʼusub spisil te israeletik, la yakʼbey ta jujuntul te winiketik sok te antsetik. 4 Te David la stsa chaʼoxtul levitaetik yuʼun ya x-abatinik ta stojol te Jehová swenta ya yichʼik ta mukʼ, ya yalbeyik wokol sok ya yalbeyik yutsil skʼoplal te Jehová te Dios yuʼun Israel. 5 Te Asaf jaʼ mero jolal, te Zacarías jaʼ te schebal jolal. Te Jeiel, Semiramot, Jehiel, Matitías, Eliab, Benaya, Obed-Edom sok te Jeiel jaʼ la stijik te aʼtejibaletik yuʼun música te ay scuerdail sok te arpaetik; te Asaf jaʼ la stij te sepseptakʼin te stsintsun skʼop. 6 Te Benaya sok te Jahaziel te jaʼik sacerdoteetik spisil-ora la yokʼesinik trompetaetik ta stojol te skaxaul chapbilkʼop yuʼun te smelelil Diose.
7 Ta yorail-abi, te David la schajpan jun kʼayojil ta swenta yalel wokol ta stojol te Jehová te jaʼ la yakʼbey snop te Asaf sok te yermanotak yuʼun ya skʼayojtayik:
8 «¡Albeyaik wokol te Jehová, albeyaik te sbiil,
akʼaik ta naʼel ta stojol te lumetik te bintik spasoj!
9 Kʼayojtayaik, albeyaik yutsil skʼoplal ta kʼayoj,*
nopilana ta awoʼtanik* spisil te yutsil yaʼtele.
10 Albeyaik yutsil skʼoplal te schʼul biil.
Tseʼeluk yoʼtanik te machʼatik ya sleik te Jehová.
11 Leaik te Jehová sok te yuʼel.
Leaik ta spisil-ora te sit yelaw.*
12 Julukme ta awoʼtanik te yutsil yaʼtel skʼab,
te milagroetik yuʼun sok te bitʼil ya xchajpanwane,
13 jaʼex, te stsʼumbalex Israel te j-abat yuʼune,
jaʼex, te snichʼnabex Jacob te tsabilexe.
14 Te Jehová jaʼ te Dios kuʼuntik.
Te bintik schapoj ay ta swolol balumilal.
15 Julukme ta awoʼtanik ta sbajtelkʼinal te chapbilkʼop yuʼun,
manchukme ya xkʼax jmil ta kaj tsʼumbalil
julukme ta awoʼtanik te bin jamal yaloj,
16 jaʼ te chapbilkʼop la spas sok te Abrahán,
sok te bin jamal la yalbey te Isaac,
17 te jich la yakʼ bitʼil mantalil ta stojol te Jacob
sok jich bitʼil chapbilkʼop ta spisil-ora ta stojol te Israel
18 te kʼalal jich la yal ‹Yame kakʼbat te skʼinal Canaán;
jaʼme te bin ya awichʼik akʼbeyele›.
19 Jich la awichʼik albeyel ini te kʼalal mato bayalex-ae,
jich, te kʼalal mato bayalex-ae, sok te jyanlumex ta kʼinal-abi.
20 Xtal xbajtik ta yanyantik lumetik,
sok xtal xbajtik ta yanyantik lugaretik te wentainbilik yuʼun ajwaliletik.
21 Te Dios ma la yakʼ te ni jtuluk winik ya x-utsʼinotik* yuʼun;
te bin la spase jaʼ te la skomtiklan te ajwaliletik.
22 Jich la yal: ‹Mame xa apikbonik te machʼatik tsabilik kuʼun
sok mame ayuk bin chopol* xa apasbeyik te j-alwanejetik kuʼune›.
23 ¡Kʼayojtayaik te Jehová jaʼex te nainemex ta balumilal!
¡Albeyaik skʼoplal ta jujun kʼajkʼal te koltayel yuʼune!
24 Albeyaik yutsil skʼoplal ta stojol te lumetik
sok albeyaik yutsil skʼoplal te yaʼtel ta stojol spisil te chʼin lumetik.
25 Melel te Jehová kʼax mukʼ sok jaʼnax stukel te ya skʼan ya yichʼ albeyel yutsil skʼoplal.
Jaʼ kʼaxtoxan ya skʼan xiʼel-a te bitʼil te yantik diosetike.
