Deuteronomio
17 »Mame skʼan ya awakʼbeyik ta milbil majtanil te Jehová te Dios awuʼunik jkojt toro o jkojt tuminchij te ay bin ma lekuk o ay bin boloben ta sbakʼetal, melel jaʼ te bin ya yilay te Jehová te Dios awuʼunik.
2 »Jnop kaʼiytik te ay jtul winik o jtul ants, ta jpamuk mukʼul lum te ya yakʼbeyex te Jehová te Dios awuʼunik, te yak ta spasel te bin chopol* ta sit te Jehová te Dios awuʼunik sok te yak ta skʼaxuntayel te chapbilkʼop yuʼune, 3 sok ya xjajch yichʼ ta mukʼ yantik diosetik sok ya snijan sba ta stojolik o ta stojol te kʼajkʼal, te u o spisil te bintik ayik ta chʼulchan, te ma jichuk kalojbeyex ta mantal. 4 Te kʼalal ya awichʼik albeyel skʼoplal ta swenta ini o la awaʼiybeyik skʼoplal, yame skʼan ya ajojkʼoyik ta lek. Teme ya yichʼ naʼbeyel skʼoplal te yuʼun-nix jich kʼot ta pasel ta Israel te bin ilobtik sba, 5 yame skʼan ya alokʼesik bael ta fuera yuʼun te mukʼul lum te winik o te ants te la spas te bin chopol* ini. Te winik o te ants-abi yame skʼan ya yichʼ milel ta chʼojel ta ton. 6 Teme ay chaʼtul o oxtul testigoetik kʼopojik, yame yichʼ milel te ants winik. Teme jtulnax testigo kʼopoj, maba ya yichʼ milel. 7 Jaʼme nail ya skʼan ya sjach skʼab te testigoetik yuʼun ya yichʼ milel te ants winik, ta patil akʼa sjach skʼabik spisil te lume. Yame skʼan ya alokʼesik ta awolilik te bintik chopole.*
8 »Teme ta jpam mukʼul lum awuʼunik ay bin wokol la awaʼiyik schajpanel —chikan teme jaʼ skʼoplal te la yichʼ malel chʼichʼ, junuk demanda o ay machʼa majawan o yantikxan wokoliletik—, yame skʼan ya xbaex ta lugar te ya stsa te Jehová te Dios awuʼunik. 9 Baanik ta stojol te levitaetik te jaʼik sacerdoteetik sok ta stojol te juez te ay ta aʼtel ta kʼajkʼaletik-abi, albeya yaʼiyik te bitʼil ay te kʼope, jaʼ ya yakʼbeyex anaʼik te bin ya staik ta nopele. 10 Jichme ya skʼan ya apasik jaʼ chikan te bin la staik ta nopel te ya yalbeyex awaʼiyik ta lugar te ya stsa te Jehová. Pasaikme tulan yuʼun ya achʼuunik spasel spisil te bin la awichʼik albeyele. 11 Jichme xa apasik jaʼ chikan te ley ya yakʼbeyex awilik sok te bin la staik ta nopel te ya yalbeyex awaʼiyike. Mame xbaex ta awaʼelik ni ta akʼexamik* ta swenta te bin la staik ta nopel te ya yalbeyex awaʼiyike. 12 Te machʼa ya stoy sba te jich maba ya yaʼiybey skʼop te juez ni jaʼuk te sacerdote te yak ta abatinel ta stojol te Jehová te Dios awuʼunik yame skʼan ya yichʼ milel. Yame skʼan ya alokʼesik ta Israel te bintik chopole.* 13 Te kʼalal ya yaʼiyik stojol spisil te lum ya xiwik yuʼun, jich maʼyuk bin-ora ya stoy sbaikix-a.
14 »Te kʼalal ochemexix bael ta kʼinal te ya yakʼbeyex te Jehová te Dios awuʼunik, te la awuʼuninikix sok te yakexix ta nainel tey-a, te jich ya awalik ‹Lea jtul ajwalil yuʼun ya swentainotik jich te bitʼil ay yuʼunik spisil te nacionetik te ayik ta joyobaltik›, 15 yananixme awakʼik ochel ta ajwalil te machʼa ya stsa te Jehová te Dios awuʼunik. Yame skʼan ya awotsesik ta ajwalil jtul awermanoik. Mame xa awotsesik ta ajwalil jtul jyanlum te ma pajaluk atsʼumbalik sok. 16 Pero, te ajwalil mame skʼan te ay bayal caballoetik yuʼun ni jaʼuk ya yakʼ sujtuk bael te lum ta Egipto yuʼun ya yikʼikxan tal caballoetik, melel jich yalojbeyex te Jehová: ‹Mame ayuk bin-ora ya xchaʼsujtex bael ta be ini›. 17 Jaʼnix jich mame bayaluk yinam ya sle, yuʼun jich maba ya xjowij yoʼtan. Jaʼnix jich mame stsob bayal plata sok oro. 18 Te kʼalal ya snajkan sba ta mukʼul naktajibal yuʼun, yame stsʼibay ta jpajk libro te Ley ini, te jaʼ yuʼun ya xkʼot, yame slokʼtay ta Ley te skʼejojik te levitaetik te jaʼik sacerdoteetik.
19 »Jaʼme ya yichʼ jilel, sok yame skʼan ya skʼopon ta jujun kʼajkʼal te jayeb kʼajkʼal kuxul yuʼun jich ya snop te bitʼil ya skʼan ya xiʼ te Jehová te Dios yuʼun sok te ya schʼuun spasel spisil te bin ya yal te Ley ini sok te ya skʼotes ta pasel te mantaliletik ini. 20 Jich maba ya skuy sba te jaʼ toyolxan skʼoplal ta stojol te yermanotak sok maba ya xjowij bael ta swaʼel o ta skʼexam* ta schʼuunel te mantalil ini, yuʼun jich jal ya xwentainwan sok jal ya xwentainwan te snichʼnab ta yolil te lum yuʼun Israel.