2 Crónicas

24 Ay jukeb yaʼbilal-a te Jehoás te kʼalal och ta ajwalil, wentainwan 40 jaʼbil ta Jerusalén. Zibíah sbiil te snan* te talem ta Beer-Seba. 2 Te Jehoás jaʼ la spas te bintik lek ya yil te Jehová te jayeb kʼajkʼal kuxul ta kʼinal te sacerdote Jehoiadá. 3 Te Jehoiadá la slebey cheb yinam te Jehoás, sok ayin* skerem nichʼnab sok yantsil nichʼnab.

4 Ta patil, te Jehoás lokʼ ta yoʼtan te ya yachʼubtesbey te sna te Jehová. 5 Jaʼ yuʼun la stsob tal te sacerdoteetik sok te levitaetik, jich la yaltiklanbey: «Baanik ta mukʼul lumetik yuʼun Judá sok tsobaik tal te takʼin te ya yakʼik ta jujun jaʼbil spisil te lum Israel swenta ya alekubtesik te sna te Dios awuʼunik. Pasaikme ta ora». Pero, te levitaetik maba la spasik ta ora. 6 Jich yuʼun, te ajwalil Jehoás la stikun ta ikʼel te Jehoiadá te jaʼ jwolwanej yuʼun te sacerdoteetik sok jich la yalbey: «¿Bin yuʼun te maba awalojbey te levitaetik te yakuk stsobik tal te chʼul patanil te ya skʼan ya yakʼ te yajwalul Judá sok te Jerusalén, jaʼ te chʼul patanil te ya skʼan ya yakʼ te lum Israel ta swenta te nailpakʼ yuʼun te Testigo Kʼop te la yal ta mantal te Moisés, te j-abat yuʼun Jehová? 7 Te yalatak te Atalía, jaʼ te ants te kʼax chopol,* la sten sbaik ochel ta sna te smelelil Dios sok la stuuntesik ta stojol Baal te bintik chʼultesbil ta sna te Jehová». 8 Jich yuʼun, ta swenta smantal te ajwalil la yichʼ pasel jun caja sok la yakʼik ta fuera, tey ta yochibal ta sna te Jehová. 9 Tey-abi bajt yalik ta spamal skʼinal Judá sok ta Jerusalén te akʼa yichʼik tal ta stojol Jehová te chʼul patanil te la yal te Moisés —te j-abat yuʼun te smelelil Dios—, jaʼ te chʼul patanil te la schiknajtesbey skʼoplal ta jochol takin kʼinal ta stojol te israeletik. 10 Ta swenta-abi, spisil te lum sok spisil te machʼatik yichʼoj mukʼ yaʼtelik tseʼelnax yoʼtanik yuʼun. La yakʼik te chʼul patanil jaʼto te kʼalal noj yuʼunik te cajae.*

11 Te kʼalal ya yichʼik bael te levitaetik te caja ta stojol te ajwalil sok teme ya yilik te kʼax bayalix te takʼin tey-ae, te secretario yuʼun te ajwalil sok te machʼa ya skoltay te jwolwanej yuʼun te sacerdoteetik ya slokʼesik jilel te takʼin sok ya schaʼsujtesik ta yawil te cajae. Jich la spasulanik ta jujun kʼajkʼal, kʼax bayal takʼin la stsobik. 12 Jich yuʼun, te ajwalil sok te Jehoiadá jaʼ ya yakʼbeyik te takʼin te machʼatik swentainojik yilel te aʼtelil te yak ta pasel ta sna te Jehová, ta patil jaʼ ya stojikix-euk-a te jtopʼtonetik sok te machʼatik ya snaʼik ta lek spasel tʼujbil aʼteliletik yuʼun ya yachʼubtesik te sna te Jehová, jaʼnix jich ya stojik-euk te machʼatik ya x-aʼtejik sok hierro sok cobre yuʼun ya slekubtesbeyik te sna te Jehová. 13 Jich jajchik ta aʼtel te machʼatik swentainojik yilel te aʼtelil. Te aʼtelil te la swentainik yilele jajch ta juʼel bael yuʼunik. Jichnix la schaʼpasik te sna te smelelil Dios jich te bitʼil ay ta nailal sok la yakʼbeyikxan yip. 14 Jaʼnax te kʼalal juʼ ta pasel te aʼtelil, la yichʼbeyik bael te ajwalil sok te Jehoiadá te jayebxan jil te takʼine, jaʼ la stuuntesik yuʼun la spasik-a te aʼtejibaletik ta swenta te sna te Jehová: jaʼ te aʼtejibaletik te ya yichʼ tuuntesel ta swenta abatinel sok ta swenta yakʼel majtanil, jaʼnix jich la yichʼ pasel te copaetik sok aʼtejibaletik te pastiklanbil ta oro sok ta plata. Te jayeb kʼajkʼal kuxul ta kʼinal te Jehoiadá, spisil-ora la yakʼik chikʼbil majtaniletik ta sna te Jehová.

