2 Crónicas

35 Te Josías la spas te Kʼin yuʼun Pascua ta stojol te Jehová ta Jerusalén, la smilik te chambalametik yuʼun la yakʼik ta milbil majtanil yuʼun te Kʼin Pascua ta skʼajkʼalel 14 yuʼun te sbabial u. 2 La yakʼtiklanbey yaʼtel te sacerdoteetik sok la stijbey yoʼtan yuʼun ya skʼotesik ta pasel te yaʼtelik ta sna te Jehová. 3 Jich la yaltiklanbey te levitaetik, te jnojpteswanejetik ta lum Israel sok te machʼatik chʼultesbilik ta stojol te Jehová: «Te skaxaul te chapbilkʼop te chʼultesbile akʼaik ta na te la spas te Salomón snichʼan David te ajwalil yuʼun Israel. Maba puersa ya akʼechikix bael ta anejkʼelik. Jich yuʼun, ta ora ini abatinanik ta stojol te Jehová te Dios awuʼunik sok te lum yuʼune, jaʼ te Israel. 4 Chajpana abaik jaʼ chikan te jujunchajp stsʼumbal te antiguo ameʼ atatik, jaʼ chikan te bitʼil ayex ta jujuntsojb, jichme xa apasik te bitʼil la stsʼibay jilel te David te ajwalil yuʼun Israel sok te Salomón te snichʼane. 5 Ta jujuntsojb xa awakʼ abaik ta banti chʼul awilal, tsojboltsojb xa awakʼ abaik jaʼ chikan te jujunchajp stsʼumbal te antiguo smeʼ statik te awermanotakik, jaʼ te lum Israel; ta jujunchajp stsʼumbal te antiguo smeʼ statik te israeletik ya skʼan te ayuk jujuntsojb levitaetik tey-a. 6 Milaik te chambalametik te ya yichʼ akʼel ta milbil majtanil yuʼun te Kʼin Pascua, chʼultesa abaik sok chajpana abaik yuʼun ya x-abatinex ta stojol te awermanotakik, jichme ya akʼotesik ta pasel te bin la yal te Jehová ta swenta te Moisés».

7 Te Josías la yakʼbey te yajwalul te lum jkolel* tuminchijetik sok jkolel tat tentsunetik yuʼun ya yakʼik ta milbil majtaniletik yuʼun te Kʼin Pascua, ta spisil la yakʼ 30 mil ta kojt chambalametik, jaʼnix jich la yakʼ 3 mil ta kojt wakaxetik. Ta spisil-abi jaʼ schambalam te ajwalile. 8 Te machʼatik yichʼoj mukʼ yaʼtelik yuʼune jaʼnix jich la yakʼik-euk te majtanil te spasemal oʼtanil ya yichʼ akʼel ta stojol te lum, ta stojol te sacerdoteetik sok ta stojol te levitaetik. Te Hilquías, Zacarías sok te Jehiel, te jaʼik jwolwanejetik yuʼun te sna te smelelil Dios, la yakʼbeyik te sacerdoteetik 2 mil 600 ta kojt chambalametik sok 300 ta kojt wakaxetik yuʼun ya yakʼik ta milbil majtanil yuʼun te Kʼin Pascua. 9 Te Conanías sok te yijtsʼinab te jaʼik te Semaya sok te Netanel soknix te yantik te jaʼik te Hasabías, Jeiel sok te Jozabad, te jolaletik yuʼun te levitaetik, la yakʼbeyik te levitaetik 5 mil ta kojt chambalametik sok 500 ta kojt wakaxetik yuʼun ya yakʼik ta milbil majtanil yuʼun te Kʼin Pascua.

10 Chajpaj spisil te bintik ya yichʼ tuuntesele, jich te sacerdoteetik bajt stejkʼan sbaik ta slugarik soknix-euk te levitaetik jaʼ chikan te bitʼil akʼtiklanbil ta jujuntsojb, jich te bitʼil yaloj ta mantal te ajwalil. 11 La smilik te chambalametik te ya yakʼik ta milbil majtanil yuʼun te Kʼin Pascua, te levitaetik jaʼ ya spochʼbeyik snujkulel te chambalametik, yan te sacerdoteetik jaʼ ya stsijtsinik te schʼichʼel te chambalam te ya xkʼasesbotik tal yuʼun te levitaetike. 12 Ta patil la schajpanik te chikʼbil majtaniletik te ya spukik ta stojol te yajwalul te lum —te ayik ta jujuntsojb jaʼ chikan te jujunchajp stsʼumbal te antiguo smeʼ statik— swenta ya yakʼbeyik ta stojol te Jehová jich te bitʼil tsʼibaybil ta libro yuʼun Moisés; jichnix la spasik ta swenta-euk te wakaxetike. 13 La swoik ta kʼajkʼ te majtanil yuʼun te Kʼin Pascua, jich te bitʼil kʼayemik ta spasel, yan te chʼul majtaniletik la staʼajtesik* ta oxometik,* ta calderaetik sok ta sartenetik, tey-abi oranax bajt spukbeyik te yajwalul te lume. 14 Ta patil, te levitaetik jaʼnix la schajpanik te sweʼelik yuʼun te Kʼin Pascua soknix la schajpanbeyik-euk te sweʼelik te sacerdoteetik, melel te sacerdoteetik —te jaʼik te stsʼumbal Aarón— la yakʼik te chikʼbil majtaniletik sok te sjujpʼel* te tiʼbal jaʼto te kʼalal och ajkʼabal. Jich yuʼun, te levitaetik jaʼnix la schajpanik te sweʼelik soknix-euk te sweʼelik te sacerdoteetik, te jaʼik te stsʼumbal Aarón.

