Eclesiastés

12 Naʼame te Mukʼul Jpaswanej awuʼun te kʼalal jchʼielat-toe, te bitʼil mato xjul te skʼajkʼalel wokoliletik sok te mato xkʼot te yorail te jich ya awale: «Maba ya kaʼiybeyix yutsilal te jkuxlejale»; 2 te kʼalal mato x-ijkʼub-a te kʼajkʼal, te sakal kʼinal, te u sok te ekʼetik, sok te kʼalal ya xchaʼsujt tal te tokal te kʼalal la yakʼix tulan jaʼal; 3 kʼalal te jkananetik yuʼun te na ya xnijk yoʼtanik yuʼun xiwel, kʼalal ya xkʼujaj spatik te winiketik te ay yipik, kʼalal te antsetik maba ya yaʼiyikix juchʼbajel ta skaj te maba bayalikix sok kʼalal te antsetik te ayix yaʼbilalik ya yilik ijkʼal kʼinal te kʼalal ya x-ilawanik ta ventanaetik; 4 kʼalal ya xmajk te tiʼnail te ay ta stiʼil te calle, kʼalal ma mero ya xchiknaj skʼop te chaʼ,* kʼalal ay machʼa ya xwijkʼ sit ta skaj te yokʼel jaʼmal mut sok te kʼalal ya xpejkʼaj yip te skʼayojik te antsetik; 5 jaʼnix jich kʼalal ay machʼa ya xiʼ te bin toyol sok te ay bin xiweltik sba ta calle; kʼalal ya xnichin te almendro-teʼ, kʼalal ya stasasan sba te pʼirich* sok te kʼalal ya xchʼay sbujtsʼ te weʼelil,* melel te winik ya xbeen ta sna te banti spisil-ora ya xnain soknix te machʼatik ya yokʼetayik te machʼa lajem yuʼunik ayik ta beel ta calleetik; 6 kʼalal mato xtuchʼ te chʼajan te pasbil ta plata, kʼalal mato xwuy te taza te pasbil ta oro, kʼalal mato xtopʼ te vasija ta stiʼil te slokʼib jaʼ, sok kʼalal mato xwakʼ* te rueda te ya yichʼ tuuntesel ta slokʼesel jaʼ ta pozo. 7 Jichme ya sujt bael ta lumkʼinal te tsʼubil lum, jichnix te bitʼil ay-ae, sok te yip te kuxlejalil ya sujt bael ta stojol te smelelil Dios te jaʼnix yakʼoj-ae.

8 Te jtsobaw jich ya yal «¡Tojolnax ta spisil!».

9 Ma jaʼuknax la sta spʼijil te jtsobawe, spisil-ora ya snojptes te lum ta swenta te bin ya snaʼ, jaʼnix jich la snopilan ta yoʼtan sok la yilbey ta lek skʼoplal yuʼun ya stsob bayal pʼijil kʼopetik. 10 Te jtsobaw la spas tulan ta sleel kʼopetik te tʼujbiliknax ta aʼiyel sok la stsʼibay kʼopetik te mero smelelile.

11 Te kʼopetik yuʼun te machʼatik ay spʼijil yoʼtanik jich kʼoem te bin-utʼil te ay bin tsʼupul sniʼ, sok te pʼijil kʼopetik yuʼunik jich kʼoem te bin-utʼil clavoetik te buen tsʼapalik; te kʼopetik yuʼunik jaʼ la yichʼik akʼbeyel yuʼun jtulnax jkanantuminchij. 12 Jnichʼan, ta spisil te bin la yichʼix alel, ichʼame ta wenta ini: te stsʼibayel bayal libroetik maʼyuk slajibal sok machʼauk-a te jaʼ ya xbajt ta yoʼtan spasel, ya xlujbtesot yuʼun.

13 Te bin mukʼ skʼoplal ta spisil te bin la yichʼix alele, jaʼ ini: xiʼa te smelelil Dios, chʼuunbeya te mantaliletik yuʼun, melel spisil-abi jaʼ ay ta swentaik spasel te ants winiketik. 14 Te smelelil Dios yame yichʼat ta kʼop ta swenta spisil te bin ya apas, jaʼnix jich te bin muken ya apas, yuʼun ya yil teme lek o maba leke.