Te lek yachʼil kʼop ya yal te Marcos

10 Ta patil lokʼ bael tey-a bajt ta stiʼil skʼinal Judea te ay ta jejch Jordán. Yan buelta tal bayal ta tul ants winiketik ta stojol. Jich bitʼil kʼayem ta spasel, jajch snojpteslan. 2 Tey-abi talik chaʼoxtul fariseoetik ta stojol te Jesús yuʼun ya spasik ta prueba. La sjojkʼoybeyik teme ya xjuʼ ya slajinbey skʼoplal te snujpunel te winike. 3 Jich albotik yuʼun te Jesuse: «¿Bin la yalbeyex ta mantal te Moisese?». 4 Te fariseoetik jich la yalik: «Te Moisés la yakʼ permiso te ya xjuʼ ya spasbey sjunil te banti ya yal te ya yijkitay yinam te winik sok te akʼa stikun sujtele». 5 Jich albotik yuʼun te Jesús: «Jich la yal ta mantal te Moisés ta skaj te ma xa achʼuunik te kʼope.* 6 Pero, ta sjajchibal te bintik la yichʼ pasele, te Dios ‹la spas jtul winik sok jtul ants› 7 ‹jaʼ swentail te ya yijkitay jilel smeʼ stat te winik, 8 jich jun-nax sbakʼetal ya xkʼot ta schebalik›, jaʼ yuʼun maba chebikix, junxanix sbakʼetalik. 9 Jaʼ yuʼun, te bin jun-nax yakʼoj te Diose, mame ayuk machʼa ya xat». 10 Te kʼalal ayikix ta na-ae, te jnopojeletik jajch sjojkʼoybeyik te Jesús ta swenta ini. 11 Te Jesús jich la yalbey yaʼiyik: «Spisil te machʼa ya yijkitay yinam sok te ya xnujpun sok yan ants yakme ta antsiwej ta stojol te sbabial yiname. 12 Jaʼnix jich, te ants teme ya yijkitay te smamalal sok ya xnujpun sok yan winik, lame yakʼ sba ta antsinel-abi».

13 Tey-abi, te ants winiketik la yikʼik tal chʼin achʼix keremetik ta stojol te Jesús yuʼun ya skajan skʼab ta stojolik,* pero te jnopojeletik la skomik. 14 Kʼalal jich la yil te Jesuse, ma la smulan sok jich la yaltiklanbey te jnopojeletik: «Akʼa talukik ta jtojol te chʼin achʼix keremetik. Mame xa akomik, melel te Wentainel* yuʼun te chʼulchane jaʼ yuʼunik te machʼatik jich stalelik te bin-utʼil te chʼin achʼix keremetik ini. 15 Jamal ya kalbeyex te machʼa ma schʼuun te Wentainel* yuʼun Dios jich te bin-utʼil jtul chʼin achʼix kerem maʼyuk bin-ora ya x-och tey-a». 16 La spetiklan te chʼin achʼix keremetik sok jajch yakʼtiklanbey bendición kʼalal la skajan skʼab ta sjolik.*

17 Kʼalal yak ta beel-a te Jesuse, tal ta animal jtul winik, jul skejan sba ta stojol sok jich la sjojkʼoybey: «Lekil Maestro, ¿bin ya skʼan ya jpas yuʼun ya xkuxinon ta sbajtelkʼinal?». 18 Te Jesús jich la yalbey: «¿Bin yuʼun ya awal te lekone? Maʼyuk machʼa lek, jaʼnax lek stukel te Diose. 19 Anaʼoj te bintik ya yal te mantaliletike: mame xa awaʼiy milaw, mame xa awaʼiy antsiwej sok mame xa awakʼ aba ta antsinel, mame xa awaʼiy elekʼ, mame xa awakʼ aba ta lotil testigo, mame xa awaʼiy loʼlaywanej, ichʼa ta mukʼ te atat sok te anan».* 20 Jich la yal te winike: «Maestro, ta jkeremilto yakon ta spasel spisil ini». 21 Te Jesús la yilbey sit te winike, kʼux la yaʼiy ta yoʼtan sok jich la yalbey: «Ay junxan te bin ya skʼan ya apase: baan, chona te bintik ay awuʼun, te takʼin ya atae pukbeya te pobreetik; jichme ya ata akʼulejal ta chʼulchan. Tey-abi laʼ, tʼunawon». 22 Te kʼalal jich la yaʼiy stojole, chebaj yoʼtan yuʼun sok smeloj yoʼtan sujt bael, melel bayal te skʼulejale.

