Deuteronomio

11 »Kʼuxme xa awaʼiy ta awoʼtanik te Jehová te Dios awuʼunik sok kʼotesaik ta pasel spisil-ora te bin ay ta awentaik spasel ta stojol, jich bitʼil te bintik yaloj, te bintik schapoj sok te mantaliletik yuʼun. 2 Ya anaʼik ta lek te jaʼ yak jkʼoponbelex, ma jaʼuk te awal anichʼnabik te maba snaʼojik sok te maba yilojik te tojobtesel yuʼun te Jehová te Dios awuʼunik ni jaʼuk yilojik te smukʼul ni jaʼuk te yip skʼab sok te yuʼel. 3 Maba la yilik te milagroetik* la spas ni jaʼuk te bin la spas ta Egipto ta stojol te faraón, te ajwalil yuʼun te Egipto, sok ta stojol spisil te skʼinal. 4 Ni jaʼuk yilojik te bin la spasbey te soldadoetik yuʼun te Egipto, te caballoetik yuʼun te faraón sok te carretaetik yuʼun guerra kʼalal bikʼotik koel yuʼun te mar Rojo te kʼalal la snutsex bael te jkʼaxel lajinotik yuʼun te Jehová. 5 Maba yilojik te bin la spas ta atojolik ta jochol takin kʼinal jaʼto kʼalal julex ta lugar ini, 6 ni jaʼuk te bin la spasbey te Datán sok te Abiram, snichʼnab Eliab, snichʼan Rubén, kʼalal la sjam sba te lum ta sit spisil te lum Israel sok te bikʼotik koel sok spisil te machʼatik ay yuʼunik, te snailpakʼik, te ants winiketik sok spisil te chambalametik te ya xtʼunotik yuʼune. 7 Yan stukel te jaʼexe la awilik spisil te bintik mukʼ la spas te Jehová.

8 »Chʼuunaik spasel spisil te mantaliletik te yak kalbelex ta ora ini yuʼun ya yichʼ yip awoʼtanik sok jich ya xkʼaxex bael ta kʼinal te ya awochintayik, 9 yuʼun jich jal ya xkuxinex ta kʼinal te jamal la yalbey Jehová te antiguo ameʼ atatik te ya yakʼbey sok te stsʼumbalike, jaʼ jpam kʼinal te banti ya yakʼ bayal leche sok chab.

10 »Te kʼinal te ya awochintayik ma jichuk te bin-utʼil te skʼinal Egipto te banti lokʼex tale, te banti la atsʼunik sit awal tsʼunubil awuʼunik sok te la awakʼbeyik yaʼlel ta awokik,* jich te bitʼil ya yichʼ pasel ta hortaliza. 11 Te kʼinal te ya x-och awochintayik ay witstikil sok spamlejetik tey-a. Te kʼinal-abi ya yuchʼ te yaʼlel te jaʼal yuʼun te chʼulchan; 12 te kʼinal-abi yak ta skanantayel te Jehová te Dios awuʼunik. Spisil-ora tey stʼojanoj sit-a te Jehová te Dios awuʼunik, jaʼto tal ta sjajchibal jaʼbil kʼalalto ta slajibal.

13 »Sok teme yuʼun-nix ya achʼuunik spasel te mantaliletik te yak kalbelex ta ora ini, teme kʼux ta awoʼtanik te Jehová te Dios awuʼunik sok teme ya awakʼ abaik ta abatinel ta stojol ta spisil awoʼtanik sok ta spisil akuxlejalik, 14 joʼonme ya kakʼ xtal jaʼal ta akʼinalik ta yorail, jaʼ te nail ya xtal sok te patil ya xtale, jaʼexnix ya atsobik te sit awal tsʼunubil awuʼunik sok yame x-ayin awuʼunik yachʼil vino sok aceite. 15 Yame kakʼ ya x-ayin yaxal jaʼmaletik* ta akʼinalik yuʼun ya sweʼ te achambalamik, jich ya xweʼex te jaʼex jaʼto te kʼalal ya xnoj ta lek te achʼujtike. 16 Tsajtayame abaik* yuʼun maba ya sloʼlayex te awoʼtanik te ya yikʼex bael ta yichʼel ta mukʼ yantik diosetik sok te ya akejan abaik ta stojolik. 17 Teme jich ya apasike, bayalme ya x-ilin ta atojolik te Jehová te jich maba ya yakʼ xtal jaʼal, maba ya yakʼ sit te bin ya yichʼ tsʼunel ta lumkʼinal sok oranaxme ya xlajex tey ta lekil kʼinal te ya yakʼbeyex te Jehová.

