Génesis

17 Kʼalal 99 yaʼbilal-a te Abrán, chiknaj te Jehová ta stojol sok jich albot yuʼun: «Joʼon Dioson te Machʼa spisil ya xjuʼ yuʼune. Beenan ta beetik kuʼun sok tojme xa awakʼ aba. 2 Ya jpas* jun chapbilkʼop ta atojol sok ya kakʼ te kʼax bayal ya xkʼot te atsʼumbale».

3 Jaʼ yuʼun, te Abrán la spajkan sba kʼalal ta lum, sok kʼoponotxan yuʼun te Diose. Jich albot: 4 «Te joʼone la jpas jun chapbilkʼop ta atojol, yananixme xkʼoat ta tatil yuʼun bayal nacionetik. 5 Ma jaʼukix Abrán* te abiile. Jaʼixme Abrahán,* melel ya kakʼ te tatil ya xkʼoat yuʼun bayal nacionetik. 6 Ya kakʼ te kʼax bayal ya xkʼot te atsʼumbal sok te ya xkʼot ta nacionetik. Soknix ya kakʼ te ya xlokʼ ajwaliletik ta atsʼumbal.

7 »Ya jkʼotes ta pasel te chapbilkʼop la jpas ta atojol soknix ta stojol te atsʼumbal ta kajalkaj bael. Jaʼ jun chapbilkʼop ta sbajtelkʼinal swenta Dios ya xkʼoon awuʼun sok Dios ya xkʼoon yuʼun te atsʼumbale. 8 Yame kakʼbat akʼinalin sok te atsʼumbal te kʼinal te banti nainat bitʼil jyanlum —spamal te skʼinal Canaán—, jaʼme awuʼunik ya xkʼot ta spisil-ora. Jaʼme Dioson ya xkʼoon yuʼun te atsʼumbale».

9 Te Dios jaʼnix jich la yalbeyxan te Abrahán: «Te jaʼate, yame skʼan ya achʼuun spasel te chapbilkʼop kuʼun, jaʼat soknix te atsʼumbal ta kajalkaj bael. 10 Jaʼ ini te chapbilkʼop te ya jpas ta atojol sok ta stojol te atsʼumbal te ya skʼan ya akʼotesik ta pasel: spisil te winiketik te ay ta awolilik yame skʼan ya yichʼik circuncisión.* 11 Yame skʼan ya abojbeyik lokʼel te snujkulel sjol skʼunil sbakʼetalik te jaʼ señail ya xkʼot te chapbilkʼop la jpas sok te jaʼexe. 12 Ta swaxakebal kʼajkʼal yayinel-a* te alal kerem yame skʼan ya yichʼ circuncisión, jichme ya yichʼ pasel ta kajalkaj tsʼumbalil chikan teme ya x-ayin ta ana sok chikan teme jyanlum te manbil awuʼun ta takʼin te ma jaʼuk atsʼumbale. 13 Spisil te winiketik te ya x-ayinik* ta ana sok spisil te machʼatik manbil awuʼun ta takʼin yame skʼan ya yichʼik circuncisión. Te chapbilkʼop kuʼun —te ya xchiknaj señail ta abakʼetalik— jaʼ jun chapbilkʼop te ma xlaj skʼoplal. 14 Teme jtul winik te ma yichʼoj circuncisión ma skʼan te ya yichʼ bojbeyel lokʼel te snujkulel sjol skʼunil sbakʼetal, yame skʼan ya yichʼ milel. Melel la skʼaxuntay te chapbilkʼop kuʼune».

15 Ta patil, te Dios jich la yalbey te Abrahán: «Te awinam Sarái* mame xa awalbeyix Sarái, melel Sara* sbiil ya xkʼotix. 16 Ya kakʼbey bendición sok ya kakʼbat anichʼan ta swenta. Ya kakʼbey bendición sok ya xlokʼ tal nacionetik ta swenta. Ya kakʼ te ya xlokʼ tal ajwaliletik ta stsʼumbal». 17 Tey-abi, te Abrahán la spajkan sba kʼalal ta lum. Jajch ta tseʼej sok jich la yal ta yoʼtan: «¿Yatobal xjuʼ ya sta snichʼan jtul winik te ayix 100 yaʼbilale? Sok ¿yatobal xjuʼ ya x-ayin* yal te Sara te ayix 90 yaʼbilale?».

18 Jaʼ yuʼun, te Abrahán jich la yalbey te smelelil Dios: «¡Awokoluk, akʼbeya bendición te Ismael!». 19 Pero, te Dios jich la yal: «Yame yakʼbat jtul anichʼan te awinam Sara, Isaac* ya awakʼbey sbiilin. Ya jpas chapbilkʼop sok te anichʼane. Jaʼ jun chapbilkʼop te ya xjalaj sbajtelkʼinal sok te stsʼumbale. 20 La kaʼiy stojol te bin la akʼan ta swenta te Ismael. Ta melel, ya kakʼbey bendición. Ya kakʼ te ya sta yal snichʼnab sok te kʼax bayal ya xkʼotike. 12 ta tul ajwaliletik ya xlokʼik tal ta stojol sok yame kakʼ te ya xkʼot ta jun mukʼul nación. 21 Manchukme jich-abi, jaʼ ya jchap jkʼop sok te Isaac, te anichʼan te ya yayintes* te Sara ta yan jaʼbil ta jich ora bael ini».

22 Te Dios lokʼ bael ta stojol te Abrahán te kʼalal laj yoʼtan ta kʼop* soke. 23 Jaʼ yuʼun, te Abrahán la yikʼ tal te Ismael te jaʼ snichʼan, la yikʼtiklan tal-euk spisil te winiketik te ayinemik* ta sna sok spisil te winiketik manbil yuʼun ta takʼin —jaʼ spisil te winiketik te ayik ta sna te Abrahán— yuʼun ya yichʼik bojbeyel lokʼel te snujkulel sjol skʼunil sbakʼetalik ta kʼajkʼalnix-abi, jich te bitʼil albot ta mantal yuʼun te Diose. 24 La yichʼ circuncisión te Abrahán te kʼalal 99 yaʼbilal-ae. 25 Te Ismael 13 yaʼbilal-a te kʼalal la yichʼ circuncisión. 26 Ta kʼajkʼalnix-abi, pajal la yichʼ circuncisión te Abrahán sok te Ismael te jaʼ snichʼane. 27 Spisil te winiketik ayik ta sna —te machʼatik ayinemik* ta sna sok te jyanlumetik manbil yuʼun ta takʼin— jaʼnix jich la yichʼik circuncisión.