Josué

1 Te kʼalal lajemix-a te Moisés —te j-abat yuʼun Jehová—, te Jehová jich la yalbey te Josué* te snichʼan Nun, jaʼ te machʼa la skoltay ta aʼtel te Moisés: 2 «Lajix te kabat Moisés. Jich yuʼun ta ora ini chajpana aba yuʼun ya xkʼaxat bael ta jejch mukʼul jaʼ Jordán, jaʼat sok te lum ini, sok ochan ta kʼinal te banti ya kakʼbey te lum Israel. 3 Ya kakʼbeyex spisil te kʼinal te banti ya xkʼaxexe, jich te bitʼil jamal la kalbey te Moisés. 4 Te akʼinalik yame xjajch tal ta jochol takin kʼinal jaʼto ta Líbano sok kʼalal ta mukʼul jaʼ Éufrates, yame xkʼot kʼalal ta Mukʼul mar* te ay ta stojol smalib kʼajkʼal. Jaʼnix jich tey ochem skʼoplal-euk-a te skʼinal te hititaetike. 5 Maʼyuk machʼa ya stsalat te jayeb kʼajkʼal kuxulate. Jich te bitʼil la jokin te Moisés, jaʼnixme jich ya jokinat-euk. Maʼyuk bin-ora ya kijkitayat sok maʼyuk bin-ora ya jpijtesat. 6 Ayukme yip awoʼtan sok mame xchebaj awoʼtan, melel jaʼat ya awikʼ ochel te lum ini ta kʼinal te la kalbey ta jamal te antiguo smeʼ statik te ya kakʼbeye.

7 »Ayukme bayal yip awoʼtan sok mame xchebaj awoʼtan, chʼuuna spasel ta lek spisil te bin ya yal te Ley te la yakʼbat te kabat Moisés. Mame xbaat ta awaʼel ni ta akʼexam* yuʼun jich ay apʼijil ta spasel te bin ya apas chikan banti ya xbaat. 8 Mame xa awijkitay ta yalbeyel skʼoplal te bin ya yal te Ley ini, ta kʼajkʼal ajkʼabal yame skʼan ya akʼopon sok ya anopilan ta awoʼtan yuʼun jich ya achʼuun spasel spisil te bin tsʼibaybil tey-ae. Teme jich ya apase, lekme ya xkʼot ta lokʼel spisil te bintik ya apas sok ayme spʼijil awoʼtan ya xkʼoat. 9 Joʼon la kalbatix ta mantal te ayukme yip awoʼtan sok mame xchebaj awoʼtan. Mame xnijk awoʼtan sok mame xiwat, melel joʼon te Jehová te Dioson awuʼune yame jokinat chikan banti ya xbaat».

10 Jich yuʼun, te Josué la spas ta mantal te machʼatik yichʼoj mukʼ yaʼtelik yuʼun te lume: 11 «Baanik ta campamento sok jichme xa awalbeyik ta mantal te lume: ‹Chajpana aweʼelik, melel ta oxeb kʼajkʼal yame xkʼaxex bael ta jejch mukʼul jaʼ Jordán yuʼun ya x-ochex sok ya awochintayik te kʼinal te ya yakʼbeyex te Jehová te Dios awuʼunike›».

12 Te Josué jich la yalbey te stsʼumbal Rubén, te stsʼumbal Gad sok te olil stsʼumbal Manasés: 13 «Juluk ta awoʼtanik te bin la yalbeyex ta mantal te Moisés, te j-abat yuʼun Jehová: ‹Te Jehová te Dios awuʼunik la yakʼbeyex akux awoʼtanik sok la yakʼbeyex te kʼinal ini. 14 Te awinamik, te anichʼnabik sok te achambalamik liʼ ya xjilik ta jejch* Jordán, te kʼinal te la yakʼbeyex te Moisés, pero jaʼex te ay awipik ta yakʼel guerra xcholetme ya xkʼaxex bael ta stojol te awermanotakik ta yakʼel guerra. Yame skʼan ya akoltayik te awermanotakike 15 jaʼto te kʼalal ya x-akʼbotik skux yoʼtanik yuʼun te Jehová jich te bitʼil la yakʼbeyex te jaʼexe, yuʼun jich ya yuʼuninik-euk te kʼinal te ya x-akʼbotik yuʼun te Jehová te Dios yuʼunik. Ta patil sujtanik ta kʼinal te la awichʼik akʼbeyel swenta ya xnainex tey-a, ta kʼinal te la yakʼbeyex te Moisés, te j-abat yuʼun Jehová te ay ta jejch mukʼul jaʼ Jordán ta stojol te banti ya xlokʼ tal kʼajkʼal›».

16 Jich la sjakʼbeyik te Josué: «Ya jpaskotik spisil te bin la awalbotik ta mantal sok ya xboonkotik chikan te banti ya atikunotik baele. 17 Jich te bitʼil la jchʼuunkotik spasel spisil te bin la yal te Moisés, jaʼnixme jich ya jchʼuunkotik spasel-euk te bin ya awalbotike. Akʼame sjokinat te Jehová te Dios awuʼun, jich te bitʼil jokinot te Moisés. 18 Chikan machʼa-a te ya skʼaxuntaybat te amantal sok teme ma schʼuun spisil te bin ya awale yame yichʼ milel. Jaʼnax ayuk yip awoʼtan sok mame xchebaj awoʼtan».