Éxodo
4 Pero, te Moisés jich la yal: «¿Bin ya jpas teme maba ya schʼuunik sok teme maba ya yichʼik ta wentae? Melel jich ya xbajt yalbonik ‹Te Jehová maba chiknaj ta atojol›». 2 Jich jojkʼoybot yuʼun te Jehová: «¿Bin ay ta akʼab?». «Nabateʼ», xchi te Moisés. 3 Te Dios jich la yalbey: «Chʼoja ta lum». Te kʼalal la schʼoj ta lume, kʼatpʼuj ta chan te nabateʼ. Te Moisés oranax la skʼej sba. 4 Te Jehová jich la yalbey te Moisés: «Akʼa bael te akʼabe, tsaka ta sne». Jich la yakʼ bael te skʼab, la stsak te chane, jich kʼatpʼuj ta nabateʼ. 5 Jaʼ yuʼun, te Dios jich la yal: «Jichme ya snaʼik te chiknaj ta atojol te Jehová, te Dios yuʼun te antiguo smeʼ statik, te Dios yuʼun Abrahán, te Dios yuʼun Isaac sok te Dios yuʼun te Jacob».
6 Te Jehová jich la yalxan: «Awokoluk, otsesa te akʼab ta yutil akʼuʼ». Jich te Moisés la yotses te skʼab ta yutil skʼuʼ, te kʼalal la slokʼese, ¡yichʼoj kʼaʼel chamel te skʼabe! ¡Saknax jich te bin-utʼil meʼsik o toyiw! 7 Te kʼalal jich kʼot ta pasele, te Dios jich la yalbey: «Chaʼotsesa te akʼab ta yutil akʼuʼ». Te Moisés la schaʼyotses te skʼab ta skʼuʼ. Te kʼalal la slokʼes te skʼabe, ¡lek ayix-a jich te bitʼil skojtol te sbakʼetale! 8 Te Dios jich la yal: «Teme maba ya schʼuunik o teme maba ya yichʼik ta wenta te sbabial señail, jaʼme ya schʼuunikix-a te schebale. 9 Teme ni jaʼuk ya schʼuunik te cheb señailetik ini sok teme ma skʼan ya yichʼik ta wenta te bin ya awale, yame alokʼes jaʼ tey ta mukʼul jaʼ Nilo sok yame amal ta lum. Te jaʼ te ya alokʼes tale yame xkʼatpʼuj ta chʼichʼ ta sba lum».
10 Jaʼ yuʼun, te Moisés jich la yalbey te Jehová: «Pasa perdón, Jehová, te joʼone maʼyuk bin-ora juʼem kuʼun te ya xkʼopojon ta lek ni jaʼuk ta namey ni jaʼuk ta ora ini te kʼalal jajchat ta kʼop sok te j-abat awuʼune. Wokol ya xlokʼ te jkʼop sok ya schuk sba te kakʼe». 11 Jich jojkʼoybot yuʼun te Jehová: «¿Machʼa la yakʼbey ye te ants winik? ¿Machʼa ya xjuʼ yuʼun te ay machʼa ya yakʼ ta umaʼ o ta kojkchikin? ¿Machʼa ya xjuʼ yuʼun te ay machʼa ya yakʼbey yil kʼinal o te ma xyakʼbey yil kʼinale? ¿Mabal joʼukon te Jehovaone? 12 Baan jiche. Yame jokinat te kʼalal ya xkʼopojat sok yame kakʼbat anaʼ te bin ya skʼan ya awale». 13 Pero, jich la yal te Moisés: «Pasa perdón, Jehová, tikuna bael yan chikan te machʼa lek ya awil, awokoluk». 14 Jaʼ yuʼun, mero ilin te Jehová ta stojol te Moisés sok jich la yalbey: «Tey ay te abankil Aarón, te levita-winik. Ya jnaʼ te ya xkʼopoj ta lek stukel. Yakme ta talel ta atojol sok tseʼelnaxme yoʼtan yuʼun te kʼalal ya yilate. 15 Jich yuʼun ya skʼan ya awalbey te bin ya kalbate. Yame jokinex te kʼalal ya xkʼopojex sok yame kakʼbeyex anaʼik te bin ya skʼan ya apasike. 16 Jaʼme ta awenta ya skʼopon te lum sok jaʼme ya skʼasesbat akʼop. Jaʼatme Dios ya xkʼoat ta stojol.* 17 Sok yame atsak bael te nabateʼ sok jaʼme ya atuuntes yuʼun ya apas señailetik».
