Éxodo

6 Jaʼ yuʼun, te Jehová jich la yalbey te Moisés: «Yame awil te bin ya jpasbey te faraón. Ta swenta te tulan ya kakʼ jkʼab ta stojol, yame yakʼex lokʼel; ta swenta te tulan ya kakʼ jkʼab ta stojol, yame stenex lokʼel ta skʼinalik».

2 Te Dios jich la yalbey te Moisés: «Joʼon Jehovaon. 3 La kakʼulan jba ta ilel ta stojol te Abrahán, Isaac sok te Jacob jich bitʼil Dios, te Machʼa spisil ya xjuʼ yuʼune, pero maba la kakʼbey snaʼik te Jehová te jbiile. 4 Jich la jpas chapbilkʼop ta stojolik yuʼun ya yichʼik te skʼinal Canaán, te kʼinal te banti nainik jich bitʼil jyanlum. 5 Joʼon-nix kaʼiyojbey yajkan te lum Israel te jaʼ yakik ta mosoinel yuʼun te egipcioetik sok jul ta koʼtan te chapbilkʼop kuʼune.

6 »Jaʼ yuʼun, albeya yaʼiy te israeletik ini: ‹Joʼon Jehovaon, ya jkoltayex lokʼel yuʼun te tulan aʼtelil ya sujex ta spasel te egipcioetik sok ta swenta te tulan mosoinele. Tulanme ya kakʼ te jkʼab ta stojolik sok yame kakʼtiklanbey tulan castigo, jich ya jkoltayex lokʼel. 7 Yame kikʼex ta jtojol jich bitʼil lum kuʼun sok Diosonme ya xkʼoon awuʼunik. Jich ya anaʼik te joʼon Jehovaon te Dioson awuʼunik, te machʼa ya skoltayex lokʼel yuʼun te tulan aʼtelil ta Egipto. 8 Yame kikʼex bael ta kʼinal te la kalbey ta jamal te ya kakʼbey te Abrahán, Isaac sok te Jacob, jaʼme ya kakʼbeyex akʼinalinik. Joʼon Jehovaon›».

9 Ta patil, te Moisés jich la yalbey te israeletike, pero ma la yichʼik ta wenta, melel pejkʼajem yip yoʼtanik ta skaj te tulan mosoinele.

10 Jaʼ yuʼun, te Jehová jich la yalbey te Moisés: 11 «Baan, albeya te faraón, te ajwalil yuʼun Egipto, te akʼa yakʼ lokʼel te israeletik te ayik ta skʼinale». 12 Pero, te Moisés jich la yalbey te Jehová: «Maba ya yichʼon ta wenta te israeletike, ¿jaʼuktobalix ya yichʼon ta wenta-a te faraón te bitʼil wokol ya xlokʼ jkʼope?». 13 Manchukme jich-abi, te Jehová la schaʼyalbey te Moisés sok te Aarón te mantaliletik ya skʼan ya yalbey te israeletik sok te faraón, te ajwalil yuʼun Egipto, swenta ya slokʼesik tal te israeletik ta skʼinal Egipto.

14 Jaʼ ini te jolal yuʼun te jujunchajp familiaetik yuʼun te israeletike. Te snichʼnab Rubén, te sba snichʼan te Israel, jaʼik te Hanok, Palú, Hezrón sok te Carmí. Jaʼik-abi te snichʼnab te Rubén.

15 Te snichʼnab Simeón jaʼik te Jemuel, Jamín, Ohad, Jakín, Zóhar sok te Shaúl, te yal jtul cananea-ants. Jaʼik-abi te snichʼnab te Simeón.

16 Te sbiil te snichʼnab te Leví, jaʼ chikan te jujunchajp sfamiliaik, jaʼik te Guersón, Cohat sok te Merarí. Kuxin 137 jaʼbil te Merarí.

17 Te snichʼnab Guersón, te tsojboltsojb ayik jaʼ chikan te sfamiliaik, jaʼik te Libní sok te Simeí.

18 Te snichʼnab Cohat jaʼik te Amram, Izhar, Hebrón sok te Uziel. Kuxin 133 jaʼbil te Cohat.

19 Te snichʼnab Merarí jaʼik te Mahlí sok te Musí.

Jaʼik-abi te sfamiliaik te levitaetik jaʼ chikan te jujunchajp sfamiliaike.

20 Te Amram nujpun sok te Jokébed. Te Jokébed ay bin yutoj sba sok te stat* te Amram. Ta patil, te Jokébed ayin* yalatak jaʼik te Aarón sok te Moisés. Kuxin 137 jaʼbil te Amram.

21 Te snichʼnab Izhar jaʼik te Coré, Néfeg sok te Zicrí.

22 Te snichʼnab Uziel jaʼik te Misael, Elzafán sok te Sitrí.

23 Te Aarón nujpun sok te Eliseba te jaʼ yantsil nichʼan-a te Aminadab sok te jaʼ yijtsʼin te Nahsón. Ta patil ayin* yalatak jaʼik te Nadab, Abihú, Eleazar sok te Itamar.

24 Te snichʼnab Coré jaʼik te Asir, Elcaná sok te Abiasaf. Jaʼik-abi te sfamiliaik te coreitaetike.

25 Te Eleazar, te snichʼan te Aarón, nujpun sok jtul yantsil nichʼan te Putiel. Ta patil, te yiname ayin* jtul skerem-al te Finehás la sbiilin.

Jaʼik-abi te jolaletik yuʼun te jujunchajp stsʼumbal te antiguo smeʼ statik te levitaetik te tsojboltsojb ayik jaʼ chikan te sfamiliaik.

26 Jaʼik ini, te Aarón sok te Moisés te jich albotik yuʼun te Jehová: «Lokʼesaik tal ta skʼinal Egipto te israeletik ta tsojboltsojb».* 27 Jaʼik-abi te machʼatik kʼopojik ta stojol te faraón, te ajwalil yuʼun Egipto, swenta ya slokʼesik ta Egipto te israeletik. Jaʼik te Moisés sok te Aarón.

28 Kʼalal te Jehová la skʼopon te Moisés ta skʼinal Egipto, 29 te Jehová jich la yalbey te Moisés: «Joʼon Jehovaon. Albeya te faraón, te ajwalil yuʼun Egipto, spisil te bin ya kalbate». 30 Jaʼ yuʼun, te Moisés jich la yalbey te Jehová: «Pero, ¿bin-utʼil kʼan yichʼon ta wenta te faraón te bitʼil wokol ya xlokʼ te jkʼope?».