15 Jun yoʼtan laj bael te Jehoiadá sok kuxin bayal jaʼbil, ay 130 yaʼbilal-a te kʼalal laje. 16 Jich la smukik ta Mukʼul lum yuʼun David te banti mukulik te ajwaliletik, melel lek te bintik la spas ta stojol te lum Israel, ta stojol te smelelil Dios sok ta stojol te snae.

17 Te kʼalal lajemix-a te Jehoiadá, te machʼatik yichʼoj mukʼ yaʼtelik ta Judá tal yilik te ajwalil sok la snijan sbaik ta stojol, jich te ajwalil la schʼambey yaʼiy te skʼopike. 18 La yijkitayik te sna te Jehová te Dios yuʼun te antiguo smeʼ statik sok jajch yichʼik ta mukʼ te chʼul teʼetik yuʼun Aserá sok te lokʼombaetik. Jaʼ yuʼun jajch yilinba te Dios ta stojol te Judá sok te Jerusalén ta swenta te smulike. 19 Swenta ya sujtik tal ta stojol te Jehová, maba la skom sba ta stikunel j-alwanejetik ta stojolik. Pero ma la skʼan la schʼam yaʼiyik te jultesel oʼtanil te akʼbotik yuʼun te j-alwanejetike.

20 Te chʼul espíritu* yuʼun te Dios jul ta stojol te Zacarías snichʼan Jehoiadá te sacerdote. Tey-abi la stejkʼan sba ta jun lugar te toyol aye sok jich la yalbey te lume: «Jich ya yal te smelelil Dios: ‹¿Bin yuʼun te maba ya achʼuunik te mantaliletik yuʼun te Jehová? ¡Maʼyuk bin ya xlokʼ awuʼunik-a te jich ya apasike! Te jaʼexe, la awijkitayik te Jehová, jich yuʼun yame yijkitayex-euk›». 21 Pero la schapik te bitʼil ya smilik te Zacarías, la schʼojik ta ton ta yamakʼul sna te Jehová ta swenta smantal te ajwalil. 22 Te ajwalil Jehoás chʼay ta yoʼtan te kʼuxul oʼtanil te ma x-ijkitaywan te akʼbot yil yuʼun te Jehoiadá te stat te Zacarías, te jich la smilbey te snichʼan te machʼa jich la yal te kʼalal laje: «Akʼa yil te Jehová te bin ya apas sok jaʼ akʼa yichʼat ta kʼop».

23 Ta sjajchibal jaʼbil, te soldadoetik yuʼun te Siria moik bael ta yakʼbeyel guerra te Jehoás. La yochintayik te Judá sok te Jerusalén, ta patil la smilik spisil te machʼatik yichʼoj mukʼ yaʼtelik ta lum sok la stikunbeyik te ajwalil yuʼun Damasco spisil te biluketik te la spojike. 24 Manchukme maʼyuk bayal soldadoetik yuʼun te Siria te ochintayotik yuʼune, la yichʼik akʼel ta kʼabal yuʼun te Jehová manchukme kʼax bayalik stukelik, melel la yijkitayik te Jehová te Dios yuʼun te antiguo smeʼ statik; jich te sirioetik la skʼotesik ta pasel te castigo ta stojol te Jehoás. 25 Te kʼalal sujt bael te skontratake, tulan ejchenajem* jilel yuʼunik te Jehoás, jich te j-abatetik yuʼun la schapik te bitʼil ya smilik, melel la smalbey te schʼichʼel te snichʼnab te sacerdote Jehoiadá. La smilik ta swayib. Jich laj sok la smukik ta Mukʼul lum yuʼun David, pero maba ta smukenal te ajwaliletike.

26 Jaʼik ini te machʼatik la schapik te bitʼil ya smilik te Jehoás: te Zabad te yal Simeat te ammonita-ants sok te Jehozabad te yal Simrit te moabita-ants. 27 Spisil te bin kʼot ta pasel ta stojol te snichʼnab, te bintik la yichʼ alel te ya xkʼot ta pasel ta stojol te Jehoás sok te bitʼil la yichʼ achʼubtesel te sna te smelelil Dios tsʼibaybil* jilel ta Libro yuʼun te Ajwaliletik. Tey-abi, jaʼ och jilel ta ajwalil te Amasías, te snichʼane.