2 Crónicas
34 Ay waxakeb yaʼbilal-a te Josías te kʼalal och ta ajwalil sok wentainwan 31 jaʼbil ta Jerusalén. 2 Te Josías jaʼ la spas te bintik lek ya yil te Jehová, jaʼnix jich la spas-euk te bintik la spas te David te antiguo state. Maba bajt ta swaʼel ni ta skʼexam.*
3 Te kʼalal waxakeb jaʼbil ay ta ajwalil-a te Josías, manchukme keremto-a, jajch sle te Dios yuʼun te David te antiguo stat; te kʼalal 12 jaʼbil ay ta ajwalil-a, la slajin te toyol awilaletik, la slokʼes bael te chʼul teʼetik yuʼun Aserá, te lokʼombaetik te pasbil ta kʼabal sok te lokʼombaetik te pasbil ta ultesbil takʼin te ayik ta Judá sok ta Jerusalén. 4 Jaʼnix jich la sjinik ta stojol te Josías te skajtajib chikʼbil majtaniletik yuʼun te Baaletik sok la sjin te skajtajib schikʼojibal pom te ayik ta sba te skajtajib chikʼbil majtaniletik. Jaʼnix jich la sjin te chʼul teʼetik yuʼun Aserá, te lokʼombaetik te pasbil ta kʼabal sok te lokʼombaetik te pasbil ta ultesbil takʼin, jaʼto te kʼalal la swuytiklan ta lek, ta patil la sbujkʼiybey te stsʼubil ta sba te smukenal te machʼatik la yakʼik milbil majtaniletik ta stojole. 5 Sok la schikʼbey te sbakel te sacerdoteetik ta sba te skajtajib chikʼbil majtaniletik te jaʼnix la stuuntesik te sacerdoteetike. Jich la slekubtes te Judá sok te Jerusalén.
6 Ta mukʼul lumetik yuʼun Manasés, Efraín, Simeón sok jaʼto kʼalal ta Neftalí soknix ta spisil te mukʼul lumetik te ayik ta sjoyobal te jinemik 7 la sjin te skajtajib chikʼbil majtaniletik, la swuy te lokʼombaetik te pasbil ta kʼabal sok te chʼul teʼetik yuʼun Aserá jaʼto te kʼalal tsʼubiltik jil yuʼun; jaʼnix jich la sjin spisil te skajtajib schikʼojibal pom te ayik ta spamal skʼinal Israel, ta patil sujt bael ta Jerusalén.
8 Te kʼalal ayix 18 jaʼbil ta ajwalil-a te Josías sok te kʼalal slekubtesojix-a te skʼinal Israel sok te templo,* la stikun bael te Safán snichʼan Azalías, te Maaseya —te jwolwanej yuʼun te mukʼul lum— sok te Joá snichʼan Joacaz, te machʼa ya stsʼibay te bin ya xkʼot ta pasel, swenta ya slekubtesik te sna te Jehová te Dios yuʼunike. 9 Bajt yilik te mukʼul sacerdote Hilquías sok la yakʼbeyik te takʼin te la yichʼ akʼel ta sna te Dios, jaʼ te la stsobik te levitaetik te jaʼ jkanantiʼnailetik te la yakʼik te stsʼumbal Manasés, Efraín sok te jayebxan yajwalul jilem te lum Israel jich bitʼil ta Judá, Benjamín sok te machʼatik nainemik ta Jerusalén. 10 Jich yuʼun la yakʼbeyik te takʼin te machʼatik swentainojik yilel te aʼtelil te yak ta pasel ta sna te Jehová. Jich te machʼatik ya x-aʼtejik ta sna te Jehová la stuuntesik ta slekubtesel sok ta schaʼpasel te nae. 11 Tey-abi la yakʼbeyik te machʼatik ya snaʼik ta lek spasel tʼujbil aʼteliletik sok te j-aʼteletik swenta ya smanik juxbil tonetik, teʼetik swenta yiptajib te na sok tsʼamteʼetik te ya xtuun ta spasel te na te la yakʼ kʼaʼuk te ajwaliletik yuʼun Judá.
12 Te winiketik-abi lek la spas te yaʼtelik. Te levitaetik te la swentainik yilel te aʼtelil jaʼik te Jáhat sok te Abdías —te jaʼik snichʼnab meraritaetik—, te Zacarías sok te Mesulam —te jaʼik snichʼnab cohatitaetik—. Te yantikxan levitaetik te ya snaʼik ta lek stijel aʼtejibaletik yuʼun música 13 jaʼ la swentainik yilel te yantikxan j-aʼteletik* sok jaʼnix la swentainik yilel spisil te j-aʼteletik te ayik ta jujunchajp aʼtelil; ay chaʼoxtul levitaetik te jaʼik secretarioetik, jkanantiʼnailetik sok ay machʼatik te swentainojik yilel te aʼtelil.
14 Te kʼalal yakik ta slokʼesel-a te takʼin te la yichʼ akʼel ta sna te Jehová, te sacerdote Hilquías la sta te libro yuʼun te Ley yuʼun te Jehová te la yichʼ akʼel ta swenta te Moisés. 15 Jich yuʼun, te Hilquías jich la yalbey te Safán te secretario: «La jta ta sna te Jehová te libro yuʼun te Ley». Jich te Hilquías la yakʼbey te Safán te libroe. 16 Jich yuʼun, te Safán la yichʼ bael te libro ta stojol te ajwalil sok jich la yalbey: «Te j-abatetik awuʼune yakik ta spasel spisil te aʼtelil te la yichʼik albeyel te ya spasike. 17 La stsobik te takʼin te ay ta sna te Jehová sok jaʼ la yakʼbeyik te machʼatik swentainojik yilel te aʼtelil sok te j-aʼteletike». 18 Te Safán te secretario jich la yalbeyxan te ajwalil: «Te sacerdote Hilquías la yakʼbon jun libro». Jich te Safán jajch skʼopon ta stojol te ajwalile.
