Éxodo

14 Te Jehová jich la yalbey te Moisés: 2 «Albeya te israeletik te akʼa yakʼik buelta sok akʼa spas scampamentoik te banti nopol* yiloj sba sok te Pihahirot, te ay ta olil yuʼun te Migdol sok te mar te bantito ya xjuʼ ta tael ta ilel te Baal-Zefón. Yame skʼan ya apasik acampamentoik ta stojol bael te Baal-Zefón ta nopol mar. 3 Te faraón jichme ya yal ta stojol te israeletik: ‹Chʼayemik. Makotik yuʼun te jochol takin kʼinal›. 4 Yame xnutsotik bael yuʼun te faraón, melel joʼon ya kakʼ te ya xtulanub yoʼtan, ya jtoy jkʼoplal ta stojol te faraón sok ta stojol spisil te soldadoetik yuʼun te kʼalal ya jlajinlan. Jichme ya snaʼik te egipcioetik te joʼon Jehovaon». Jaʼ yuʼun, te israeletik la spasik jich te bitʼil albotike.

5 Ta patil la yalbeyik yaʼiy te ajwalil yuʼun Egipto te lokʼik ta anel te israeletike. Ta oranax, te faraón sok te j-abatetik yuʼun la sut yoʼtanik ta swenta te bin la spasik sok jich la yalik: «¿Bin yuʼun te jich la jpastik te la kakʼtik lokʼel bael te israeletik te jaʼik jmosotike?». 6 Jaʼ yuʼun, te faraón la yakʼ ta chajpanel te carretaetik yuʼun guerra sok la yikʼ bael te soldadoetik yuʼune. 7 La yikʼ bael te 600 lekil carretaetik yuʼun sok spisil te carretaetik yuʼun te Egipto, kajajtik soldadoetik ta jujun carreta. 8 Te Jehová la yakʼ tulanubuk yoʼtan te faraón, te ajwalil yuʼun Egipto, jich la snuts bael te israeletike. Yan stukel te israeletik jun yoʼtanik* lokʼik bael. 9 Te egipcioetik la snutsik bael te israeletik. Spisil te caballoetik, te carretaetik yuʼun te faraón, te machʼatik kajajtik ta caballo sok te soldadoetik yakik ta noptsajel* bael ta stojol te israeletik te ayik ta scampamentoik ta nopol* mar ta stsʼeel te Pihahirot, te nopol yiloj sba sok te Baal-Zefón.

10 Kʼalal noptsajxan* bael te faraón, te israeletik la stoy sitik, la yilik te yakik ta nutsel yuʼun te egipcioetik. Bayal xiwik yuʼun te israeletik te jajchik ta tulan aw ta skʼanbeyel koltayel te Jehová. 11 Jich la yalbeyik te Moisés: «¿Yuʼunbal maʼyuk mukenal ta Egipto te la alokʼesotik tal yuʼun ya xlajonkotik liʼ ta jochol takin kʼinal? ¿Bin yuʼun te jich la apasbonkotik te la alokʼesotik tal ta Egipto? 12 ¿Mabal jichuk te la kalbatkotik ta Egipto: ‹Ijkitayawotikix, akʼa kakʼ jbakotik ta abatinel ta stojol te egipcioetike›? Jaʼ lekxan te ya x-abatinotik ta stojol te egipcioetik, ma jaʼuk te ya xlajotik ta jochol takin kʼinal». 13 Pero, te Moisés jich la yalbey te lume: «Mame xiwex. Ayukme yip awoʼtanik sok ilawilik te bitʼil ya skoltayex yoʼtik te Jehová. Melel te egipcioetik te ya awilik ta ora ini, maʼyuk bin-ora ya awilikix-a. 14 Te Jehová yame yakʼ guerra ta awentaik, yan te jaʼexe lamalme awoʼtan ya amaliyik».

