Génesis
50 Te José la spet te state, la yokʼetay sok la yujtsʼuy.* 2 Ta patil, te José la yalbey ta mantal te jpoxtaywanejetik te jaʼ j-abatetik yuʼun te yakuk spoxtaybeyik sbakʼetal te state. Jaʼ yuʼun, te jpoxtaywanejetik la spoxtaybeyik sbakʼetal te Israel. 3 Jalajik 40 kʼajkʼal ta spoxtayel, melel jaʼ te tiempo te jich ya skʼan pasele. Te egipcioetike 70 kʼajkʼal la yokʼetayik.
4 Te kʼalal tsʼakaj te jayeb kʼajkʼal la smel yoʼtanik ta stojol te Israel, te José jich la yalbey te machʼatik ya x-aʼtejik ta sna te faraón: «Teme lek ya awilonike, jichme xa awalbeyik te faraón: 5 ‹Te jtat jich la yal te yakuk kalbey ta jamal: «Jtebxanix ya skʼan ya xlajon. Mukawon ta jmukenal te ay ta skʼinal Canaán». Awokoluk, akʼawon bael yuʼun ya jmuk te jtate, ta patil ya sujton tal›». 6 Te faraón jich la yalbey: «Baan, muka te atat jich te bitʼil la awalbey ta jamale».
7 Jich te José bajt smuk te state. Jokinot bael yuʼun spisil te j-abatetik yuʼun te faraón, te jwolwanejetik yuʼun te ayik ta sna, spisil te jwolwanejetik te ayik ta skʼinal Egipto, 8 spisil te machʼatik ayik ta sna te José sok te sbankil yijtsʼinab soknix spisil te machʼatik ayik ta sna te state. Jaʼnax la yijkitayik jilel ta skʼinal Gosén te chʼin achʼix keremetik yuʼunik, te stuminchijik sok te swakaxik. 9 Jaʼnix jich, bayal machʼatik jokinotik bael yuʼun te ayik ta carretaetik sok kajajtik ta caballoetik. Kʼax bayalik ta tul. 10 Te kʼalal kʼotik ta Atad te banti ya smajik te sit awal tsʼunubil te ay ta skʼinal Jordán, tey bayal okʼik sok la smel yoʼtanik-a. Te José jukebxan kʼajkʼal la yokʼetay te state. 11 Kʼalal te cananeoetik te yakik ta nainel ta lugar-abi la yilik te yakik ta tulan okʼel te banti ya yichʼ majel te sit awal tsʼunubile, jich la yalik: «Mero bayal te okʼel ay yuʼun te egipcioetike». Jaʼ yuʼun, te lugar-abi te ay ta skʼinal Jordán la yakʼbeyik sbiilin Abel-Mizraim.*
12 Te snichʼnab Jacob mero jich la spasik te bitʼil albotik jilel ta mantal yuʼun te statike. 13 Jich yuʼun, te snichʼnab la yikʼik bael ta skʼinal Canaán sok la smukik ta chʼen te ay ta skʼinal Macpelá te nopol* yiloj sba sok te Mamré. Jaʼ te kʼinal te chonbot te Abrahán yuʼun te Efrón, te hitita-winik, yuʼun ya stuuntes jich bitʼil mukenal. 14 Kʼalal te José laj yoʼtan ta smukel te state, sujt bael ta Egipto sok te sbankil yijtsʼinab soknix spisil te machʼatik jokinot bael yuʼun ta smukel te state.
15 Te kʼalal lajemix-a te stat te José, jich och yalbey sbaik te sbankiltak: «Skʼejojtoniwan slab yoʼtan ta jtojoltik te José sok yaniwan sutbotik spisil te bintik chopol* la jpasbeytike». 16 Jaʼ yuʼun, jich la stikunbeyik ta albeyel te José: «Jich la yal ta mantal te atat te kʼalal mato xlaj-ae: 17 ‹Jaʼme jich ya skʼan awalbeyik te José: «Awokoluk, pasbeya perdón te abankiltak te banti chʼayemike sok pasa perdón te smul la staik ta atojol ta swenta te la yutsʼinatike»›.* Jaʼ yuʼun, awokoluk, pasbeya perdón te j-abatetik yuʼun te Dios yuʼun te atate». Te kʼalal jich albot yaʼiy te José, och ta okʼel. 18 Ta patil bajtik ta stojol te José, la skejan sbaik ta stojol sok jich la yalbeyik: «Liʼme ayonkotik yuʼun ya amosoinotik». 19 Te José jich la yaltiklanbey: «Mame xiwex, ¿yuʼunbal Dioson? 20 Manchukme la akʼan awutsʼinonik,* ay bin lek la spas stukel te Dios ta swenta-abi yuʼun jich ya skoltaybey skuxlejal te ants winiketike. Jich yak ta spasel ta ora ini. 21 Jaʼ yuʼun mame xiwex, yatome kakʼbeyex aweʼelik jaʼex sok te awal anichʼnabike». Jich la yakʼbey smukʼul kʼinal yaʼiyik sok la slamantesbey yoʼtanik ta swenta te bintik la yaltiklanbeye.
22 Te José sok spisil te sfamilia te state nainikxan ta Egipto. Kuxin 110 jaʼbil te José. 23 Te José la yil te yoxkajal stsʼumbal Efraín, jaʼnix jich te snichʼnab te Makir te snichʼan Manasés. Ayinik* ta sjol yakan te José.* 24 Te José jich la yaltiklanbey te yermanotak: «Jtebxanix ya skʼan yuʼun ya xlajon, pero te Dios yame skoltayex. Yame yikʼex lokʼel liʼ ta kʼinal sok yame yikʼex bael ta kʼinal te yaloj ta jamal te ya yakʼbey te Abrahán, Isaac sok te Jacob». 25 Te José la yakʼ te yakuk yalik ta jamal te snichʼnab te Israel te bin ya spasik te kʼalal jich la yaltiklanbey: «Jnaʼoj te ya xbajt skoltayex te Diose. Yame awichʼbonik bael te jbakele». 26 Ayix 110 yaʼbilal-a te José te kʼalal laje. La spoxtaybeyik sbakʼetal sok la yotsesik ta jun cajón ta Egipto.