Sbabial carta ta stojol te Timoteo
2 Jich yuʼun, te bin nail ya jkʼan te ya apasike jaʼ te ya apasik oración, te ya akʼanbeyik wokol Dios, te ya akʼoponik Dios ta stojol yantik sok te ya awalbeyik wokol Dios ta stojol spisil te ants winiketik, 2 ta stojol ajwaliletik sok ta stojol spisil te machʼatik yichʼojik mukʼ yaʼtelik, yuʼun jich ya xjuʼ te lamalkʼinal ya xkuxinotik sok te lamal koʼtantik ta yichʼel ta mukʼ te Dios sok te toj ayukotik ta kʼinale. 3 Jaʼ ini jaʼ te bin lek ya yil sok te lek yoʼtan yuʼun te Dios te Jkoltaywanej kuʼuntik, 4 melel jaʼ skʼanojel yoʼtan te yakuk sta skolelik spisil te ants winiketike sok te yakuk xkʼot ta yoʼtanik ta lek te smelelil kʼope. 5 Melel jun-nax te Diose sok jtulnax te machʼa tekʼel ta kʼop ta stojol Dios yuʼun te ants winiketike: jaʼ jtul winik, jaʼ te Cristo Jesús 6 te la yakʼ sba ta lajel ta stojol spisil te ants winiketik. Ta swenta ini yame yichʼ alel ta stojol te ants winiketik ta yorail. 7 Jaʼ swentail te la kichʼ akʼbeyel kaʼtel ta jcholkʼop sok ta jpuk-kʼop ta yalbeyel skʼoplal ini —smelelil te bin ya kale, ma jlotuk—, maestroon yuʼun te jyanlumetik ta swenta te chʼuunel oʼtanil sok te smelelil kʼope.
8 Jich yuʼun ya jkʼan te manchuk ya skom sbaik ta skʼoponel Dios te winiketik ta bayuk, akʼa stoy skʼabik te machʼatik jun yoʼtanik, te manchuk sok ilinba sok jach kʼop. 9 Jaʼnix jich-euk, te antsetik ya skʼan te lekuk ta ilel te skʼuʼ spakʼ ya slapike sok pekʼelukme yoʼtanik sok ayukme spʼijil yoʼtanik te bin-utʼil ya schajpan sbaike, mame yanuknax-a te bin-utʼil ya schʼalik* te sjolik ta oro o ta perlaetik o kʼuʼul pakʼal te kʼax toyol stojole, 10 jaʼ lek te ya schʼal sbaik ta lekil aʼteliletik, jichnix te bin-utʼil snujpʼ te ya spas te antsetik te yichʼojik ta mukʼ te Diose.
11 Mame xkʼopoj te ants te kʼalal ya schʼam yaʼiy stojol te nojptesele, pekʼelukme yoʼtan. 12 Maba ya kakʼ te ya xnojpteswan te antse ni jaʼuk te ya xmantalaj ta stojol te winike; te bin ya skʼan ya spase jaʼ te ya slaman sbae. 13 Melel jaʼ nail la yichʼ pasel te Adán, patil te Evae. 14 Sok ma jaʼuk la yichʼ loʼlayel te Adane, jaʼnax la yichʼ loʼlayel stukel te Evae, jich la sta smul. 15 Pero, te ants yame yichʼ kanantayel* ta swenta te ya sta yalatak, jaʼnax teme ma xchʼay te schʼuunel yoʼtan, te skʼuxul yoʼtan, te bitʼil chʼultesbil sok te ayuk spʼijil yoʼtane.