Eclesiastés
3 Spisil ay yorail;
ay yorail te bin jujunchajp ya yichʼ pasel ta yeʼtal chʼulchan:
2 ay yorail ayinel* sok ay yorail lajel;
ay yorail tsʼunbajel sok ay yorail ya yichʼ bulel te bin la yichʼ tsʼunele;
3 ay yorail milaw sok ay yorail poxtayel;
ay yorail te ay bin ya yichʼ jinel sok ay yorail te ay bin ya yichʼ pasel;
4 ay yorail okʼel sok ay yorail tseʼej;
ay yorail mel-oʼtan sok ay yorail ajkʼot;*
5 ay yorail schʼojel tonetik sok ay yorail sbusanel tonetik;
ay yorail petaw sok ay yorail te maʼyuk petaw;
6 ay yorail ta leel sok ay yorail ta chʼayel;
ay yorail ta kʼejel sok ay yorail ta chʼojel bael;
7 ay yorail ta chʼiʼel* sok ay yorail ta tsʼisel;
ay yorail te maʼyuk machʼa ya xkʼopoj sok ay yorail kʼop;*
8 ay yorail kʼuxultaywanej sok ay yorail pʼajel;
ay yorail guerra sok ay yorail lamalkʼinal.
9 ¿Bin ya xlokʼ yuʼun te j-aʼtel winik te tulan ya x-aʼtej? 10 Kiloj te bin akʼbil spasik yuʼun Dios te yal snichʼnab te winiketik yuʼun jaʼ ya xbajt ta yoʼtanik spasel. 11 Tʼujbil spisil te bintik spasoj te Dios ta yorail. Jaʼnix jich la yakʼbey ta yoʼtan te ants winiketik te ya xkuxinik ta sbajtelkʼinal;* spisil-abi te ants winiketik maʼyuk bin-ora ya xkʼot ta yoʼtanik spisil te yaʼtel spasoj te smelelil Diose.
12 La jta ta ilel te maʼyuk bin lekxan ya spas te ants winiketik, jaʼnax te ayuk stseʼelil yoʼtanik sok te yakuk spasik te bin lek te jayeb kʼajkʼal kuxulik ta kʼinal, 13 te yakuk xweʼ x-uchʼajik ta spisilik sok te yakuk smulanbeyik yutsilal te tulan aʼtelil ya spasike. Jaʼ-abi, jaʼ majtanil te talem ta stojol Dios.
14 Kʼoem ta koʼtan te spisil te bin ya spas te smelelil Dios sbajtelkʼinal ay. Maʼyuk bin ya xjuʼ ta otsesbeyel sok maʼyuk bin ya xjuʼ ta lokʼesbeyel. Jich spasoj te smelelil Dios swenta ya yichʼ xiʼel* yuʼun te ants winiketik.
15 Te bin yak ta kʼoel ta pasel ta ora ini, kʼoemix ta pasel; sok te bin yato yichʼ pasel, yichʼojix pasel. Pero, te smelelil Dios ya spas stukel te bin ya skʼan yoʼtan te ants winiketik sok te bin yakik ta sleel.
16 Jaʼnix jich la kil te bin ya yichʼ pasel liʼ ta balumilal: te banti la jkuy te ya yichʼ pasel te bin stojil jaʼ ya yichʼ pasel te bin chopol;* te banti ya jkuy te ya yichʼ pasel te bin lek jaʼ ya yichʼ pasel te bin ma lek. 17 Jaʼ yuʼun jich la kal ta koʼtan: «Te smelelil Dios pajal ya yichʼtiklan ta kʼop te machʼa toj yoʼtan sok te machʼa chopol,* melel ay yorail te bin jujunchajp ya yichʼ pasel sok te jujun aʼtelil ya yichʼ pasel».
18 Jaʼnix jich la kal ta koʼtan te smelelil Dios ya spas ta prueba te yal snichʼnab te ants winiketik sok ya yakʼtiklanbey yil te jich kʼoemik te bin-utʼil te chambalametik, 19 melel te bin ya xkʼot ta stojol te ants winiketik jaʼnix jich ya xkʼot ta stojol te chambalametik: pajal ya xlajik ta spisilik. Te bitʼil ya xlaj te jtule jich ya xlaj te yane, melel pajal ya xlaj te skuxlejalik. Jich yuʼun, te ants winiketik ma jaʼuk mukʼxan skʼoplal te bin-utʼil te chambalametik, melel tojolnax ta spisil. 20 Jun-nax te banti ya xbajtik ta spisilik. Spisilik talemik ta tsʼubil lum sok spisilik ya xchaʼsujtik ta tsʼubil lum. 21 Ta smelelil, ¿machʼa ya snaʼ teme ya xmo bael ta toyol te skuxlejal te ants winiketik o teme ya xko bael ta lumkʼinal te skuxlejal te chambalametik? 22 La jta ta ilel te bin lek ya xjuʼ ya spas jtul winik jaʼ te ya smulanbey yutsilal te yaʼtele, jaʼ smajtan ya xkʼot-abi. Melel ¿machʼa ya x-akʼbot snaʼ yuʼun te bin ya xkʼot ta pasel te kʼalal lajemix-ae?