Yaʼtel te Jpuk-kʼopetik
8 Te Saulo lek la yil te la yichʼ milel te Esteban.
Ta kʼajkʼal-abi jajch tulan utsʼinel ta stojol te congregación te ay ta Jerusalén. Ta spisilik pujkik bael ta skʼinal Judea sok Samaria, jaʼxanix jilik te jpuk-kʼopetike. 2 Ay chaʼoxtul winiketik te jun yoʼtanik ta stojol Dios te la yichʼbeyik bael sbakʼetal te Esteban yuʼun ya smukik sok bayal la yokʼetayik. 3 Yan stukel te Saulo tulan jajch yutsʼin te congregacione. Och ta jujun na, la sjochtiklan lokʼel tal te winiketik sok te antsetik yuʼun ya yakʼtiklan ta chukel.
4 Pero, te machʼatik pujkik bael yakik ta yalel ta bayuk te lek yachʼil kʼop ta swenta te skʼop Diose. 5 Te Felipe ko bael ta mukʼul lum* Samaria, jajch scholbey yaʼiy te ants winiketik ta swenta te Cristoe. 6 Te ants winiketik sok spisil yoʼtanik la yaʼiyik ta lek te bin la yal te Felipee, la schʼam yaʼiyik ta lek sok la yilik te milagroetik* yak ta spasele. 7 Bayal machʼatik ochem pukuj ta yoʼtanik sok tulan-nax ya x-awunik te kʼalal ya xlokʼik te pukujetike. Jaʼnix jich, bayal te machʼatik chamen yok skʼabik sok koxoetik te la yichʼik lekubtesele. 8 Jich ayin bayal tseʼel oʼtanil ta mukʼul lum-abi.
9 Tey ta mukʼul lum-abi, ay jtul winik te Simón sbiile, te kʼalal mato xkʼot ta pasel spisil ini, kʼayem ta spasel magia, sok yan-nax ya x-ilot yuʼun te nación yuʼun Samaria, jaʼnix jich la yal te mukʼ skʼoplale. 10 Spisilik ya yaʼiybeyik skʼop, mukʼ bikʼit jich la yalik: «Te winik ini naʼbil sba te yichʼojbey yuʼel te Diose». 11 Jich yuʼun la schʼam yaʼiyik ta lek te bin la yale, melel bayal tiempo te yan-nax la yilik-a te magia la spase. 12 Pero, te kʼalal cholbotik yaʼiy yuʼun Felipe te lek yachʼil kʼop yuʼun te Wentainel* yuʼun te Diose soknix te sbiil te Jesucristoe, la schʼuunik sok la yichʼik jaʼ* te winiketik sok te antsetike. 13 Jaʼnix jich, te Simón la schʼuun-euk te Diose, te kʼalal yichʼojix jaʼ-ae,* spisil-ora la sjokin te Felipe. Chamnax yoʼtan* yuʼun te kʼalal la yil te milagroetik* sok te mukʼul aʼteliletik la yichʼ pasele.
14 Te kʼalal la yaʼiyik stojol te jpuk-kʼopetik te ayik ta Jerusalén te la schʼuunikix te skʼop Dios te machʼatik ayik ta Samaria, la stikunik bael te Pedro sok te Juan. 15 Jich yuʼun koik bael tey-a sok la skʼoponik Dios yuʼun ya yichʼik te chʼul espíritu* te samaritanoetike, 16 melel jaʼnax yichʼojik jaʼ* ta swenta sbiil te Kajwaltik Jesús sok maʼyuk jtuluk yichʼoj-a te chʼul espiritue.* 17 Jich yuʼun la skajan skʼab ta stojolik, jich jajch yichʼik te chʼul espiritue.*
18 Kʼalal te Simón la yil te ya yichʼik chʼul espíritu* te jchʼuunjeletik kʼalal la skajan skʼab te jpuk-kʼopetik ta stojolike, kʼan yakʼ takʼin yuʼun, 19 jich la yalbey te jpuk-kʼopetik: «Akʼbonik kuʼel-euk yuʼun jich te machʼa ya jkajanbey jkʼab ta stojole jichme ya yichʼ-euk te chʼul espiritue».* 20 Pero, jich albot yuʼun te Pedro: «Pajal lajan sok te atakʼine, melel la akuy te ya xjuʼ ya aman ta takʼin te majtanil yuʼun te Diose. 21 Jkʼaxel maʼyuk ta awenta spasel te aʼtelil ini, melel ma tojuk awoʼtan ta stojol te Diose. 22 Jich yuʼun sujtesa awoʼtan yuʼun te schopolil* awoʼtane sok kʼanbeya wokol te Jehová* te yakuk spasbat perdón yuʼun te bin chopol ya anop ta awoʼtane; 23 melel ya kil te chʼaal venenoat sok te mosoinbilat yuʼun te mulile». 24 Jich la yal te Simón: «Kʼanbeyaik wokol te Jehová* te manchuk jich ya xkʼot ta pasel ta jtojol te bin la awalike».