18 »Akʼa ta awoʼtanik sok ta akuxlejalik te bin ya kalbeyexe, yame skʼan ya achuk ta akʼabik swenta snaʼojibal awuʼunik sok yame skʼan ya xkʼot jich bitʼil chujkilal ta atiʼbaik. 19 Yame skʼan ya awakʼbey snopik te awal anichʼnabik te kʼalal ayex ta anaik, te kʼalal ya xbeenex ta be, te kʼalal ya xwayex sok te kʼalal ya xjajchex. 20 Tsʼibayaik ta steʼel te stiʼil anaik sok ta puertaetik yuʼun te mukʼul lumetik awuʼunik, 21 yuʼun jal ya xkuxinex te jaʼex sok te awal anichʼnabik ta kʼinal te jamal la yalbey Jehová te antiguo ameʼ atatik te ya yichʼik akʼbeyel yuʼun, te jayeb kʼajkʼal kuxul te chʼulchan te ay ta sba te balumilal.

22 »Teme tsʼakal ya achʼuunik spasel te mantaliletik ini te yak kalbelex —te kʼuxuk ta awoʼtanik te Jehová te Dios awuʼunik, te ya xbeenex ta spisil te beetik yuʼun sok te jaʼnax ya awakʼ abaik ta stojol— sok te ya akʼotesik ta pasel, 23 te Jehová yame stentiklan lokʼel ta atojolik spisil te nacionetik-abi, jich ya awochintayik nacionetik te mukʼikxan sok te bayalxan yajwalul te bin-utʼil te jaʼexe. 24 Bayuk lugar ya atekʼik jaʼ awuʼunik ya xkʼot. Te stiʼil te akʼinalik ya xjajch tal ta jochol takin kʼinal kʼalalto ta Líbano, ta mukʼul jaʼ Éufrates kʼalalto ta mar ta stojol bael te banti ya xmal te kʼajkʼale.* 25 Maʼyuk machʼa ya xjuʼ ya stsalex. Te Jehová te Dios awuʼunik yame yakʼ te spisil te kʼinal te banti ya xkʼaxex ya xnijk yoʼtanik awuʼunik sok te ya xiʼex, jich te bitʼil la yalbeyex ta jamal.

26 »Ilawilik, ya kakʼ ta atojolik bendición sok chopol* kʼoplalil: 27 yame ataik te bendición teme ya achʼuunik spasel te mantaliletik yuʼun te Jehová te Dios awuʼunik te yak kalbelex ta ora ini, 28 te chopol* kʼoplalil yame xkʼot ta atojolik teme maba ya achʼuunik spasel te mantaliletik yuʼun te Jehová te Dios awuʼunik, teme ya awijkitayik te be te yak kalbelex ta ora ini te ya atʼunik sok teme ya atʼunik yantik diosetik te ma xa anaʼbeyik sbae.

29 »Kʼalal te Jehová te Dios awuʼunik ya yakʼ x-ochex ta kʼinal te ya awuʼuninik, yame skʼan ya awal te bendición ta wits Guerizim sok te chopol* kʼoplalil ta wits Ebal. 30 Te witsetik-abi ayik ta jejch mukʼul jaʼ Jordán ta stojol bael te banti ya xmal te kʼajkʼal, ta skʼinal te cananeoetik te yakik ta nainel ta Arabá, te yiloj sba sok te Guilgal, te nopol* ay sok te mukʼul teʼetik yuʼun Moré. 31 Melel ya xkʼaxex bael ta mukʼul jaʼ Jordán te ya x-och awochintayik te kʼinal te ya yakʼbeyex te Jehová te Dios awuʼunik. Te kʼalal awuʼuninojikix sok te yakexix ta nainel tey-a, 32 yame skʼan ya akʼotesik ta pasel ta lek spisil te mantaliletik sok te bintik chapbil skʼoplal te ya kakʼbeyex ta atojolik ta ora ini.