23 Te Jesús la yil ta sjoyobal sok jich la yalbey te jnopojeletik yuʼune: «¡Wokol ya yaʼiyik te ya x-ochik ta Wentainel* yuʼun Dios te jkʼulejetike!». 24 Te jnopojeletik chamnax yoʼtanik* yuʼun te bin la yale. Pero, jich albotik yuʼun te Jesús: «Kal jnichʼnab, ¡wokol te ay machʼa ya x-och ta Wentainel* yuʼun te Diose! 25 Jaʼ oraxan ya xkʼax jkojt camello ta sit te aguja te bitʼil jtul jkʼulej ya x-och ta Wentainel* yuʼun te Diose». 26 Te kʼalal jich la yaʼiyik te jnopojeletike, chamtoxan yoʼtanik* yuʼun. Jaʼ yuʼun, jich la yalbeyik* te Jesús: «¿Machʼa ya xjuʼ ya xkolix-a?». 27 Te Jesús la yilbey sit te jnopojeletik yuʼun sok jich la yaltiklanbey: «Te ants winiketik ma xjuʼ yuʼunik spasel ini, pero maba wokol ya yaʼiy stukel te Diose, melel te Diose spisil ya xjuʼ yuʼun spasel stukel». 28 Jich la yal te Pedro: «Te joʼonkotike la kijkitaytik jilel spisil te bin ay kuʼuntik swenta ya jtʼunatkotik». 29 Te Jesús jich la yaltiklanbey: «Jamal ya kalbeyex, spisil te machʼa yijkitayoj sna, sbankiltak, swixitak, yijtsʼinab, stat, snan,* yal snichʼnab o skʼinal ta jwenta o ta swenta te lek yachʼil kʼope, 30 ta ora ini 100 buelta ya yichʼxan akʼbeyel, chikan teme sna, sbankiltak, swixitak, yijtsʼinab, snan,* yal snichʼnab o skʼinal manchukme sok kontrainel, yame sta skuxlejal sbajtelkʼinal ta achʼ balumilal. 31 Ayme bayal te machʼatik nail ayike, jaʼme patil ya xkʼotik, sok ayme bayal te machʼatik patil ayike, jaʼme nail ya xkʼotik».

32 Te kʼalal yakik ta moel bael ta Jerusalén-ae, jaʼ nail yak ta beel te Jesuse. Te jnopojeletik chamen-nax yoʼtanik* yakik ta stʼunel sok ochik ta xiwel te machʼatik patil yakik ta talele. Te Jesús parte la schaʼyikʼ bael te 12 ta tul jnopojeletik sok la sjulteslanbey ta yoʼtanik te bin nopol* ya xkʼot ta pasel ta stojole. 33 Jich la yaltiklanbey: «Yakotikme ta moel bael ta Jerusalén. Te sNichʼan te Winik* teyme ya yichʼ akʼel ta skʼab-a te jwolwanej sacerdoteetik sok te escribaetik. Yame yakʼik ta milel sok yame yakʼbeyik ta skʼab te jyanlumetike. 34 Yame slabanik, yame stubatayik, yame yakʼbeyik nujkul* sok yame smilik, pero ta yoxebal kʼajkʼal yame xchaʼkuxaj».

