Proverbios
9 Te smelelil pʼijil oʼtanil la spasix sna;
sok la spasbey jukchʼix yoyal.
3 La stikun bael te j-abat antsetik yuʼun
swenta kʼalalto ta toyol lugaretik yuʼun te mukʼul lum jich tulan ya yalik:
4 «¡Spisil te machʼatik maʼyuk bin ya snaʼik akʼa talukik liʼi!».
Jich ya yalbey te machʼatik maʼyuk spʼijil yoʼtanik:
5 «Laʼik, la weʼaik te pan kuʼun
sok uchʼaik te vino te kapbil kuʼune.
6 Lea spʼijil awoʼtanik,* jichme ya xkuxinex;
beenanik ta sbelal te bintik ay ta ichʼbeyel swentail».
7 Te machʼa ya skom te jlabanwanej yame sta kʼexlal,
8 Mame xa atsits* te jlabanwanej, melel ay bin ma lek ya xjuʼ ya spasbat.
Tsitsa te machʼa ay spʼijil yoʼtan kʼuxme ya yaʼiyat stukel.
9 Nojptesa te machʼa ay spʼijil yoʼtan, jichme ya staxan spʼijil yoʼtan-a.
Nojptesa te machʼa toj yoʼtan, jichme ay binxan ya snaʼ-a.
10 Te xiʼel te Jehová jaʼ te bin sbabial ya skʼan pasel yuʼun ya jtatik pʼijil oʼtanil,
te snaʼbeyel sba te Mero Chʼul Dios yame yakʼ jnaʼtik te bintik ay ta ichʼbeyel swentail.
11 Melel, joʼon ta jwenta te bayal jaʼbil ya xkuxinat
sok te ya yichʼ najtubtesel te akuxlejal.
12 Teme ya ale spʼijil awoʼtan, jaʼatnixme ya ata alekilal yuʼun;
teme jlabanwanejat, jaʼatnixme ya awilbey swokolil.
13 Te ants te maʼyuk spʼijil yoʼtan bayal ya xkʼopoj.
Maʼyuk spʼijil, jkʼaxel maʼyuk bin ya snaʼ.
14 Ya snajkan sba ta yochibal sna, ta jun naktajibal,
te ay ta toyol lugaretik yuʼun te mukʼul lum,
15 sok teyto ya yawtay-a te machʼatik yakik ta kʼaxel,
jaʼik te machʼatik tojnax stʼunoj te sbeike:
16 «¡Spisil te machʼatik maʼyuk bin ya snaʼik akʼa talukik liʼi!».
Jich ya yalbey te machʼatik maʼyuk spʼijil yoʼtanik:
17 «Chiʼ ta uchʼel te jaʼ te elkʼanbil
sok kʼax bujtsʼan te pan te muken ya yichʼ weʼel».
18 Pero ma snaʼik te tey ayik-a te machʼatik lajemik te maʼyuk bin ya xjuʼ ya spasikix,
te machʼatik la yikʼtiklan ta sna ayik kʼalalto ta skʼubulil te Mukenal.*