Deuteronomio

5 Te Moisés la stsob spisil te lum yuʼun Israel, jich la yaltiklanbey: «Lum yuʼun Israel, chʼama awaʼiyik te mantaliletik sok te bintik schapoj Dios te ya kakʼbeyex anaʼik ta ora ini, sok yame skʼan ya anopik sok tsʼakalme ya achʼuunik spasel. 2 Te Jehová te Dios kuʼuntik la schap skʼop ta jtojoltik ta Horeb. 3 Te Jehová maba la schap skʼop sok te antiguo jmeʼ jtatik, jaʼ la schap skʼop ta jtojoltik, jpisiltik te machʼatik kuxulotik ta ora ini. 4 La awilbey aba asitik sok te Jehová te kʼalal la skʼoponex ta yolil kʼajkʼ tey ta wits. 5 Ta yorail-abi ayon ta yolil-a te Jehová sok te jaʼex swenta ya kalbeyex te skʼop te Jehová, la axiʼik te kʼajkʼ te jich maba moex bael ta wits, jich la yal te Dios:

6 »‹Joʼon Jehovaon te Dioson awuʼun te la jlokʼesat tal ta skʼinal Egipto te banti mosoinbilat-ae. 7 Mame ayuk yantik diosetik awuʼun, joʼon-naxme.

8 »›Mame xa apasbey slokʼomba o chikan te bintik pajal sok te ay ta chʼulchan, te bintik ay ta balumilal o te bintik ay ta jaʼ. 9 Mame xa akejan aba ta stojolik sok mame xjajch awichʼik ta mukʼ, melel joʼon Jehovaon te Dioson awuʼun. Joʼon te Dioson te ya jkʼan te jaʼnax ya kichʼ ichʼel ta mukʼe. Ta swenta te meʼil tatiletik yame kakʼbey castigo te alnichʼanetik ta yoxkajal sok ta schankajal te machʼatik ya spʼajonike, 10 pero yame kakʼbey yil skʼuxul koʼtan te ma x-ijkitaywan ta stojol jmil kajalkaj stsʼumbal te machʼatik kʼuxon ta yoʼtanik sok te ya schʼuunbonik te mantaliletik kuʼune.

11 »›Mame tojolnax ya awalbey sbiil te Jehová te Dios awuʼun, melel te Jehová yananix yakʼbey castigo-a te machʼa tojolnax ya yalbey te sbiile.

12 »›Ichʼa ta mukʼ te skʼajkʼalel sábado swenta chʼultesbiluk awuʼun, jich te bitʼil yalojbat ta mantal te Jehová te Dios awuʼun. 13 Ayme wakeb kʼajkʼal awuʼun yuʼun ya x-aʼtejat sok yuʼun ya apas spisil te bintik ya skʼan ya apase, 14 pero te sjukebal kʼajkʼal jaʼ jun sábado ta swenta te Jehová te Dios awuʼun. Mame skʼan ya x-aʼtejat te jaʼat, akerem, awantsil nichʼan, amoso, acriada, atoro, aburro ni jkojtuk te chambalam awuʼun o jyanlum te yak ta nainel te banti ayate, yuʼun jich pajal ya akux awoʼtan sok te amoso sok te acriada. 15 Julukme ta awoʼtan te la awichʼ mosoinel ta skʼinal Egipto sok te la slokʼesat tal tey-a te Jehová te Dios awuʼun ta swenta te yip skʼab sok te yuʼele. Jaʼ yuʼun, te Jehová te Dios awuʼun la spasat ta mantal te ya awichʼ ta mukʼ te skʼajkʼalel sábado.

16 »›Ichʼa ta mukʼ te atat sok te anan,* jich te bitʼil la spasat ta mantal te Jehová te Dios awuʼun, yuʼun jal ya xkuxinat sok yuʼun jich lek ya xkʼoat ta lokʼel ta lumkʼinal te ya yakʼbat te Jehová te Dios awuʼun.

17 »›Mame xa awaʼiy milaw.