25 Te kʼalal laj yoʼtanik ta scholel ta tsʼakal te lek yachʼil kʼop sok ta scholel te skʼop te Jehová,* sujtik ta Jerusalén sok yakik ta yalel te lek yachʼil kʼop ta chʼin lumetik yuʼun te Samaria.
26 Pero, te chʼul-abat yuʼun te Jehová* jich la yalbey te Felipe: «Jajchan, baan ta stojol sur ta be te ya xlokʼ tal ta Jerusalén te ya xko bael ta Gaza». (Te be ini ya xkʼax ta jochol takin kʼinal). 27 Jich bajt te Felipe, la sta sba ta be sok jtul eunuco* winik te talem ta Etiopía, jaʼ jtul winik te yichʼoj tulan yaʼtel ta swentainbeyel spisil skʼulejal te Candace, te ajwalil ants ta skʼinal Etiopía. Te winik ini kʼot ta Jerusalén ta yichʼel ta mukʼ te Diose, 28 pero yakix ta sujtel bael-a. Nakal ta scarreta, tulan yak ta skʼoponel te sjun j-alwanej Isaías. 29 Te chʼul espíritu* jich la yalbey te Felipe: «Noptsajan* bael te banti ay te carretae». 30 Jich yuʼun, te Felipe animaj bael ta stsʼeel te carreta sok la yaʼiy stojol te tulan yak ta skʼoponel te sjun j-alwanej Isaías te winike. Jich la sjojkʼoybey: «¿Yuʼun-nixbal ya xkʼot ta awoʼtan-a te bin yakat ta skʼoponele?». 31 Jich la yal te winike: «¿Bin-utʼil kʼan kʼotuk ta koʼtan? Melel maʼyuk machʼa ya yakʼbon jnop». Jich yuʼun la skʼanbey wokol te Felipe te yakuk xmo ta carreta sok te ya xjokinot ta nakleje. 32 Te bin yak ta skʼoponel ta sJun Dios jaʼ ini: «La yichʼ ikʼel bael ta milel jich bin-utʼil tuminchij; jaʼ jich te bin-utʼil jkolel tuminchij te maba ya x-awun te kʼalal ya yichʼ joxbeyel* te stsotsele, maba ya sjam ye. 33 Te kʼalal la yichʼ pejkʼanbeyel skʼoplale ma stojiluk la yichʼ chajpanel. ¿Machʼa kʼan yalbey skʼoplal te stsʼumbale? Melel ya yichʼ lajinbeyel te skuxlejal ta balumilale».
34 Jich yuʼun, te eunuco* winik jich la yalbey te Felipe: «Awokoluk, albon kaʼiy, ¿machʼa yak ta yalbeyel skʼoplal te j-alwaneje? ¿Jaʼnixbal skʼoplal, o yanbal machʼa skʼoplal?». 35 Jich te Felipe jajch scholbey yaʼiy te sJun Dios te banti yak ta skʼoponel-a te eunuco* winike, la scholbey yaʼiy te lek yachʼil kʼop ta swenta te Jesuse. 36 Te kʼalal ayik bael ta be, la staik jaʼ, jich la yal te eunuco* winik: «¡Ilawil! Ay jaʼ liʼi. ¿Aybal bin ya smakon te ya kichʼ jaʼe?».* 37 * 38 Jich la yal ta mantal te yakuk xkom ta beel te carretae, jich te Felipe sok te eunuco* winik ochik bael ta jaʼ. Te Felipe la yakʼbey yichʼ jaʼ* te eunuco winike. 39 Te kʼalal lokʼik tal ta jaʼe, te Felipe oranax ikʼot bael ta yan lugar yuʼun te chʼul espíritu* yuʼun Jehová,* te eunuco* winik maba la yilix-a. Jich tseʼel yoʼtan bajt te eunuco winike. 40 Yan stukel te Felipe kʼot ta Asdod, been kʼaxel ta lumlumtik yak ta yalel te lek yachʼil kʼop jaʼto te kʼalal kʼot ta Cesarea.