Génesis

8 Pero, te Dios la snaʼ te Noé sok te jtiʼawal chambalametik, te alakʼil chambalametik* te ochemik ta arca soke. Jich yuʼun, te Dios la yakʼ taluk tulan ikʼ ta balumilal, jich jajch ta koel te snojel jaʼe. 2 Majk spisil te jaʼetik ta chʼulchan sok kejchaj te tulan jaʼal ta chʼulchan, jich kʼax bael te jaʼale. 3 Kʼunkʼun tsʼuj koel te jaʼ ta balumilal. Kʼalal kʼaxemix 150 kʼajkʼal-ae, bayal tsʼujemix-a te jaʼe. 4 Ta 17 ta sjukebal u, kajal jilel te arca ta sba witsetik yuʼun Ararat. 5 Bejbe* tsʼuj koel te jaʼ kʼalal ta slajunebal u. Ta sbabial kʼajkʼal yuʼun te u-abi, jajch ta chiknajel te sniʼ witsetike.

6 Te kʼalal kʼaxemix 40 kʼajkʼal-ae, te Noé la sjambey te sventanaul te arca, 7 la skoltay lokʼel jkojt joj* te xtal xbajt jaʼto te kʼalal tupʼ te jaʼ ta balumilal.

8 Ta patil, te Noé la stikun lokʼel jkojt stsumut* yuʼun ya yil teme tsʼujix koel te jaʼ ta balumilal. 9 Pero, te stsumut* maba la sta te banti ya slujtsan sba, melel ayto jaʼ ta balumilal, jich sujt tal ta arca. Te Noé la slokʼes skʼab yuʼun ya stsak ochel ta arca te stsumute. 10 La smaliy jukebxan kʼajkʼal yuʼun la schaʼtikun lokʼel. 11 Malix kʼajkʼal-a te sujt tal te stsumut.* ¡Te Noé la yil te slutʼoj tal yaxal yabinal olivo! Jich la snaʼ te tsʼujemix te jaʼ ta lumkʼinale. 12 La smaliy jukebxan kʼajkʼal, ta patil la schaʼtikun lokʼel te stsumut,* pero maba sujtix tal-a.

13 Kʼalal 601 yaʼbilal-a te Noé, ta sbabial kʼajkʼal yuʼun te sbabial u, tupʼ te jaʼ ta balumilal. Te Noé la slokʼes te smajkil te arca, la yil te yak ta takijel te lumkʼinale. 14 Ta 27 ta schebal u, takijemix ta lek-a te lumkʼinale.

15 Tey-abi, te Dios jich la yalbey te Noé: 16 «Lokʼan ta arca sok te awinam, te anichʼnab sok te awalibtake. 17 Lokʼan sok spisil te bintik kuxajtik: te jaʼmal mutetik* te ya xwilik, te chambalametik te chaneb yok sok te chambalametik te staslajan ya xbeenik ta lum. Jich ya xjuʼ ya x-esmajik sok ya spʼol sbaik ta balumilal sok te bayal ya xkʼotike».

18 Jich lokʼ ta arca te Noé, te snichʼnab, te yinam sok te yalibtake. 19 Spisil te bintik kuxajtik, spisil te chambalametik te staslajan ya xbeenik ta lum sok spisil te jaʼmal mutetik* te ya xwilik —spisil te bintik ya stij sba ta balumilal— lokʼik ta arca ta jujunchajp. 20 Ta patil, te Noé la spasbey skajtajib chikʼbil majtanil te Jehová, tey la yakʼ ta chikʼbil majtanil chaʼoxkojt chambalametik te lek skʼoplalik sok chaʼoxkojt mutetik te ya xwilik te lek skʼoplalik. 21 Te Jehová ay bin sumetnax yikʼ* la yaʼiy. Jaʼ yuʼun, jich la yal ta yoʼtan te Jehová: «Maʼyuk bin-ora ya kakʼxan bolobuk skʼoplal te lumkʼinal ta swenta smul te ants winiketik, melel ta schʼielikto ayix ta yoʼtanik-a te bintik ma leke. Maʼyuk bin-ora jich ya jlajinxan te bintik kuxajtike. 22 Liʼ bael ta ora ini, ta balumilal spisil-ora ya x-ayin tsʼunbajel sok stsobel sit awal tsʼunubil, sik sok kʼajkʼal, yorail skʼepelal kʼinal sok yorail sik, kʼajkʼal sok ajkʼabal».