18 »›Mame xa awaʼiy antsiwej sok mame xa awakʼ aba ta antsinel.

19 »›Mame xa awaʼiy elekʼ.

20 »›Mame xa awal lot ta stojol te apatxujk te kʼalal ya awichʼ akʼel ta testigo.

21 »›Mame xbikʼtaj awoʼtan yuʼun te yinam te apatxujke. Mame xbikʼtaj awoʼtan yuʼun te sna te apatxujk, skʼinal, smoso, scriada, storo, sburro o chikan te bintik ay yuʼun te apatxujke›.

22 »Ta tulan kʼop te Jehová la yakʼbey te mantaliletik ini spisil te lum awuʼunik ta wits, ta yolil te kʼajkʼ, tokal sok te pimil ijkʼal tokal, maʼyuk bin la yalbeyxan skʼoplal. Tey-abi la stsʼibay ta chaʼpejch tonetik, ta patil la yakʼbon.

23 »Pero, te kʼalalnax la awaʼiyik te kʼop te chiknaj ta ijkʼal kʼinal te kʼalal yak ta tilel te witse, spisil te jolaletik yuʼun te jujunchajp tsʼumbalil sok te jwolwanejetik awuʼunik noptsajik* tal ta jtojol. 24 Pero, jich la awalik: ‹Te Jehová te Dios kuʼuntik la yakʼ kiltik te yutsilal sok te smukʼul, sok la kaʼiybeytikix te skʼop te lokʼ tal ta yolil ta kʼajkʼe. Ta ora ini la kiltikix te ya xjuʼ ya xkʼopoj te Dios sok te ants winik sok te maba ya xlaj yuʼun. 25 Jaʼ yuʼun, ¿bin yuʼun ya skʼan te ya xlajotike? Melel te mukʼul kʼajkʼ ini ya xjuʼ ya slajinotik ta jkʼaxel. Teme ya kaʼiybeytikxan te skʼop te Jehová te Dios kuʼuntik, yananixme xlajotik yuʼun-a. 26 Melel, ¿aybal machʼa ta spisil te ants winiketik yaʼiyojbey skʼop te kuxul Dios ta yolil kʼajkʼ jich te bin-utʼil la kaʼiytik te joʼotik sok te kuxultoe? 27 Noptsajan* bael yuʼun ya awaʼiy spisil te bin ya yal te Jehová te Dios kuʼuntik, jaʼatme te machʼa ya awalbonkotik spisil te bin ya yalbat te Jehová te Dios kuʼuntik. Te joʼotik jaʼnax ya jchʼam kaʼiytik stojol sok ya jchʼuuntik spasel›.

28 »Te Jehová la yaʼiy stojol te bin la awalbonik, jaʼ yuʼun jich la yalbon te Jehová: ‹La kaʼiyix stojol te bin la yalbat te lum ini. Lek la kaʼiy spisil te bin la yalike. 29 ¡Jichuk yoʼtanik spisil-ora te ya xiʼonik sok te ya schʼuunik spasel spisil te mantaliletik kuʼune! ¡Jich lek ya xkʼotik ta lokʼel sok te yal snichʼnabik ta spisil-ora! 30 Baan sok altiklanbeya: «Sujtanik bael ta anailpakʼik». 31 Yan te jaʼate yame xjilat ta jtojol yuʼun ya kalbat awaʼiy spisil te mantaliletik, leyetik sok te bintik jchapoj te ya skʼan ya awakʼbey snopik. Yame skʼan ya schʼuunik spasel tey ta kʼinal te ya kakʼbey yuʼuninike›. 32 Ta ora ini chʼuunaik spasel ta lek spisil te bin la yalbeyex ta mantal te Jehová te Dios awuʼunike. Mame xbaex ta awaʼelik ni ta akʼexamik.* 33 Yame skʼan ya atʼunik spisil te beetik te yakʼojbeyex te Jehová te Dios awuʼunik yuʼun lek ya xkʼoex ta lokʼel sok jal ya xkuxinex ta kʼinal te ya awuʼuninike.