26 Te diosetik yuʼun te chʼin lumetik te ma xtuunik,
yan stukel te Jehová jaʼ la spas te chʼulchan.
27 Te banti aye kʼax tʼujbil sok ay yutsilal;
te Dios ay yuʼel sok tseʼel yoʼtan te banti nainem.
28 Akʼbeyaik te Jehová te bin ay ta swenta yichʼel,
jaʼex te jujunchajp familiaetik yuʼun te lumetik,
akʼbeyaik te Jehová te bin ay ta swenta yichʼel ta swenta te yutsilal sok te yuʼele.
29 Albeyaik yutsil skʼoplal te Jehová ta swenta te sbiil,
ichʼbeyaik tal smajtan sok tejkʼana abaik ta stojol.
Alapojukme achʼul kʼuʼik* te ya anijan abaik ta stojol te Jehová.*
30 ¡Xiʼaik te Dios jaʼex te nainemex ta balumilal!
Te balumilal lek yichʼoj yiptajib; jkʼaxel ma xjuʼ ta tijel.*
31 Tseʼelukme yoʼtan te chʼulchan, tseʼelukme yoʼtan te balumilal;
jichme xa awalik ta stojol te lumetik: ‹¡Jaʼix Ajwalil te Jehová!›.
32 Akʼa kʼopojuk ta tulan te mar sok spisil te bintik ay tey-ae;
tseʼeluk yoʼtan te lumkʼinal sok spisil te bintik ay tey-ae.
33 Jun pajal akʼa awunukik yuʼun stseʼelil yoʼtanik sok te toyem teʼetik ta stojol te Jehová,
melel yame xtal yichʼ ta kʼop te balumilal.
34 Albeyaik wokol te Jehová, melel lek yoʼtan stukel;
sbajtelkʼinal ay te skʼuxul yoʼtan te ma x-ijkitaywan.
35 Jichme xa awalik: ‹Koltayawotik, Dios kuʼuntik, jaʼat te ya xkoltaywanat,
tsobawotik sok koltayawotik lokʼel ta skʼab te lumetik,
yuʼun jich ya kaltik wokol ta swenta te achʼul biil
sok jich ya kaltik yutsil akʼoplal sok bayal stseʼelil koʼtantik.*
36 Akʼa yichʼ albeyel yutsil skʼoplal te Jehová te Dios yuʼun Israel ta sbajtelkʼinal›».
«¡Jichuk!»,* xchi spisil te lume. Tey-abi la yalbeyik yutsil skʼoplal te Jehová.
37 Jich yuʼun, te David la yijkitay te Asaf sok te yermanotak ta stojol te skaxaul chapbilkʼop yuʼun te Jehová swenta ya x-abatinik ta spisil-ora ta stojol te skaxaul chapbilkʼop, jich te bitʼil ya skʼan pasel ta jujun kʼajkʼal. 38 Te Obed-Edom sok te yermanotak, 68 ta tul ta spisilik, te Obed-Edom —te snichʼan Jedutún— sok te Hosá jaʼik jkanantiʼnailetik. 39 Te sacerdote Sadoc sok te yantik sjoʼtak ta sacerdoteil tekʼajtik ta stojol te nailpakʼ templo yuʼun te Jehová te ay ta toyol awilal* yuʼun Gabaón 40 swenta spisil-ora ya yakʼbeyik chikʼbil majtaniletik te Jehová ta skajtajib chikʼbil majtaniletik ta sab sok ta mal kʼajkʼal. Sok yuʼun ya skʼotesik ta pasel spisil te bin ya yal te Ley yuʼun te Jehová te la yakʼbey te lum Israel. 41 Jaʼnix jich jokinbilik yuʼun te Hemán, Jedutún sok te yantik winiketik te la yichʼik tsael yuʼun ya yalbeyik wokol te Jehová, melel «sbajtelkʼinal ay te skʼuxul yoʼtan te ma x-ijkitaywan»; 42 jokinbilik yuʼun te Hemán sok te Jedutún ta yokʼesinel te trompetaetik, ta stijel te sepseptakʼin te stsintsun skʼop sok te aʼtejibaletik yuʼun música te ya yichʼ tuuntesel ta yalbeyel yutsil skʼoplal te smelelil Dios; te snichʼnab Jedutún jaʼ yakik ta skanantayel-a te tiʼnaile. 43 Tey-abi, spisil te lume bajtik ta snaik. Te David bajt yakʼbey bendición te machʼatik ay ta snae.