Deuteronomio

3 »Ta patil la kakʼtik buelta, mootik bael ta Be yuʼun Basán. Te Og, te ajwalil yuʼun Basán, lokʼ staotik sok spisil te soldadoetik yuʼun swenta ya yakʼbotik guerra ta Edréi. 2 Jaʼ yuʼun, te Jehová jich la yalbon: ‹Mame xa xiʼ, melel ya kakʼbat ta akʼab te ajwalil sok spisil te soldadoetik yuʼun soknix te skʼinale. Jichnixme xa apasbey te bin-utʼil la apasbey te Sehón, te ajwalil yuʼun te amorreoetik, te nainem ta Hesbón›. 3 Te Jehová te Dios kuʼuntik la yakʼbotik ta jkʼabtik te ajwalil Og yuʼun Basán soknix spisil te soldadoetik yuʼun, la jmiltiklantik jaʼto te maʼyuk machʼa kuxul la kijkitaytik. 4 Jich yuʼun la kuʼunintik spisil te mukʼul lumetik yuʼunik. Maʼyuk ni jpamuk mukʼul lum te maba la kuʼunintik: 60 ta pam mukʼul lumetik, jaʼ spisil te kʼinal yuʼun Argob te bantito kʼalal swentainoj te ajwalil Og yuʼun Basán. 5 Spisil te mukʼul lumetik-abi joytaybil ta toyol tsʼajkʼetik, puertaetik sok kʼatal teʼetik soknix ay bayal chʼin lumetik te maʼyuk stsʼajkʼulike. 6 Pero la jlajintik spisil jichnix te bin-utʼil la jpasbeytik te ajwalil Sehón yuʼun Hesbón. La jlajintik spisil te mukʼul lumetik sok la jmiltiklantik spisil te winiketik, antsetik sok te alaletik te tey ayik-ae. 7 La kikʼbeytik jilel spisil te chambalametik yuʼunik sok la jpojbeytik te sbilukik te mukʼul lumetike.

8 »Ta yorail-abi la kuʼunintik te skʼinal te chaʼtul ajwaliletik yuʼun te amorreoetik te ayik bael ta stojol te mukʼul jaʼ Jordán, te jajch tal ta spamlej yuʼun Arnón jaʼto kʼalal ta wits Hermón 9 (te sidonioetik, Sirión la yakʼbeyik sbiilin te wits-abi; te amorreoetik, Senir la yakʼbeyik sbiilin), 10 la kichʼtik spisil te mukʼul lumetik te ayik ta toyol spamlej, ta spisil Galaad sok ta spisil Basán jaʼto ta Salecá sok Edréi jaʼ te mukʼul lumetik te swentainoj te ajwalil Og yuʼun Basán. 11 Te ajwalil Og yuʼun Basán jaʼ te slajibal stsʼumbal te refaimetik. Te scajail pasbil ta hierro sok ayto ta Rabá te banti ay te ammonitaetik. Baluneb xujkʼubil* snajtil sok chaneb xujkʼubil* sjamalul, jaʼ chikan te jayeb snajtil te jun xujkʼubil te albil skʼoplale. 12 Ta yorail-abi la kuʼunintik te kʼinal te ya xjajch tal ta skʼinal Aroer, te ay ta stsʼeel te spamlej yuʼun Arnón sok te olil witstikil yuʼun Galaad sok la kakʼbey te rubenitaetik sok te gaditaetik te mukʼul lumetike. 13 Te jayebxan jilem smukʼul te skʼinal Galaad sok spisil te skʼinal Basán te swentainoj te ajwalil Og lame kakʼbey te olil stsʼumbal Manasés. Spisil te skʼinal Argob te jaʼ yuʼun te Basán, naʼbil sba jich bitʼil te skʼinal te refaimetik.

