Proverbios

19 Jaʼ lekxan te pobreotik sok te ya jpastik te bin stojil ta pasel,

ma jaʼuk te ya jpastik lot sok te maʼyuk spʼijil koʼtantik.

 2 Ma lek te maʼyuk bin ya snaʼ te ants winik,

sok ya sta smul te machʼa ma snop te bin ya spas.

 3 Ta swenta te ma snaʼ kʼinal te ants winik ya x-ikʼot bael ta be te ma stojiluk,

pero ta patil ya yilintay te Jehová.

 4 Te jkʼulej bayal yamigotak,

pero te pobre hasta ya x-ijkitayot yuʼun te yamigo.

 5 Te lotil testigo yananixme yichʼ castigo-a

sok te machʼa ya spas lot ta jujun buelta te ya xkʼopoj maba libre ya xjil.

 6 Bayal machʼatik ya sleik te lek ya x-ilotik yuʼun te machʼa ay bin ya yakʼ

sok spisil te ants winiketik ya yamigoinik te machʼa ya yakʼ majtanil.

 7 Teme ya xpʼajot te pobre yuʼun te machʼatik jun smeʼ stat soke,

¡¿jaʼuktobal ma xpʼajotix yuʼun-a te yamigotake?!

 9 Te lotil testigo yananixme yichʼ castigo-a

sok te machʼa ya spas lot ta jujun buelta te ya xkʼopoj yame xlaj.

10 Te kʼulej kuxinel ma jaʼuk yuʼun te machʼa ma snaʼ kʼinal.

¡Kʼaxto ma snujpʼuk te ya xmantalaj te j-abat ta stojol te machʼatik yichʼoj mukʼ yaʼtelik!

11 Te machʼa ay spʼijil yoʼtan jaʼ ya xkomot yuʼun swenta ma x-ilin ta ora

sok kʼax lek te ma xyichʼ ta wenta te kʼalal ay machʼa ya sta smul ta stojol.

12 Te yilinba te ajwalil jaʼ jich te bin-utʼil yaw te león-choj,*

pero te slekil yoʼtan jaʼ jich te bin-utʼil tsʼujul te ya xko tal ta sba te akiltik.

13 Te nichʼanil te maʼyuk spʼijil yoʼtan ya yakʼbey swokol te stat,

te inamil te ya smulan sjachel kʼop* jaʼ jich kʼoem te bin-utʼil xtʼultʼun jaʼ ta ba na.

14 Te na sok te kʼulejalil jaʼ ya yakʼik jilel te tatiletik,

pero te inamil te ay spʼijil yoʼtan talem ta stojol te Jehová.

15 Te chʼajilal ya yakʼ xkʼub wayel,

te chʼajil ants winik yame xlaj ta wiʼnal.

16 Te machʼa ya schʼuun spasel te mantaliletik yame xkuxin;

te machʼa ma stsajtay* te bintik ya spas yame xlaj yuʼun.

17 Te machʼa ya yakʼbey yil slekil yoʼtan te pobre jich kʼoem te ay bin ya yakʼbey smajan te Jehová,

jaʼnixme ya xtojbot* yuʼun.

18 Tojobtesa te anichʼan te bitʼil yato xjuʼ ta tojobtesel;

mame jaʼuk amul ya xkʼot teme laje.*

19 Te machʼa oranax ya x-ilin yame yichʼ castigo;

teme ya akʼan ya akoltay, yame skʼan bayal buelta jich ya apas.

20 Chʼama awaʼiy te tojobtesel sok chʼuuna te tsitsel,*

jichme ya ata spʼijil awoʼtan.

21 Ay bayal te bintik ay ta yoʼtan spasel te ants winik,

pero te skʼanojel yoʼtan* te Jehová jaʼme ya xkʼot ta pasel.

22 Te bin ya yikʼ koʼtantik ta stojol jtul ants winik jaʼ te skʼuxul yoʼtan te ma x-ijkitaywan,

sok jaʼ lekxan te pobreotik ma jaʼuk te ya jpastik lot.

23 Te xiʼel te Jehová ya x-ikʼawan bael ta kuxlejalil;

te machʼa xiʼoj te Diose junme yoʼtan ya x-och swayel, maʼyuk bin chopol* ya xkʼot ta stojol.

24 Te chʼajil ants winik ya smul ochel skʼab ta plato,

pero maba ya spas tulan yuʼun ya yotses ta ye te sweʼele.

25 Maja te jlabanwanej, yuʼun jich te machʼa maʼyuk bin ya snaʼ

maba ya spas te bin la spas te jlabanwanej sok jich ya sta spʼijil yoʼtan;

tojobtesa te machʼa ay bin ya yichʼbey swentail, jichme ay bin ya snaʼxan-a.

26 Te nichʼanil te ya yutsʼin* te stat sok te ya sten lokʼel te snan,*

jaʼ nichʼanil te ya yakʼ kʼexlal sok te ma xyakʼ te ay te ichʼel ta mukʼ.

27 Jnichʼan, teme ya awijkitay ta yaʼiyel stojol te tojobtesel,

yame xlokʼat bael ta sbelal te bin ay ta naʼel.

28 Te testigo te ma xtuun ya slaban te bin stojil ta chajpanel,

te machʼa chopol* ya sbikʼ te bintik chopol.

29 Te castigo jaʼ chapal ta stojol te jlabanwanejetik,

te majel jaʼ chapal ta swenta spat te machʼatik maʼyuk spʼijil yoʼtanik.