18 Te Moisés sujt bael ta stojol te Jetró, te snial mamal,* sok jich la yalbey: «Awokoluk, akʼawon bael. Ya jkʼan ya sujton bael ta Egipto yuʼun ya kil teme kuxulikto te kermanotake». Te Jetró jich la yalbey te Moisés: «Junukme awoʼtan ya xbaat». 19 Ta patil, te Jehová jich la yalbey te Moisés ta Madián: «Baan, sujtan bael ta Egipto, melel lajemikix spisil te machʼatik ya skʼan ya smilatik-ae».
20 Tey-abi, te Moisés la smojtes ta burro te yinam sok te snichʼnab, jich sujt bael ta skʼinal Egipto. Jaʼnix jich la stsak bael te nabateʼ yuʼun te smelelil Diose. 21 Te Jehová jich la yalbey te Moisés: «Te kʼalal ya xkʼoat ta Egipto, yame apas ta stojol te faraón te chajp aʼteliletik ta swenta te awuʼel te la kakʼbate. Manchukme jich-abi ya kakʼ te ya xtulanub yoʼtan, jich maba ya yakʼ te ya xlokʼ bael te lume. 22 Jaʼ yuʼun, jichme ya skʼan ya awalbey te faraón: ‹Jaʼme jich te bin ya yal te Jehová: «Jaʼ sba jnichʼan te Israel. 23 Jaʼ yuʼun, jich ya kalbat: akʼa lokʼel bael te jnichʼan yuʼun ya yichʼon ta mukʼ, pero teme maba ya awakʼ baele, yame jmil te sba anichʼane»›».
24 Te kʼalal yakik ta bael te banti ya xkʼax te ajkʼabal yuʼunike, taot yuʼun te Jehová sok kʼan milotuk yuʼun. 25 Jich yuʼun, te Ziporá la stsak ton te bayal ye, la sbojbey lokʼel te snujkulel sjol skʼunil sbakʼetal te skerem-ale. Ta patil la yakʼbey ta yok sok jich la yal: «Jaʼ jmamalalat ya xkʼoat ta swenta te chʼichʼ ini». 26 Jich yuʼun, te Dios la yakʼ bael. Ta yorail-abi, te Ziporá la yal «jmamalalat ya xkʼoat ta swenta chʼichʼ», jich la yal ta skaj te circuncisión.*
27 Te Jehová jich la yalbey te Aarón: «Baan, taa tal te Moisés ta jochol takin kʼinal». Jaʼ yuʼun bajt te Aarón, kʼot sta te Moisés ta wits yuʼun te smelelil Diose sok la yujtsʼuy* ta spatbeyel yoʼtan. 28 Te Moisés la scholbey yaʼiy spisil te Aarón te bin albot yuʼun te Jehová, te machʼa tikunbil tal yuʼune. Jaʼ jich la scholbey yaʼiy spisil te señailetik te albot ta mantal te ya spase. 29 Ta patil, te Moisés sok te Aarón la stsob sba sok spisil te jwolwanejetik yuʼun te Israel. 30 Te Aarón la scholtiklanbey yaʼiyik te bin la yal te Jehová ta swenta te Moisés sok la spas te señailetik ta sit te lume. 31 Ta swenta-abi la schʼuunik te lume. Kʼalal te israeletik la snaʼik stojol te ya xkoltayotik yuʼun te Jehová sok te staoj ta ilel te swokolike, la snijan sbaik kʼalalto ta lum.