Génesis
2 Jich juʼ ta chajpanel te chʼulchan, balumilal sok spisil te bintik ayik tey-ae. 2 Ta sjukebal kʼajkʼal, te Dios juʼ yuʼun spasel te yaʼtele. Jich te Dios la skux yoʼtan ta sjukebal kʼajkʼal yuʼun spisil te yaʼtele. 3 Te Dios la yakʼbey bendición te sjukebal kʼajkʼal sok la schʼultes, melel ta swenta te kʼajkʼal-abi yak ta skuxel yoʼtan yuʼun spisil te yaʼtel la spase, ta spisil te bintik la skʼan yoʼtan la spas.
4 Jaʼme skʼoplal te bin-ora juʼ ta pasel te chʼulchan sok te balumilal. Jaʼ te bin kʼajkʼalil la spas chʼulchan sok balumilal te Jehová* Diose.
5 Mato ayuk teʼetik ta balumilal-a sok mato chʼiem tal jaʼmaletik-a,* melel te Jehová Dios mato yakʼoj tal jaʼal ta balumilal sok mato ayuk machʼa ya xtsʼunbaj ta lumkʼinal. 6 Pero ya xmo te sjab te lumkʼinal yuʼun ya yajchʼes te lumkʼinale.
7 Te Jehová Dios la spas ta tsʼubil lum te winike sok la sjujchʼiybey ikʼ ta sniʼ. Jich la yichʼ akʼbeyel skuxlejal te winike. 8 Jaʼnix jich, te Jehová Dios la spas tsʼunbil kʼinal ta Edén ta stojol bael te banti ya xlokʼ tal te kʼajkʼale. Tey la yakʼ-a te winik te la spase. 9 Jich yuʼun, te Jehová Dios la yakʼ chʼiuk ta lumkʼinal spisil ta chajp teʼetik te tʼujbilik ta ilel sok te ya yakʼ sit yuʼun ya xjuʼ ta loʼel. Jaʼnix jich la yakʼ chʼiuk te teʼ yuʼun kuxlejalil ta yolil te tsʼunbil kʼinal sok la yakʼ chʼiuk te teʼ te ya yakʼ ta naʼel te bin lek sok te bin ma leke.
10 Ya xlokʼ tal mukʼul jaʼ ta Edén te ya yakʼbey yaʼlel te tsʼunbil kʼinal. Chanxajtʼ ya xlokʼ-a te sbelal te jaʼe. 11 Te sbabial jaʼe Pisón sbiil. Te jaʼ-abi ya sjoytay spisil te skʼinal Havilá te banti ay oro. 12 Mero lekil oro te ay ta kʼinal-abi. Jaʼnix jich ay bedelio* sok ónice-ton tey-a. 13 Te schebal jaʼe Guihon sbiil. Te jaʼ-abi ya sjoytay spisil te skʼinal Cus. 14 Te yoxebal jaʼe Hidequel* sbiil. Te jaʼ-abi jaʼ te ya xkʼax bael ta stojol te banti ya xlokʼ tal te kʼajkʼal ta skʼinal Asiria. Te schanebal jaʼe Éufrates sbiil.
15 Te Jehová Dios la yakʼ te winik ta tsʼunbil kʼinal Edén yuʼun ya xtsʼunbaj tey-a sok yuʼun ya skanantay. 16 Jaʼnix jich, te Jehová Dios jich la spas ta mantal te winike: «Ya xjuʼ ya aloʼbey sit spisil te teʼetik te ay ta tsʼunbil kʼinal jaʼ chikan te jayeb ya skʼan te awoʼtane. 17 Pero mame skʼan xa aloʼbey sit te teʼ te ya yakʼ ta naʼel te bin lek sok te bin ma lek, melel te bin-ora ya aloʼe, yananixme xlajat-a».
18 Tey-abi, jich la yal te Jehová Dios: «Ma lekuk te stukel ay te winike. Ya jpasbey snujpʼ te ya skoltay sba soke». 19 Te Jehová Dios spasojix ta tsʼubil lum spisil-a te jtiʼawal chambalametik sok te jaʼmal mutetik* te ya xwilik ta sjamalul chʼulchan. La yikʼtiklan bael ta stojol te winik yuʼun ya yakʼbey sbiil ta jujunkojt, jich jil sbiil jaʼ chikan te bin sbiil akʼbot yuʼun te winike. 20 Jich yuʼun, te winik la yakʼbey sbiil te alakʼil chambalametik,* te jaʼmal mutetik* te ya xwilik ta sjamalul chʼulchan sok te jtiʼawal chambalametik. Pero, te winik maʼyuk snujpʼ te ya skoltay sba soke. 21 Jaʼ yuʼun, te Jehová Dios la yakʼ kʼubuk swayel, jich te kʼalal wayal-ae, la slokʼesbey jchʼix smoch bakel,* ta patil la smak te banti la slokʼes tale. 22 Te Jehová Dios la spas jtul ants sok-a te jchʼix smoch bakel* la slokʼesbeye, ta patil la yikʼ bael ta stojol te winike.
23 Tey-abi, jich la yal te winik:
«La staix yorail te jaʼ jbakel te sbakel
sok jaʼ jbakʼetal te sbakʼetale.
Ants ya sbiilin,
melel jaʼ lokʼem tal ta stojol te winik».
24 Jaʼ swentail te ya yijkitay jilel smeʼ stat te winik yuʼun ya yikʼ sba sok* te yiname. Jich jun-nax sbakʼetal ya xkʼot ta schebalik. 25 Te winik sok te yinam tʼanalik-a, manchukme jich-abi maba ya xkʼexawik yuʼun.