Eclesiastés

5 Tsajtaya* spisil-ora te kʼalal ya xbaat ta sna te smelelil Dios, jaʼ lekxan te ya xnoptsajat* bael tey-a ta yaʼiyel te bin ya yichʼ alel te bin-utʼil ta yakʼel milbil majtanil jich te bitʼil ya spasik te machʼatik maʼyuk spʼijil yoʼtanik, melel ma staik ta ilel te ma lek te bin yakik ta spasele.

2 Mame orauknax ya xkʼopojat sok mame orauk ya awal lokʼel te bin ay ta awoʼtan ta stojol te smelelil Dios. Melel te smelelil Dios ay ta chʼulchan yan te jaʼat ayat ta balumilal. Jaʼ yuʼun ya skʼan ya atsajtay* te bitʼil ya xkʼopojat. 3 Te bayal mel-oʼtane ya yakʼ wayichiletik, sok te jowilkʼop yuʼun te machʼa maʼyuk spʼijil yoʼtan jaʼ ta skaj te bayal ya xkʼopoje. 4 Te kʼalal ay bin jamal ya awalbey te Dios te ya akʼotes ta pasel, mame xjalajat ta spasel, melel maba lek ya yil te machʼatik maʼyuk spʼijil yoʼtanik. Te bin jamal la awal te ya apase, kʼotesa ta pasel. 5 Jaʼ lekxan te maʼyuk bin ya awal te ya akʼotes ta pasele, jaʼ wokol teme ya awale, pero te maba ya akʼotes ta pasel. 6 Mame xa awakʼ te ya ata amul ta swenta te awee ni jaʼuk xa awal ta stojol te chʼul-abat* te chʼayate. ¿Bin yuʼun te ya awakʼ ya x-ilin te smelelil Dios ta swenta te bin ya awal te jich ya sjin te yaʼtel akʼab? 7 Jich bitʼil ya yakʼ bayal wayichiletik ta skaj te bayal mel-oʼtane, jaʼnix jich tojolnax te kʼalal bayal te bintik ya yichʼ alel, yan te jaʼate xiʼame te smelelil Diose.

8 Mame chamuknax awoʼtanik* yuʼun te kʼalal ya yichʼ utsʼinel* te pobreetik, te kʼalal ya yichʼ kʼaxuntayel te ley sok te ya yichʼ pasel te bin ma stojiluk ta alumalik. Melel te machʼa yichʼoj mukʼ yaʼtel yak ta ilel yuʼun te machʼa yichʼoj toyolxan yaʼtel ta stojole, pero ay machʼatik toyolxan yaʼtelik ta stojolik.

9 Jaʼnix jich ta spisilik ya yichʼik te bintik ya yakʼ te lumkʼinale, hasta te ajwalil ya stuuntes-euk te bin ya yakʼ te lumkʼinale.

10 Te machʼa kʼux ta yoʼtan te takʼin,* maʼyuk bin-ora jun yoʼtan ya yaʼiy sba sok te stakʼine, te machʼa kʼux ta yoʼtan te kʼulejalile, maʼyuk bin-ora jun yoʼtan ya yaʼiy sba sok te jayebix ay yuʼune. Jaʼ-abi tojolnax-euk.

11 Kʼalal ya xpʼol te kʼulejalil, ya xpʼol-euk te ants winiketik te ya slajinike. ¿Bin ya xlokʼ yuʼun-a te yajwal te bitʼil jaʼnax ya yile?

12 Bujtsʼan-nax swayel te machʼa ya x-aʼteje, chikan teme jtebnax o bayal ya xweʼ, pero te bitʼil bayal bintik ay yuʼun te jkʼuleje maba ya x-ochix swayel yuʼun.

13 Ay bin kiloj ta balumilal te ya yakʼ tulan wokolil, jaʼ te ya sta bayal swokol te machʼa ya skʼej bayal skʼulejal. 14 Ya schʼay te skʼulejal ta skaj te ay bin ma lek ya xkʼot ta lokʼel yuʼun, jich yuʼun te kʼalal ya x-ayin* snichʼan maʼyukix bin ya yakʼbey jilel.

15 Te bitʼil jul ta kʼinal te winike, jichnix ya sujt bael. Manchukme tulan aʼtej maʼyuk bin ya xjuʼ ya yichʼ bael.

16 Jaʼnix jich ini ya yakʼ tulan wokolil: te bitʼil jul ta kʼinal te winike, jaʼnix jich ya sujt bael. ¿Bin ya xkʼot ta lokʼel ta stojol te machʼa spisil-ora tulan ya x-aʼtej te jich kʼoem te yak ta snutsel te ikʼe? 17 Jaʼnix jich te jayeb kʼajkʼal kuxule ya xweʼ ta ijkʼal kʼinal, ma snaʼix bin ya spas, ay schamel sok ya x-ilin.

18 Jaʼ ini jaʼ te bin kiloj te lek sok te snujpʼ ta pasel: te junuk yoʼtan ya xweʼ x-uchʼaj te ants winik, sok te ya smulanbey yutsilal te tulan aʼtelil ya spas liʼ ta balumilal te jayebnax kʼajkʼal akʼbil skuxlejal yuʼun te smelelil Dios, melel jaʼ smajtan ya xkʼot-abi. 19 Jaʼnix jich, kʼalal te smelelil Dios ay machʼa ya yakʼbey skʼulejal sok sbiluk, sok te ya yakʼbey te ya xjuʼ ya smulanbey yutsilal, yame skʼan ya stsak te smajtan sok te ya smulanbey yutsilal te tulan yaʼtele. Jaʼ-abi jaʼ majtanil te talem ta stojol Dios. 20 Maba ya xbajt juluk ta yoʼtan te komnax te skuxlejale, melel te smelelil Dios yakʼoj te jaʼ ya xbajt ta yoʼtan te stseʼelil yoʼtan.