Josué
12 Te ajwaliletik te la stsalik te israeletik sok te la yuʼuninbeyik te skʼinalik te ayik ta stojol slokʼib kʼajkʼal yuʼun Jordán te jajch tal ta spamlej yuʼun Arnón jaʼto kʼalal ta wits Hermón sok spisil te Arabá te ay bael ta stojol slokʼib kʼajkʼal, jaʼik ini: 2 Te Sehón te ajwalil yuʼun te amorreoetik te nain ta Hesbón, swentainoj-a te mukʼul lum Aroer —te ay ta stiʼil skʼinal te spamlej yuʼun Arnón—, jaʼnix jich swentainoj-a te olil spamlej yuʼun Arnón jaʼto kʼalal ta spamlej yuʼun Jaboc soknix swentainoj-a te olil skʼinal Galaad. Te Jaboc jaʼ stiʼil skʼinal te ammonitaetik. 3 Jaʼnix jich swentainoj-a te Arabá jaʼto kʼalal ta mar yuʼun Kinéret* te ay bael ta stojol slokʼib kʼajkʼal, kʼot kʼalal ta mar yuʼun Arabá, jaʼ te mar Salado* te ay ta stojol slokʼib kʼajkʼal ta stojol Bet-Jesimot soknix kʼalalto ta yeʼtal te chʼin witsetik yuʼun Pisgá te ay bael ta stojol sur.
4 Jaʼnix jich la yuʼuninbeyik te skʼinal Og te ajwalil yuʼun Basán, te jaʼ slajibal stsʼumbal refaím te nain ta Astarot sok ta Edréi. 5 Te kʼinal te bantito swentainoj-ae jajch tal ta wits Hermón, Salecá sok spisil Basán jaʼto kʼalal ta stiʼil skʼinal te guesuritaetik sok te maacatitaetik soknix olil skʼinal te Galaad jaʼto kʼalal ta stiʼil skʼinal te Sehón te ajwalil yuʼun Hesbón.
6 Te Moisés —te j-abat yuʼun Jehová— sok te israeletik la stsalik te ajwaliletik-abi, jich te Moisés, te j-abat yuʼun Jehová, la yakʼbey skʼinalin te stsʼumbal Rubén, stsʼumbal Gad sok te olil stsʼumbal Manasés te skʼinal te ajwaliletik-abi.
7 Jaʼik ini te ajwaliletik te ayik ta stojol smalib kʼajkʼal yuʼun Jordán te la stsal te Josué sok te israeletik, jajch tal ta skʼinal Baal-Gad —ta spamlej yuʼun Líbano—, jaʼto kʼalal ta wits Halac te mo bael ta stojol Seír. Ta patil, te Josué la yakʼbey skʼinalin te lum Israel te skʼinal te ajwaliletik-abi, jaʼ chikan te jayeb la yichʼ akʼbeyel te jujunchajp tsʼumbalil; 8 la yichʼik te kʼinal te ay ta witstikil, te Sefelá, Arabá, te chʼin witsetik te ayik ta jochol takin kʼinal sok te Négueb, jaʼ te skʼinalik te hititaetik, amorreoetik, cananeoetik, perizitaetik, heveoetik sok te jebuseoetik:
9 te ajwalil yuʼun Jericó; te ajwalil yuʼun Hai te ay ta stsʼeel Betel;
10 te ajwalil yuʼun Jerusalén; te ajwalil yuʼun Hebrón;
11 te ajwalil yuʼun Jarmut; te ajwalil yuʼun Lakís;
12 te ajwalil yuʼun Eglón; te ajwalil yuʼun Guézer;
13 te ajwalil yuʼun Debir; te ajwalil yuʼun Guéder;
14 te ajwalil yuʼun Hormá; te ajwalil yuʼun Arad;
15 te ajwalil yuʼun Libná; te ajwalil yuʼun Adulam;
16 te ajwalil yuʼun Maquedá; te ajwalil yuʼun Betel;
17 te ajwalil yuʼun Tapúah; te ajwalil yuʼun Héfer;
18 te ajwalil yuʼun Afec; te ajwalil yuʼun Lasarón;
19 te ajwalil yuʼun Madón; te ajwalil yuʼun Hazor;
20 te ajwalil yuʼun Simrón-Merón; te ajwalil yuʼun Acsaf;
21 te ajwalil yuʼun Taanac; te ajwalil yuʼun Meguidó;
22 te ajwalil yuʼun Quedes; te ajwalil yuʼun Jocneam te ay ta Carmelo;
23 te ajwalil yuʼun Dor te ay ta chʼin witsetik yuʼun Dor; te ajwalil yuʼun Goyim te ay ta Guilgal
24 sok te ajwalil yuʼun Tirzá; ta spisil jaʼ 31 ta tul ajwaliletik.