1 Crónicas

22 Jaʼ yuʼun, jich la yal te David: «Liʼme ya x-ayin te sna te Jehová te smelelil Dios sok yame x-ayin jun skajtajib chikʼbil majtanil te banti ya xjuʼ ya yakʼik te chikʼbil majtaniletik te lum Israel».

2 Ta patil, te David la yal ta mantal te yakuk yichʼ tsobel te jyanlumetik te ayik ta skʼinal Israel sok la yakʼtiklanbey yaʼtelik ta stopʼel tonetik, ta setʼtiklanel sok ta sjuxel te tonetik swenta ya yichʼ pasel te sna te smelelil Diose. 3 Te David jaʼnix jich la schajpan jilel bayal hierro yuʼun ya yichʼ pasel clavoetik ta swenta te tiʼnailetik sok te stakʼinal te bintik ya yichʼtiklan tsʼakele, la schajpan jilel bayal cobre te ma juʼix ta pʼisel te jayeb yalale, 4 jaʼnix jich la schajpan jilel kʼax bayal cedro-teʼetik, melel te sidonioetik sok te tirioetik la yichʼbeyik tal te David kʼax bayal cedro-teʼetik. 5 Jich la yal te David: «Te jnichʼan Salomón keremto sok mato ayuk spʼijil yoʼtan, pero te sna te Jehová te ya yichʼ pasbeyele ya skʼan te kʼax jelawen yutsilal yuʼun jich ya xpujk bael skʼoplal ta spisil te lumetik te stʼujbilale. Jich yuʼun ya jchajpan jilel te bintik ya xtuun yuʼune». Jich yuʼun, te kʼalal kuxulto-a te David bayal bintik la schajpan jilel te ya xbajt tuunuke.

6 Jich yuʼun, te David la stikun ta ikʼel te Salomón te snichʼane yuʼun ya yalbey te ya skʼan ya spasbey te sna te Jehová te Dios yuʼun Israel. 7 Te David jich la yalbey te Salomón te snichʼane: «Ay ta koʼtan-a te ya jpas jun na ta swenta sbiil te Jehová te Dios kuʼune. 8 Pero, jich la yalbon te Jehová: ‹Te jaʼate bayal amaloj chʼichʼ sok bayal awakʼoj guerra. Ta skaj te bayal amaloj chʼichʼ ta jtojol ta lumkʼinal, maba ya apasbon te jna ta swenta jbiil. 9 Yame x-ayin* jtul anichʼan te ya x-ayin lamalkʼinal ta stojol, maba ya kakʼ te ya x-akʼbot guerra yuʼun te skontratak te ayik ta sjoyobal, melel Salomón* ya xkʼot te sbiile. Te jayeb kʼajkʼal kuxule yame x-ayin lamalkʼinal* sok maʼyuk j-utsʼinwanejetik* ta lum Israel. 10 Jaʼme te machʼa ya spasbon jna ta swenta te jbiile. Jaʼ jnichʼan ya xkʼot sok joʼon staton ya xkʼoon. Joʼon ya kakʼbey yichʼ yip te wentainel yuʼun ta Israel ta sbajtelkʼinal›.

11 »Jich yuʼun, jnichʼan, akʼame sjokinat te Jehová, lekuk ya xkʼot ta pasel awuʼun sok yakuk xjuʼ awuʼun spasel te sna te Jehová te Dios awuʼun, jich te bitʼil la yal te ya apase. 12 Te bin mukʼxan skʼoplale jaʼ te akʼa yakʼbat spʼijil awoʼtan te Jehová sok te akʼa yakʼbat snopojibal awuʼun te kʼalal ya awichʼ awaʼtel ta lum Israel, swenta jich ya achʼuun spasel te ley yuʼun te Jehová te Dios awuʼune. 13 Teme jun awoʼtan ya achʼuun te leyetik yuʼun sok te bintik schapoj te Jehová te la yalbey te lum Israel ta swenta te Moisés, jichme lek ya xkʼoat ta lokʼel. Ayukme yip awoʼtan sok mame xchebaj awoʼtan, mame xnijk awoʼtan sok mame xiwat. 14 La jpas tulan te la jtsob jilel 100 mil talento* yuʼun oro sok jun millón talento* yuʼun plata ta swenta te sna te Jehová soknix la jtsob jilel kʼax bayal cobre sok hierro te ma xjuʼ ta pʼisel yalal; jaʼnix jich chapal la kijkitayix teʼetik sok tonetik, pero yatome alexan bayal te jaʼate. 15 Ayme bayal ta tul j-aʼteletik awuʼun jich bitʼil jtopʼtonetik, albañiletik, carpinteroetik sok te machʼatik ya snaʼik spasel ta lek te yaʼtelike. 16 Te oro, plata, cobre sok te hierro ma juʼ ta pʼisel te yalale. Jich yuʼun jajchanme ta aʼtel sok akʼa sjokinat te Jehová».

17 Jich yuʼun, te David la yalbey ta mantal spisil te machʼatik yichʼoj mukʼ yaʼtelik ta Israel te akʼa skoltayik ta aʼtel te Salomón te snichʼane. Jich la yaltiklanbey: 18 «¿Mabal sjokinojex te Jehová te Dios awuʼunik sok mabal yakʼojbeyex lamalkʼinal* ta bayuk? Jaʼ la yakʼbon ta jkʼab te yajwalul te lum Israel, te lum och ta skʼab te Jehová soknix och ta skʼab te lum yuʼune. 19 Akʼa ta awoʼtanik sleel te Jehová te Dios awuʼunik sok spisil awoʼtanik sok spisil akuxlejalik, jajchan pasaik te chʼul awilal yuʼun te Jehová te smelelil Dios swenta ya awichʼik tal te skaxaul chapbilkʼop yuʼun te Jehová sok te chʼultesbil aʼtejibaletik yuʼun te smelelil Dios ta na te ya yichʼ pasel ta swenta sbiil te Jehová».