15 Jaʼ yuʼun, te Jehová jich la yalbey te Moisés: «¿Bin yuʼun ma xa akom aba ta aw ta skʼanel koltayel ta jtojol? Albeya te israeletik te akʼa sjach te scampamentoike. 16 Te jaʼate, toya moel te anabateʼ sok jacha te akʼab ta stojol te mar swenta ya xat sba. Jich te israeletik yame xjuʼ ya xkʼaxik bael ta takin lum ta yolil mar. 17 Yan te joʼone ya kakʼ te ya xtulanub yoʼtan te egipcioetik yuʼun ya snutsex. Ya jtoy jkʼoplal ta stojol te faraón, ta stojol spisil te soldadoetik yuʼun, te carretaetik yuʼun guerra sok te machʼatik kajajtik ta caballo te kʼalal ya jlajinlane. 18 Te egipcioetik yame snaʼik te joʼon Jehovaon te kʼalal ya jtoy jkʼoplal ta slajinel te faraón, te carretaetik yuʼun guerra sok te machʼatik kajajtik ta caballo».

19 Te chʼul-abat yuʼun te smelelil Dios te nailajem bael ta stojol-a te campamento yuʼun te Israel, bajt yakʼ sba ta spatik, jaʼnix jich te balal tokal te nailajem bael ta stojolik-ae, bajt yakʼ sba ta spatik-euk sok tey jil-a. 20 Jich olil la yakʼ sba ta campamento yuʼun te egipcioetik sok te campamento yuʼun te israeletik. Te tokal jaʼ ijkʼal kʼinal kʼot ta stojol te egipcioetik, pero ta yan jejche jaʼ sakal kʼinal kʼot. Jich maba la sta sbaik te cheb campamentoetik ta sjunal ajkʼabal.

21 Ta patil, te Moisés la sjach skʼab ta stojol te mar, jich te Jehová la yakʼ sjam sba te mar ta swenta te tulan ikʼ te sjunal ajkʼabal tal te banti ya xlokʼ tal te kʼajkʼale. Jich la xat sba te jaʼe sok takin-nax te slumile. 22 Jich te israeletik kʼaxik bael ta takin lum ta yolil mar. Te jaʼ jich kʼot te bin-utʼil toyol tsʼajkʼ ta swaʼelik sok ta skʼexamik.* 23 Te egipcioetik sok spisil te caballoetik yuʼun, te carretaetik yuʼun guerra sok te machʼatik kajajtik ta caballo te jaʼ yuʼun te faraón ochik bael ta yolil mar ta snutstiklanel te israeletik. 24 Te kʼalal mato sakub-a te kʼinale,* te Jehová la yil te campamento yuʼun te egipcioetik teyto ta yutil te balal kʼajkʼ sok te tokal, la yakʼ te jowij te sjolike. 25 La slokʼesbey yok te carretaetik yuʼunik te jich wokol la yaʼiyikix stijel-a. Te egipcioetik jich yakik ta yalel: «¡Anukotik bael ta stojol te israeletik, melel te Jehová yak ta yakʼbeyel guerra te egipcioetik ta swentaik!».

26 Tey-abi, te Jehová jich la yalbey te Moisés: «Jacha akʼab ta stojol te mar swenta ya snupʼ sba te jaʼ te jich ya xkʼot ta sba te egipcioetik, te carretaetik yuʼun guerra sok te machʼatik kajajtik ta caballoetik». 27 Ta oranax, te Moisés la sjach skʼab ta stojol te mar, jich sujt bael te jaʼ te bitʼil ay ta nailto te kʼalal yakix ta sakubel-a te kʼinale. Te egipcioetik kʼan lokʼukik ta anel, pero te Jehová la sjiptiklan ochel ta yolil mar. 28 Kʼalal sujt te jaʼ jich bitʼil ay ta nailto-ae, la smul koel te carretaetik yuʼun guerra, te machʼatik kajajtik ta caballoetik sok spisil te soldadoetik yuʼun te faraón te snutsojik bael te israeletik ta yolil mar. Maʼyuk machʼa kuxul jil.

29 Yan stukel te israeletik kʼaxik bael ta takin lum ta yolil mar. Te jaʼ jich kʼot te bin-utʼil toyol tsʼajkʼ ta swaʼelik sok ta skʼexamik.* 30 Jaʼ jich te bitʼil te Jehová la skoltay ta kʼajkʼal-abi te israeletik ta skʼab te egipcioetike. Te israeletik la yilik te sbakʼetal te egipcioetik ta stiʼil te mar. 31 Jaʼnix jich, te israeletik la yilik te smukʼul yuʼel* te Jehová la stuuntes ta stojol te egipcioetike. Jich te lum jajch xiʼik te Jehová, jaʼnix jich jajch yakʼik schʼuunel yoʼtanik ta stojol te Jehová sok ta stojol te Moisés, te yabate.