19 Jaʼnax te kʼalal la yaʼiy stojol te ajwalil te bin ya yal te Ley, la schʼiʼ* skʼuʼ yuʼun. 20 Tey-abi, te ajwalil Josías jich la yalbey ta mantal te Hilquías, te Ahicam snichʼan Safán, te Abdón snichʼan Miqueas, te Safán te secretario sok te Asaya te j-abat yuʼun te ajwalil: 21 «Baanik, baan jojkʼoybeyaik te Jehová ta jwenta, ta swenta te machʼatik jilemik ta Israel sok ta Judá te bin-nix ya skʼan ya yal-a te libro te la yichʼ taele, melel te yilinba te Jehová te ya xtal ta jtojoltik kʼax mukʼ ta skaj te ma la schʼuunik te antiguo jmeʼ jtatik te bin la yal te Jehová sok te ma la skʼotesik ta pasel spisil te bin tsʼibaybil ta libro ini».
22 Jaʼ yuʼun, te Hilquías sok te machʼatik la stikun te ajwalil bajt yilik te Huldá te j-alwanej ants, te yinam Salum —te snichʼan Ticvá, snichʼan Harhás—, te machʼa swentainoj te yawil kʼuʼul. Nainem ta Schebal Barrio ta Jerusalén, tey bajt skʼoponik-a. 23 Jich albotik yuʼun: «Jich ya yal te Jehová te Dios yuʼun Israel: ‹Jichme xa awalbeyik te winik te la stikunex tal ta jtojole: 24 «Jich ya yal te Jehová: ‹Ya jtikun tal wokolil ta stojol te lum ini sok ta stojol te yajwalule, spisil te wokoliletik te tsʼibaybil ta libro te la skʼoponik ta stojol te ajwalil yuʼun Judá. 25 Ta skaj te la yijkitayonik sok te yakik ta yakʼel te xtomet schʼailel te chikʼbil majtaniletik yuʼunik ta stojol yantik diosetik yuʼun ya sjachbonik kilinba ta swenta te bintik ya spasike, yame xtil kilinba ta stojol te lum ini sok maba ya xtupʼ›». 26 Pero, jich xa awalbeyik te ajwalil yuʼun Judá, te machʼa la stikunex tal yuʼun ya sjojkʼoybey te Jehová: «Jich ya yal te Jehová te Dios yuʼun Israel: ‹Ta swenta te bin la awaʼiy stojol, 27 te la amel awoʼtan yuʼun, te la apejkʼan aba ta stojol te Dios te kʼalal la awaʼiy stojol ta swenta te bin ya xkʼot ta stojol te lum ini sok ta stojol te yajwalul, te la apejkʼan aba ta jtojol sok te la achʼiʼ* akʼuʼ soknix te okʼat ta jtojole, la kaʼiybat-euk te akʼope —xchi te Jehová—. 28 Jaʼ yuʼun ya kakʼ te ya ajokin te antiguo ameʼ atat, junme awoʼtan ya awichʼ mukel sok maba ya awil spisil te wokolil te ya kakʼ tal ta stojol te lum ini sok ta stojol te yajwalule›»›».
Jich bajt yalbeyik yaʼiy te ajwalil te bin la yichʼ alele. 29 Jich yuʼun, te ajwalil la yal ta mantal te akʼa stsob sbaik spisil te jwolwanejetik yuʼun te Judá sok te Jerusalén. 30 Tey-abi, te ajwalil mo bael ta sna te Jehová sok spisil te winiketik yuʼun Judá, te yajwalul te Jerusalén, te sacerdoteetik sok te levitaetik —spisil te lume, ta mukʼ bikʼit—, la skʼoponbey yaʼiy ta spisilik te bin ya yal te libro yuʼun te chapbilkʼop te la staik ta sna te Jehová. 31 Te ajwalil la stejkʼan sba te bantinanix ya stejkʼan sba-ae sok la schap skʼop ta stojol te Jehová te banti la yal ta jamal te ya stʼun te Jehová sok te ya schʼuun spasel sok spisil yoʼtan sok spisil skuxlejal te mantaliletik yuʼun, te jultesel oʼtanil yuʼun sok te leyetik yuʼune, jaʼ te ya spas spisil te chapbilkʼop te tsʼibaybil ta libro-abi. 32 Jaʼnix jich la stijbey yoʼtan te yajwalul te Jerusalén sok te yajwalul te Benjamín te yakuk skʼotesik ta pasel-euke. Te yajwalul Jerusalén jich la skʼotesik ta pasel te bin ya yal te chapbilkʼop yuʼun Dios, te Dios yuʼun te antiguo smeʼ statike. 33 Jaʼ yuʼun, te Josías la slokʼes bael ta spamal skʼinal te israeletik spisil te bintik* ilobtik sba, sok la stijbey yoʼtan spisil te lum Israel te yakuk x-abatinik ta stojol te Jehová. Te kʼalal kuxul-a te Josías, maba la yijkitayik stʼunel te Jehová te Dios yuʼun te antiguo smeʼ statike.