Números

12 Te Míriam sok te Aarón jajchik ta skontrainel ta kʼop te Moisés ta skaj te nujpun sok jtul cusita-ants. 2 Jich ya yalulanik: «¿Jaʼnaxbal ta swenta te Moisés ya xkʼopoj te Jehová? ¿Mabal jichuk te ya xkʼopoj ta jwentatik-euk?». Te Jehová yak ta yaʼiyel stojol te bin yakik ta yalele. 3 Maʼyuk yan winik ta balumilal te kʼax manso yoʼtan* jich bitʼil te Moisés.

4 Ta repentenax te Jehová jich la yalbey te Moisés, Aarón sok te Míriam: «Baan awoxebalik ta nailpakʼ ta swenta tsoblej». Jich bajt yoxebalik. 5 Te Jehová ko tal ta balal tokal, la yakʼ sba ta yochibal te nailpakʼ sok la yikʼ tal te Aarón sok te Míriam. Jich noptsajik* tal schebalik. 6 Tey-abi, jich la yal: «Awokolukik, aʼiya awaʼiyik stojol te bin ya kale. Te ayuk jtul j-alwanej yuʼun Jehová ta awolilik, joʼon ya kakʼ jba ta naʼel ta stojol ta jun najalsitil te jichuke sok ya jkʼopon ta swayich. 7 ¡Pero ma jichuk ya jpas sok te Moisés te j-abat kuʼune! Jun koʼtan kakʼojbey swentain spisil te jnae.* 8 Kʼalal ya xkʼopojon sok te Moisés ya kilbey jba jsitik, jamal ya xkʼopojon sok, maba chujkultik sba te bitʼil ya xkʼopojon sok; te Moisés ya yil te bin yilel te Jehová. Jaʼ yuʼun, ¿bin yuʼun maba la axiʼik te ay bin chopol* la awalik ta stojol te Moisés te j-abat kuʼune?».

9 Te Jehová bayal ilin ta stojolik, jich bajt. 10 Te tokal jajch bael ta nailpakʼ... te Míriam tsakot ta kʼaʼel chamel, saknax bajt jich te bin-utʼil meʼsik o toyiw. Kʼalal te Aarón la sut sba ta yilel te Míriam, la yil te tsakbil ta kʼaʼel chamel. 11 Tey-abi, ta oranax te Aarón jich la yalbey te Moisés: «¡Kajwal, ya jkʼanbat wokol! ¡Awokoluk, ma xa awakʼbonkotik castigo yuʼun te jmultike! Ma la jnaʼtik kʼinal te jich la jpastike. 12 ¡Awokoluk, ma xa awakʼ te ya xjil te Míriam jich te bin-utʼil chamen alal te ya x-ayin* te kʼaʼem olil sbakʼetal!». 13 Te Moisés jich jajch skʼanbey wokol te Jehová: «¡Awokoluk Dios, lekubtesa! ¡Awokoluk!».

14 Te Jehová jich la yalbey te Moisés: «Teme ya yichʼ tubatayel ta sit yelaw yuʼun te stat, ¿mabal yakuk yichʼ kʼexlaltesel jukeb kʼajkʼal? Akʼa yichʼ lokʼesel bael ta fuera yuʼun te campamento jukeb kʼajkʼal, ta patil ya xjuʼ ya yichʼ otsesel tal yan buelta». 15 Jich yuʼun, te Míriam la yichʼ lokʼesel jukeb kʼajkʼal ta fuera yuʼun te campamento, te lum maba la sjach te scampamentoik jaʼto te kʼalal la yichʼ otsesel tal yan buelta te Míriam. 16 Tey-abi, te lum la yijkitay te Hazerot, bajt spas scampamentoik ta jochol takin kʼinal Parán.