35 Te Santiago sok te Juan te snichʼnab te Zebedeo talik ta stojol te Jesús sok jich la yalbeyik: «Maestro, ya jkʼantik te yakuk apas ta jtojolkotik te bin ya jkʼantik ta atojole». 36 Jich jojkʼoybotik yuʼun te Jesús: «¿Bin ya akʼanik te ya jpas ta atojolike?». 37 Jich la yalik: «Akʼawotik te yakuk jokinatkotik ta naklej, jtul ta awaʼel, jtul ta akʼexam te kʼalal ochematix ta Ajwalil-ae». 38 Jich la yal te Jesús: «Te jaʼexe ma xa anaʼik te bin yakex ta skʼanele. ¿Yuʼunbal ya xjuʼ awuʼunik yuchʼel te bin ay ta copa* te yakon ta yuchʼele? O ¿yabal xjuʼ awuʼunik yichʼel jaʼ* jich bitʼil yakon ta yichʼel jaʼ te joʼone?». 39 «Yak, ya xjuʼ kuʼunkotik», xchiik. Jich albotik yuʼun te Jesús: «Melelnix-a, ya xbajt awuchʼik-euk te bin ay ta copa* te yakon ta yuchʼele sok ya xbajt awichʼik jaʼ* jich bitʼil yakon ta yichʼel jaʼ-euke. 40 Pero, ma jaʼuk ay ta jwenta yalel te machʼa ya xnajkaj ta jwaʼel sok ta jkʼexame. Te lugaretik-abi, jaʼnax ya xnajkajik tey-a te machʼatik la yichʼik chajpanbeyel ta stojolike».

41 Te kʼalal la yaʼiyik stojol te yantikxan lajuntule, la yilintayik te Santiago sok te Juane. 42 Pero, te Jesús la stsob tal te jnopojeletik yuʼune sok jich la yaltiklanbey: «Anaʼojik te ajwaliletik ta balumilal ya yakʼ sbaik ta ichʼel ta mukʼ ta stojol te lume sok te machʼatik yichʼoj mukʼ yaʼtelik ya spasik ta mantal te ants winiketike. 43 Pero, te jaʼexe mame skʼan te jich ya apasike. Te machʼa ya skʼan te mukʼ skʼoplal ya xkʼot ta awolilike ya skʼan te ya x-abatin ta stojol te yantike, 44 te machʼa nail ya skʼan ya xkʼot ta awolilike ya skʼan te ya yakʼ sba ta abatinel ta stojol te yantike. 45 Melel te sNichʼan te Winike* maba tal yabatin te yantike, jaʼ tal yakʼ sba ta abatinel ta stojol te yantike sok tal yakʼ sba ta lajel yuʼun jich ya sta skolelik bayal ta tul ants winiketik».

46 Kʼotik ta Jericó. Te kʼalal lokʼik bael ta Jericó te Jesús sok te jnopojeletik yuʼune, jokinbil yuʼun kʼax bayal ta tul ants winiketik. Ay jtul winik te ma xyil kʼinal te nakal ta tiʼbe ta kʼanbajel, Bartimeo sbiil, jaʼ snichʼan te Timeo. 47 Te kʼalal la yaʼiy stojol te jaʼ Jesús te Nazareno te yak ta kʼaxele, jich jajch ta aw: «¡Jesús, sNichʼan David, naʼbon yoʼbolil jba!». 48 Tey-abi, bayal machʼatik la skomik sok la yalbeyik te manchuk ya x-awunixe, pero tulanxan awun: «¡Snichʼan David, naʼbon yoʼbolil jba!». 49 Jich te Jesús la stejkʼan sba sok jich la yaltiklanbey: «Ikʼaik tal, akʼa taluk liʼi». Jich la yalbeyik te winik te ma xyil kʼinale: «Ayukme smukʼul awoʼtan, jajchan, yak yikʼbelat». 50 Oranax la slokʼes jilel te snajtil kʼuʼe, wil jajchel, bajt te banti ay te Jesuse. 51 Te Jesús jich la sjojkʼoybey: «¿Bin ya akʼan te ya jpas ta atojole?». Te winik te ma xyil kʼinale jich la yal: «Rabbóni,* akʼa jamuk te jsite». 52 Jich albot yuʼun te Jesús: «Baan, lekubatix ta swenta te schʼuunel awoʼtane». Ta oranax la yil kʼinal te winike sok jajch stʼun te Jesuse.