14 »Te Jaír snichʼan Manasés la yichʼ spisil te skʼinal Argob jaʼto kʼalal ta stiʼil te skʼinal te guesuritaetik sok te maacatitaetik. Te Jaír jaʼ la yakʼbey te sbiil te chʼin lumetik yuʼun Basán, Havot-Jaír la yakʼbey sbiil, jich sbiil jaʼto ta ora ini. 15 Te Makir jaʼ la kakʼbey te skʼinal Galaad. 16 Te Rubenitaetik sok te gaditaetik la kakʼtiklanbey te kʼinal te jajch tal ta Galaad jaʼto kʼalal ta spamlej yuʼun Arnón (te olil yuʼun spamlej jaʼme stiʼil ya xkʼot yuʼunik) sok jaʼto kʼalal ta Jaboc, te jaʼ te stiʼil skʼinalik te ammonitaetik, 17 sok la kakʼbey te Arabá sok te mukʼul jaʼ Jordán soknix te stiʼil, jajch tal ta Kinéret jaʼto ta mar yuʼun Arabá, jaʼ te mar Salado* te ay ta yeʼtal te chʼin witsetik yuʼun Pisgá ta stojol bael te banti ya xlokʼ tal te kʼajkʼale.

18 »Tey-abi, jich la kalbeyik ta mantal: ‹Te Jehová te Dios awuʼunik la yakʼbeyex akʼinalinik te kʼinal ini. Spisil te winiketik te ma xiwik ya stsakik te yaʼtejibik yuʼun guerra sok ya xkʼaxik bael ta stojol te yermanotak, te israeletik. 19 Jaʼnax te awinamik, awal anichʼnabik sok te chambalametik awuʼunik (ya jnaʼ ta lek te bayal achambalamik) ya xjuʼ ya xkuxinik ta mukʼul lumetik te la kakʼbeyex 20 jaʼto kʼalal te Jehová ya yakʼ skux yoʼtan te awermanotak, jich te bin-utʼil la awichʼik akʼbeyel te jaʼex, jaʼnix jich te kʼalal ya yuʼuninik te kʼinal te ay ta sjejchelul te mukʼul jaʼ Jordán te akʼbotik yuʼun te Jehová te Dios awuʼunike. Ta patil ya sujtex tal, ta jujuntul ya xbajt ta skʼinal te la kakʼbeye›.

21 »Ta yorail-abi, jich la kalbey ta mantal te Josué: ‹Awiloj ta lek te bintik la spasbey te Jehová te Dios awuʼunik te chaʼtul ajwaliletik ini. Te Jehová jichnix ya spasbey te ajwaliletik te banti ya xkʼaxate. 22 Mame xa axiʼik, melel te Jehová te Dios awuʼunik jaʼme ya yakʼ guerra ta awentaik›.

23 »Ta yorail-abi, jich la jkʼanbey ta wokol te Jehová: 24 ‹Kajwal Jehová, Mukʼul Ajwalil, jajch awakʼbey yil te j-abat awuʼun te amukʼul sok te yuʼel te akʼabe. ¿Aybal yan dios ta chʼulchan o ta balumilal te ya yakʼ ta ilel yuʼel jich te bin-utʼil te jaʼate? 25 Awokoluk, akʼawon kʼaxel bael yuʼun ya kil te lekil kʼinal te ay ta yan jejch yuʼun te mukʼul jaʼ Jordán, jaʼ te lekil witstikil ini sok te Líbano›. 26 Pero ilinemto te Jehová ta skaj te amulik sok ma la yaʼiybon te jkʼope. Jaʼnax jich la yalbon te Jehová: ‹¡Tikʼix-a! Mame jkʼan te ya achaʼwalbon ta swenta-abi. 27 Moan bael ta wits Pisgá, ila bael te banti ya xmal te kʼajkʼal, ta norte, ta sur sok te banti ya xlokʼ tal te kʼajkʼal, jaʼatnix ilawil ta asit, melel maba ya xkʼaxat ta mukʼul jaʼ Jordán. 28 Akʼbeya yaʼtel ta jwolwanej te Josué, akʼbeya smukʼul yoʼtan sok yip yoʼtan, melel jaʼ te machʼa ya xnailaj bael ta stojol te lum ini sok jaʼ ya yakʼbey te israeletik te kʼinal te ya awil ta ora ini›. 29 Spisil ini kʼot ta pasel te kʼalal yakotik ta nainel ta spamlej te ay ta stojol bael te Bet-Peor.