Proverbios
13 Te nichʼanil te ay spʼijil yoʼtan ya schʼuun te tojobtesel yuʼun te stat,
pero te jlabanwanej ma xyichʼ ta wenta te tsitsel.*
2 Ta swenta te sit te bintik ya yal te ants winik, yame sweʼ te bintik lek,
pero te bin ya skʼan yoʼtan te jloʼlaywanejetik jaʼ te utsʼinwanej.*
3 Te machʼa ya skanantay te ye ya skanantay te skuxlejal,
pero te machʼa bayal ya xkʼopoj ya sta swokol yuʼun.
4 Te chʼajil ants winik bayal bin ya skʼan yoʼtan, pero maʼyuk bin ay yuʼun,
pero te machʼa tulan ya x-aʼtej bayal bintik ya x-ayin yuʼun.*
5 Te machʼa toj yoʼtan ya yilay te lot,
pero te bintik ya spas te machʼa chopol* ya sta kʼexlal sok ma x-ichʼotix ta mukʼ.
6 Te bin stojil ta pasel ya skanantay te machʼa lek te bintik ya spas,
pero te bin chopol* ya yichʼ pasel ya sjin te machʼa jmulawil.
7 Ay te machʼa ya skuy sba ta jkʼulej pero maʼyuk bin ay yuʼun,
sok ay te machʼa ya skuy sba ta pobre pero bayal skʼulejal.
8 Te machʼa jkʼulej ya yakʼ te skʼulejal swenta ya skoltay te skuxlejal,
pero te pobreetik ma sta swokol ta skuxlejalik stukel.*
9 Kʼax xlemetnax* te sakal kʼinal yuʼun te machʼatik toj yoʼtanik,
pero yame xtupʼ te tsumbil kʼajkʼ yuʼun te machʼatik chopolik.*
10 Te toybail jaʼnax ya sjach kʼop,
pero te pʼijil oʼtanil ya sjokin te machʼatik ya sleik tojobtesel.
11 Te kʼulejalil te oranax ya yichʼ tael* kʼunkʼun ya xlaj bael,
pero te kʼulejalil te kʼunkʼun ya yichʼ tsobel* ya xmukʼub.
12 Te kʼalal ma xjul ta ora te bin ya jmaliytik, ya stsakot ta chamel yuʼun te koʼtantik,
pero te kʼalal ya xkʼot ta pasel te bin ya skʼan te koʼtantik, jaʼ teʼ yuʼun kuxlejalil.
13 Te machʼa ya spʼaj te mantalil yame sta swokol yuʼun,
pero te machʼa ya yichʼ ta mukʼ te ley* yame yichʼ majtantesel.
14 Te nojptesel yuʼun te machʼa ay spʼijil yoʼtan jaʼ kuxlejalil,
melel ya slokʼes te ants winik ta pejtsʼetik yuʼun te lajel.
15 Te machʼa ay bintik lek ya yichʼbey swentail lek ilbil yuʼun,
pero te sbe te jloʼlaywanejetik chujkul stukel.
16 Te machʼa ay spʼijil yoʼtan ya snaʼ te kʼalal ay bin ya spas,
pero te machʼa maʼyuk spʼijil yoʼtan jaʼnax ya yakʼ ta ilel te ma snaʼ kʼinal.
17 Te winik te ay bin ya xbajt yalbey skʼoplal pero te chopol yoʼtane* ya sta swokol,
pero te winik te ay bin ya xbajt yalbey skʼoplal te jun yoʼtane ya xpoxtaywan stukel.
18 Te machʼa ya skʼaxuntay* te tojobtesel pobre ya xjil sok ya sta kʼexlal,
pero te machʼa ya schʼuun te tsitsel* yame yichʼ albeyel yutsil skʼoplal.
19 Te kʼalal ya xkʼot ta pasel te bin skʼanoj te koʼtantik, chiʼnax ya yaʼiy te koʼtantik,
pero te machʼatik maʼyuk spʼijil yoʼtanik ma skʼan ya yijkitayik spasel te bintik chopol.*
20 Te machʼa ya sjokin te machʼa ay spʼijil yoʼtan pʼij ya xkʼot-euk,
pero te machʼa ya sjokin te machʼatik maʼyuk spʼijil yoʼtanik ma lek ya xkʼot ta lokʼel.
21 Te wokolil ya snuts te jmulawiletik,
pero te machʼatik toj yoʼtanik bayal bintik lek ya yichʼik akʼbeyel.
22 Te machʼa lek yoʼtan ay bin ya yakʼbey jilel te smamatak,*
pero te skʼulejal te machʼa ya spas te bin ma lek
yame yichʼ kʼejel ta stojol te machʼa toj yoʼtan.
23 Te skʼinal te pobre te jokʼbil slumilal ya yakʼ bayal weʼelil,
pero ya xjuʼ* ya yichʼ lajinbeyel ta swenta te bin ma stojiluk ta pasel.
24 Te machʼa ma xyakʼbey xul o wajchʼ* te snichʼan yuʼunme ya spʼaj,
pero te machʼa kʼux ta yoʼtan ya spas tulan* yuʼun ya stojobtes.
25 Te machʼa toj yoʼtan ya xweʼ sok ya xnoj schʼujt,
pero te machʼatik chopolik* jochol schʼujt stukelik.