15 Te machʼatik ya xkʼayojinik, te jaʼik te snichʼnab Asaf, ayik ta slugarik jich te bitʼil yaloj ta mantal te David, Asaf, Hemán sok te Jedutún, jaʼ te winik te ya yil najalsitil sok te ya yalbey yaʼiy te ajwalil; te jkanantiʼnailetik ma la yijkitayik skanantayel te tiʼnail te ayik ta skanantayele. Ma puersauk te la yijkitayik te yaʼtelik, melel te levitaetik te jaʼik yermanotakik jaʼ la schajpanik te weʼelil te ya xtuun yuʼunik ta Kʼin Pascua. 16 Jich yuʼun, ta kʼajkʼal-abi chajpaj jilel spisil te aʼtelil te ya skʼan pasel ta stojol te Jehová swenta ya yichʼ pasel te Kʼin yuʼun Pascua sok te ya yichʼ akʼel te chikʼbil majtaniletik ta skajtajib chikʼbil majtanil yuʼun te Jehová, jich te bitʼil la yal ta mantal te ajwalil Josías.

17 Ta yorail-abi, te israeletik te tey ayik-ae jukeb kʼajkʼal la spasik te Kʼin yuʼun Pascua sok te Kʼin yuʼun pan te maba yichʼoj levadura. 18 Maʼyuk jich spasojik-a te Kʼin yuʼun Pascua ta Israel jaʼto tal ta skʼajkʼalel te j-alwanej Samuel; maʼyuk jtuluk ajwalil ta Israel te jich la spas te Kʼin yuʼun Pascua jich bitʼil la spas te Josías, te sacerdoteetik, te levitaetik sok spisil te yajwalul Judá sok Israel te tey ayik-ae soknix-euk te yajwalul Jerusalén. 19 Te Kʼin yuʼun Pascua ini la yichʼ pasel te kʼalal ayix 18 jaʼbil ta ajwalil-a te Josías.

20 Ta patil, te kʼalal slekubtesojix-a te templo* te Josías, te Nekó te ajwalil yuʼun Egipto mo ta yakʼel guerra ta Carquemis ta stsʼeel te mukʼul jaʼ Éufrates. Jich yuʼun, te Josías lokʼ bael ta yakʼbeyel guerra te ajwalil Nekó. 21 Pero, te ajwalil Nekó jich la stikun ta albeyel te Josías: «Ajwalil yuʼun Judá, ¿bin yuʼun te tal awakʼbon guerra? Ta ora ini, ma jaʼuk tal kakʼbat guerra, yan nación te ya xbajt kakʼbey guerra, te Dios la yal te ya skʼan ya jsuj jbae. Ta swenta alekilal ma xa akontrain te Diose, melel sjokinojon. Teme jich ya apase, yame slajinat». 22 Pero, te Josías ma la skʼan sujt bael, te bin la spase jaʼ te la sjel skʼuʼ yuʼun ya xbajt yakʼbey guerra te ajwalil Nekó. Maba la yaʼiybey skʼop, manchukme jich yaloj te Diose, jich bajt yakʼbey guerra ta spamlej yuʼun Meguidó.

23 Te j-akʼtʼimalteʼetik la stʼimuyik bael te ajwalil Josías, jaʼ yuʼun te Josías jich la yalbey te j-abatetik yuʼun: «Lokʼesawonik bael liʼi, melel tulan ejchenajemon». 24 Jich te j-abatetik yuʼun la skojtesik ta scarreta, la smojtesik ta yan carreta yuʼun guerra sok la yikʼik tal ta Jerusalén. Jich laj te Josías sok la yichʼ mukel sok te antiguo smeʼ stat. Spisil te yajwalul Judá sok Jerusalén la yokʼetayik te Josías. 25 Te Jeremías la skʼayojtay jun kʼayojil yuʼun mel-oʼtan ta stojol te Josías, jaʼto ta ora ini spisil te antsetik sok te winiketik te ya xkʼayojinik jaʼ ya skʼayojtayik te kʼayojil-abi te kʼalal ya xkʼayojinik ta swenta mel-oʼtan. Jich la staik ta nopel te ya yichʼ kʼayojtayel ta Israel sok tsʼibaybil jilel te banti la yichʼ tsʼibayel te kʼayojetik yuʼun mel-oʼtan.

26 Te bintik la spas ta skuxlejal te Josías, te skʼuxul yoʼtan te ma x-ijkitaywan te la yakʼ ta ilel te kʼalal la schʼuun spasel spisil te bin tsʼibaybil ta Ley yuʼun te Jehová 27 sok te bintikxan la spas, spisil tsʼibaybil jilel ta sjajchibal kʼalalto ta slajibal ta Libro yuʼun te Ajwaliletik yuʼun Israel sok yuʼun Judá.